Լավագույն ժողովրդական դեղամիջոցները երիկամների բորբոքային հիվանդությունները բուժելու և ցավը մեղմելու համար

Նեֆրիտը կամ երիկամաբորբը երիկամների բորբոքային բնույթի հիվանդություն է, որի դեպքում ստրեպտոկոկներով պայմանավորված իմունոալերգեն գործընթացների հետևանքով ախտահարվում է կծիկային ապարատը։ Հիվանդությունը կարող է լինել ինչպես սուր, այնպես էլ քրոնիկ բնույթի։ Բացի այդ, կախված զարգացման տեսակից տարբերվում է նեֆրիտների մի քանի ենթատեսակ՝ գլոմերուլոնեֆրիտ, պիելոնեֆրիտ, ինտերստիցիալ նեֆրիտ, ժառանգական նեֆրիտ և ճառագայթային նեֆրիտ։ 

Նեֆրիտը բավական լուրջ խնդիր է, որը կարող է դրսևորվել մի շարք տհաճ ախտանշաններով։ Սրացումների ընթացքում այս հիվանդությունը ենթադրում է ստացիոնար բուժում և անկողնային ռեժիմ։ Նման դեպքերում նշանակվում է հատուկ սննդակարգ և սահմանափակվում է աղի և հեղուկի (օրական մինչև 700-800 մլ) գործածությունը։ Երիկամային անբավարարության զարգացման և հիվանդության ախտանշանների ի հայտ գալու դեպքում սահմանափակվում է նաև սպիտակուցների գործածությունը։

Նեֆրիտների բուժումը սովորաբար նշանակում է բժիշկը։ Նման դեպքերում հարկավոր է խստորեն հետևել մասնագետի ցուցումներին և խուսափել ինքնաբուժությունից, սակայն հիվանդության բուժումն արագացնելու և տհաճ ախտանշանները մեղմելու համար կարելի է կիրառել նաև որոշակի բնական միջոցներ, որոնք հիանալի հավելում կլինեն հիմնական բուժմանը։

Ձեր ուշադրությանն ենք ներկայացնում ամենաարդյունավետ ժողովրդական դեղամիջոցները, որոնք կօգնեն պայքարել երիկամաբորբերի դեմ։

Տուղտ դեղատու

Երիկամների բորբոքային հիվանդությունների դեմ լավագույն բնական միջոցներից մեկը դեղատու տուղտի արմատների թուրմն է։ Այն պատրաստելու համար հարկավոր է 2 ճաշի գդալ տուղտի արմատներին ավելացնել 200 մլ եռման ջուր, թրմել և ընդունել օրական 3-4 անգամ ⅓ բաժակ։ Թուրմը հարկավոր է խմել տաք վիճակում։

Գազ չռված

Քրոնիկ և սուր գլոմերուլոնեֆրիտների դեպքում խորհուրդ է տրվում խմել այս բույսի թուրմը։ Այն պատրաստելու համար հարկավոր է 10 գրամ բույսին ավելացնել 200 մլ եռման ջուր, թրմել և ընդունել օրական 3 անգամ ⅓ բաժակ։ Բուժման կուրսը տևում է 3-4 շաբաթ։

Ծորենի սովորական

Պիելոնեֆրիտի բուժման համար շատ արդունավետ կարող է լինել ծորենու տերևների ոգեթուրմը։ Այն պատրաստելու համար հարկավոր է տերևներին ավելացնել 40%-անոց սպիրտ (պատրաստվում է 1:5 հարաբերակցությամբ) և թրմել։ Ոգեթուրմը հարկավոր է ընդունել օրական 2-3 անգամ 30-40 կաթիլ։ Բուժման կուրսը տևում է 2-3 շաբաթ։

Շատ արդյունավետ կարող է լինել նաև ծորենու տերևների հասարակ թուրմը։ Հարկավոր է 1 ճաշի գդալ տերևներին ավելացնել 1 բաժակ եռման ջուր, թրմել և ընդունել դեղամիջոցն օրական 3-4 անգամ մեկական ճաշի գդալ։

Տերեփուկ կապույտ

Նեֆրիտների և պիելոնեֆրիտների դեպքում խորհուրդ է տրվում խմել կապույտ տերեփուկի ծաղիկների թուրմը։ Հարկավոր է 1 թեյի գդալ չորացրած ծաղիկներին ավելացնել մի բաժակ եռման ջուր, թրմել կես ժամ, այնուհետև ընդունել օրական երեք անգամ ուտելուց առաջ մեկական ճաշի գդալ։

Այս բնական միջոցները շատ արդյունավետ են ու հասանելի, սակայն հարկ է հիշել, որ դրանք չեն կարող լինել հիմնական բուժմանը փոխարինող միջոց և ոչ մի դեպքում չի կարելի ընդունել նման միջոցներն առանց մասնագետի հետ խորհրդակցելու։ Առողջական լուրջ խնդիրների և ուժեղ ցավերի դեպքում հարկավոր է անպայման դիմել բժշկին, քանի որ ինքնաբուժությունը կարող է խիստ վտանգավոր լինել ու էլ ավելի վատթարացնել հիվանդի վիճակը: Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ healthinfo.ua