Մաշկային ինչ խնդրով կարող է դրսևորվել 2-րդ տիպի շաքարային դիաբետը

2-րդ տիպի շաքարային դիաբետն այն հիվանդություններից է, որոնք կարող են բավական երկար ժամանակ զարգանալ առանց որևէ ակնհայտ ախտանշանի և հայտնաբերվել բավական ուշ, ինչը հաճախ շատ լուրջ բարդությունների պատճառ է դառնում, սակայն մասնագետները նշում են, որ կան որոշակի ախտանշաններ, որոնց ուշադրություն դարձնելը կօգնի հայտնաբերել խնդիրը զարգացման վաղ փուլերում և խուսափել դրա կործանարար ազդեցությունից ու վտանգավոր հետևանքներից։

Ինչպես գրում է Express պարբերականը, 2-րդ տիպի շաքարային դիաբետը զարգանում է այն ժամանակ, երբ օրգանիզմը դադարում է արտադրել բավարար քանակությամբ ինսուլին հորմոն կամ սխալ է արձագանքում այդ հորմոնի առկայությանը։ Այս հիվանդությանը բնորոշ «դասական» ախտանշաններն են ծարավի զգացումը, քաշի անբացատրելի կորուստը, հոգնածությունն ու հաճախամիզությունը, սակայն կան նաև բավական արտասովոր ախտանշաններ, որոնք նույնպես չի կարելի անուշադրության մատնել։

Նման ախտանշանների շարքին են դասվում մաշկի մուգ հետքերը։ Այս խնդիրը կոչվում է ականտոզ և դրսևորվում է մարմնի տարբեր հատվածներում առաջացած մուգ բծերով։ Մասնագետների խոսքով՝ նման բծերն առավել հաճախ առաջանում են մաշկի ծալքերի հատվածում, ինչի հետևանքով այդ հատվածների մաշկը երանգով տարբերվում է մարմնի այլ հատվածների մաշկից։

Շաքարային դիաբետի դեպքում ականտոզի հետևանքով պարանոցի, թևատակերի, աճուկի և անգամ ձեռքերի կամ ոտքերի մատների մաշկը ծալքերի հատվածներում ավելի մուգ երանգ է ստանում և դառնում է ավելի թավշյա։ Բացի այդ, այդ մուգ բծերի հատվածում կարող է նկատվել նաև քոր կամ արտասովոր հոտ, ուստի նման փոփոխությունների դեպքում հարկավոր է անհապաղ բուժզննում անցնել։

Մասնագետները նախազգուշացնում են, որ 2-րդ տիպի շաքարային դիաբետի դեպքում շատերը կարող են երկար ժամանակ անգամ գլխի չընկնել հիվանդության առկայության մասին, քանի որ այն ոչ միշտ է դառնում ինքնազգացողության վատթարացման պատճառ։ Միևնույն ժամանակ հարկ է հիշել, որ այս հիվանդության վաղ ախտորոշումը շատ կարևոր է, քանի որ շաքարային դիաբետի դեպքում բարձր է մահացու բարդությունների, այդ թվում՝ սրտանոթային հիվանդությունների ու գլխուղեղի կաթվածի զարգացման հավանականությունը։ Սա է պատճառը, որ արտասովոր ախտանշանների, այդ թվում՝ մարմնի տարբեր հատվածներում ի հայտ եկած մուգ բծերի առկայության դեպքում հարկավոր է անպայման խորհրդակցել բժշկի հետ։ Որոշ դեպքերում մասնագետը կարող է անսխալ ախտորոշել հիվանդությունը պարզապես ականտոզով ախտահարված հատվածների զննման միջոցով, ուստի հարկավոր է հնարավորինս շուտ դիմել բժշկին։