Երիկամներում քարերի առկայության մասին հուշող ախտանշաններ, որոնք ոչ մի դեպքում չի կարելի անուշադրության մատնել

Երիկամները մարդու ամենակարևոր օրգաններից են, որոնց աշխատանքի խանգարումը խիստ բացասաբար է անդրադառնում ամբողջ օրգանիզմի վրա։ Երիկամներն առաջին հերթին պատասխանատու են օրգանիզմի մաքրման համար։ Դրանց հիմնական գործառույթներից մեկն արյունը զտելն ու վնասակար նյութերը մեզի միջոցով օրգանիզմից դուրս բերելն է, սակայն լինում են դեպքեր, երբ այդ նյութերը չեն լուծվում, այլ ձևավորում են բյուրեղիկներ, որոնք էլ վերածվում են քարերի։

Երիկամներում կուտակվելու դեպքում այդ գոյացությունները կարող են կյանքի համար վտանգավոր լինել, քանի որ բացասաբար են անդրադառնում միզուկի վրա։ Բացի այդ, քարերը կարող են շարժվել և հայտնվել միզածորանում՝ խցանելով այն ու դառնալով սաստիկ ցավերի պատճառ։

Ինչպես գրում է medikforum.ru կայքը, երիկամներում քարերի առաջացման պատճառ կարող են դառնալ ամենատարբեր գործոննեը, այդ թվում՝ վատ սննդակարգը (անորակ, միանման կամ բավարար քանակությամբ վիտամիններ չպարունակող սնունդ), չափազանց շոգ կլիմայական պայմանները, որոշակի դեղամիջոցների ընդունումը, միզասեռական համակարգի բնածին արատները, A և D վիտամինների դեֆիցիտը, միզազատական համակարգի քրոնիկ բորբոքային հիվանդությունները, ինչպես նաև ժառանգական նախատրամադրվածությունը։

Այս խնդրի դեպքում հարկավոր է հնարավորինս շուտ դիմել մասնագետին և սկսել բուժումը, այլապես մեծ է բարդությունների զարգացման հավանականությունը, սակայն շատ հաճախ մարդիկ անուշադրության են մատնում միզաքարային հիվանդության մասին հուշող ախտանշանները, իսկ ցավը պարզապես մեղմում են որևէ ցավազրկող դեղամիջոցով։ Մասնագետները ներկայացրել են երիկամներում քարերի առկայության մասին հուշող 8 ախտանշան, որոնց դեպքում հարկավոր է անհապաղ դիմել մասնագետին ու բուժզննում անցնել լուրջ բարդություններից խուսափելու համար։

Մեզի որակի փոփոխություն

Երիկամներում քարերի առկայության դեպքում մեզը կարող է պղտորվել և ստանալ շատ տհաճ հոտ, ինչը պայմանավորված է լինում օրգանիզմում կուտակված տոքսիններով ու քիմիական նյութերով։

Ցավոտ զգացողություններ

Սեռական օրգանների, ցայլքի և անգամ մեջքի ցավերը նույնպես կարող են պայմանավորված լինել երիկամներում քարերի առկայությամբ։ Բացի այդ, այս խնդրի մասին են հուշում նաև որովայնի ցավերը, որոնք լինում են կտրուկ ու սուր։

Երիկամային խիթ

Երիկամներում առաջացած քարերի դեպքում ցավոտ զգացողությունները կարող են ժամանակ առ ժամանակ մեղմվել կամ ուժգնանալ՝ երբեմն ուղեկցվելով սրտխառնոցով ու առատ քրտնարտադրությամբ։ Հաճախ այս ախտանշանն ի հայտ է  գալիս ֆիզիկական ակտիվությունից հետո, ինչպես նաև մեծ քանակությամբ հեղուկի կամ միզամուղների ընդունման դեպքում։

Մեզի մեջ արյան առկայություն

Քարերի առկայության մասին կարող է հուշել նաև արյունոտ մեզը։ Նման խնդիրների դեպքում մեզը կարող է ստանալ վարդագույն կամ կարմիր երանգ, ինչը ոչ մի դեպքում չի կարելի անուշադրության մատնել։

Տհաճ զգացողություններ միզազատության ժամանակ

Հաճախամիզությունը, որը հաճախ ուղեկցվում է ցավով ու տհաճ զգացողություններով, համարվում է երիկամներում քարերի առկայության մասին հուշող հիմնական ախտանշաններից մեկը։

Սրտխառնոց ու փսխում

Երիկամների հետ կապված խնդիրների առկայության դեպքում օրգանիզմից վտանգավոր տոքսինների դուրսբերման գործընթացը դանդաղում է։ Դրանցից ազատվելու համար օրգանիզմը «գործարկում» է փսխման ռեֆլեքսը, ինչն էլ դառնում է նման ախտանշանների պատճառ։

Ընդհանուր ինքնազգացողության վատթարացում

Ինքնազգացողության վատթարացումն առավել հաճախ բնորոշ է լինում բորբոքային գործընթացներին, օրինակ՝ պիելոնեֆրիտին, ուստի նման ախտանշանի դեպքում հարկավոր է անհապաղ բուժզննում անցնել։

Դող ու բարձր ջերմություն

Դողն ու մարմնի ջերմաստիճանի բարձրացումը նույնպես կարող են պայմանավորված լինել երիկամներում քարերի կամ ավազի առկայությամբ։ Նման ախտանշաններն ի հայտ են գալիս, երբ մանր քարերը կամ ավազը շարժվում են կամ դուրս են գալիս երիկամից։

Նյութի աղբյուրը՝ medikforum.ru