Երկրորդ տիպի շաքարային դիաբետի մասին կարող են հուշել մարդու աչքերը․ 6 ախտանշան, որոնք չի կարելի անտեսել

Երկրորդ տիպի շաքարային դիաբետն ամենատարածված ու վտանգավոր հիվանդություններից մեկն է, որը կարող է լուրջ վնաս հասցնել մարմնի ամենատարբեր հատվածներին, այդ թվում նաև աչքերին, ուստի այս հիվանդության զարգացման մասին կարող են հուշել ոչ միայն շաքարային դիաբետին բնորոշ ախտանշանները, այլև տեսողական որոշակի խնդիրները։

Ինչպես գրում է MedikForum.ru կայքը, երկրորդ տիպի շաքարային դիաբետը զարգանում է ենթաստամոքսային գեղձի արտադրած ինսուլին հորմոնի արտադրության գործընթացի խանգարման դեպքում, իսկ այս հորմոնը շատ կարևոր նշանակություն ունի յուրաքանչյուրի համար, քանի որ հենց այն է կարգավորում գլյուկոզայի՝ արյան մեջ հայտնվելու գործընթացը, ինչն ապահովում է գլխուղեղի սնուցումը, էներգիայի արտադրությունն ու նյութափոխանակության գործընթացների կարգավորումը։ Երբ դիաբետիկ խանգարումները հանգեցնում են արյան մեջ շաքարի մակարդակի կարգավորման խանգարման, կարող են զարգանալ լուրջ բարդություններ, այդ թվում՝ սրտի հիվանդություններ, երիկամային անբավարարություն և գլխուղեղի կաթված։

Շաքարային դիաբետը շատ վտանգավոր հիվանդություն է, սակայն խնդիրն այն է, որ շատերն անգամ գլխի չեն ընկնում դրա առկայության մասին։ Այս խանգարման դեպքում մարդը կարող է տարիներ շարունակ չիմանալ դրա մասին, մինչդեռ հիվանդությունը կշարունակի զարգանալ ու վնասել օրգանիզմին։ Միայն տարիներ անց կարող են ի հայտ գալ չափազանց ակնհայտ ախտանշաններ, որոնց դեպքում հիվանդությունն արդեն հասած կլինի զարգացմն ուշ փուլերին։

Այս հիվանդությունը որպես կանոն ասոցացվում է ծարավի զգացման, հաճախամիզության, վերքերի ուշ ապաքինման և շաքարային դաբետին բնորոշ այլ ախտանշանների հետ, սակայն Մայո կլինիկայի փորձագետները նշում են, որ հիվանդության զարգացման մասին կարող են հուշել նաև աչքերի ու տեսողական գործառույթի խանգարումները։ Մասնագետների խոսքով՝ նման փոփոխությունները պայմանավորված են աչքի ետին հատվածի լուսազգայուն հյուսվածքի՝ ցանցաթաղանթի արյունատար անոթների վնասվածքով, ինչի պատճառ կարող է դառնալ շաքարի բարձր մակարդակը։ Սա է պատճառը, որ տեսողության հետ կապված խնդիրների դեպքում հարկավոր է հաշվի առնել նաև այս գործոնը։

Շաքարային դիաբետի զարգացման մասին կարող են հուշել աչքերի ու տեսողության հետ կապված այնպիսի ախտանշանները, ինչպիսին են.

• տեսադաշտում հայտնվող անբացատրելի բծերը,
• պատկերի աղոտությունը, 
• պատկերի տատանումները,
• գույների ընկալունակության խանգարումը, 
• տեսադաշտում մուգ կամ «դատարկ» հատվածների առկայությունը,
• տեսողության կորուստը։

Մասնագետները նախազգուշացնում են, որ այս ախտանշանները ոչ միշտ են հուշում շաքարային դիաբետի մասին, ուստի խուճապի մատնվելու կարիք չկա, սակայն դրանց առկայության դեպքում հարկավոր է անպայման բուժզննում անցնել հիվանդության առկայությունը բացառելու, իսկ հաստատման դեպքում բուժումը ժամանակին սկսելու համար։ Բժիշկների խոսքով՝  երկրորդ տիպի շաքարային դիաբետի զարգացման հավանականությունն առավել բարձր է այն մարդկանց մոտ, որոնք ունեն զգալի ավելորդ քաշ։ Բացի այդ, մեծ նշանակություն ունի նաև ժառանգական նախատրամադրվածությունը, ուստի հարազատների շրջանում շաքարային դիաբետով հիվանդների առկայության դեպքում հարկավոր է շատ զգոն լինել և պահել արյան մեջ շաքարի մակարդակը մշտական հսկողության տակ։