Քաղցկեղի մասին հուշող վաղ ախտանշաններ, որոնց քչերն են ուշադրություն դարձնում

Քաղցկեղն ամենավտանգավոր հիվանդություններից մեկն է, որը տարեկան միլիոնավոր մարդկանց մահվան պատճառ է դառնում։ Սա այն հիվանդություններից է, որոնց վաղ ախտորոշումը որոշիչ նշանակություն ունի բուժման արդյունավետության հարցում, քանի որ զարգանալու հետ մեկտեղ այն կարող է տարածվել ու ախտահարել նաև այլ օրգանները՝ նվազեցնելով բարեհաջող բուժման հավանականությունը։ 

Այս հիվանդության ախտանշաններն իմանալը շատ կարևոր է, քանի որ դրանց միջոցով օրգանիզմը հուշում է խնդրի առկայության մասին՝ թույլ տալով ժամանակին հայտնաբերել այն ու անհապաղ միջոցներ ձեռնարկել, սակայն խնդիրն այն է, որ քաղցկեղի շատ տեսակներ կարող են երկար ժամանակ զարգանալ առանց որևէ ակնհայտ ախտանշանի, իսկ որոշ նախանշաններ էլ մարդիկ շատ հաճախ անտեսում են՝ կապելով դրանք այլ խնդիրների հետ։

Ինչպես գրում է «Рамблер/доктор» պորտալը, նմանատիպ հաճախ անտեսվող ախտանշանների շարքին են դասվում բերանի խոռոչի խոցերն ու չապաքինվող վերքերը, որոնք կարող են ի հայտ գալ լնդերին, լեզվին և բերանի խոռոչի այլ փափուկ հյուսվածքներին։ Մարդիկ շատ հաճախ պատշաճ ուշադրություն չեն դարձնում դրանց, մինչդեռ նման վերքերը կարող են լինել բերանի խոռոչի քաղցկեղի մասին հուշող վաղ ախտանշանները։ Բացի այդ, այս խնդրի դեպքում կարող է նկատվել նաև ծնոտի այտուցվածություն ու թմրածություն, ինչը նույնպես չի կարելի անուշադրության մատնել։

Քաղցկեղի առաջին ախտանշանների շարքին են դասվում նաև սրտխառնոցն ու որովայնի ցավերը, որոնք նույնպես հաճախ են անտեսվում։ Այս խանգարումները որպես կանոն վերագրվում են ոչ շատ լուրջ խնդիրներին, սակայն մասնագետները հորդորում են լինել ավելի զգոն, քանի որ դրանք կարող են կապված լինել ստամոքսի քաղցկեղի, աղիների քաղցկեղի, լյարդի քաղցկեղի, ենթաստամոքսային գեղձի քաղցկեղի կամ լեյկոզի հետ։ Հարկ է հիշել, որ մարսողության խանգարման կամ թունավորման դեպքում սրտխառնոցն ու ցավոտ զգացողությունները չեն լինում երկարատև և սովորաբար անցնում են բավական կարճ ժամանակ անց, ուստի եթե նման տհաճ զգացողություններն անհանգստացնում են երկար ժամանակ, ապա հարկավոր է անհապաղ բուժզննում անցնել։

Հազը  նույնպես կարող է պայմանավորված լինել քաղցկեղով և լինել հիվանդության մասին հուշող ամենավաղ ախտանշաններից մեկը, սակայն այն շնչառական համակարգի հիվանդություններին ուղեկցող ամենատարածված ախտանշաններից է, ուստի շատերն են անտեսում այն՝ վերագրելով հասարակ հարբուխին։ Այս դեպքում ևս շատ կարևոր նշանակություն ունի խնդրի առկայության տևողությունը։ Եթե մարդը հիվանդացել է ավելի քան երեք շաբաթ առաջ, սակայն հազը շարունակում է պահպանվել, ապա հարկավոր է դիմել բժշկին։ Այս կերպ կարող են դրսևորվել թոքերի քաղցկեղն ու լեյկոզը, ուստի հարկավոր է շատ զգոն լինել և չանտեսել խնդիրը։

Հարկ է հիշել, որ այս ախտանշանները ոչ միշտ են կապված լինում քաղցկեղի հետ, ուստի մասնագետները հորդորում են խուճապի չմատնվել ու չհուսահատվել։ Նման դեպքերում հարկավոր է հնարավորինս շուտ բուժզննում անցնել, պարզել ախտանշանի առաջացման պատճառն ու սկսել համապատասխան բուժումը։