Ինչ փոփոխությունների միջոցով են մարդու եղունգները հուշում մաշկի քաղցկեղի մասին

Մաշկի քաղցկեղն այս հիվանդության ամենատարածված տեսակներից մեկն է, որը կարող է ախտահարել մարմնի ցանկացած հատված։ Այս հիվանդությունը կարող է թաքնված լինել անգամ եղունգների տակ, մինչդեռ շատերն ուշադրություն չեն դարձնում ակնհայտ ախտանշաններին, ինչի հետևանքով չարորակ նորագոյացությունը շարունակում է աճել ու զարգանալ՝ ի վերջո հանգեցնելով շատ լուրջ խնդիրների։ Սա է պատճառը, որ մասնագետները հորդորում են ավելի զգոն լինել և չանտեսել եղունգների անգամ չնչին փոփոխությունները։

Ինչպես գրում է Express պարբերականը, մաշկի քաղցկեղի այն ախտանշանները, որոնք դրսևորվում են եղունգների վիճակի փոփոխությամբ, հաճախ սխալմամբ վերագրվում են եղունգների վնասվածքներին։ Ավելին՝ կանանց դեպքում այս հիվանդության ախտորոշմանը շատ հաճախ խոչընդոտում է նաև մատնահարդարումը։

Մասնագետների խոսքով՝ եղունգների վրա ի հայտ եկած բծերը, որոնք նման են այն հետքերին, որոնք առաջանում են վնասվածքների դեպքում, երբեմն հուշում են մաշկի քաղցկեղի մասին, ուստի դրանք ոչ մի դեպքում չի կարելի անտեսել։ Մաշկի քաղցկեղի հիմնադրամի փորձագետները նշում են, որ եղունգի վնասվածքն իսկապես կարող է հանգեցնել կապտուկի առաջացման, սակայն եթե մարդը չի հիշում, թե ինչպես է այդ վնասվածքն ստացել, ապա պետք է բուժզննում անցնի, քանի որ նման անբացատրելի բծերի առկայությունը կարող է լինել մելանոմայի ախտանշան։

Եղունգի տակ առաջացած հասարակ կապտուկը մաշկի քաղցկեղի այս վտանգավոր տեսակից տարբերելու համար հարկավոր է առաջին հերթին ուշադրություն դարձնել դրա արտաքին տեսքին։ Վնասվածքի դեպքում բիծը սովորաբար անկանոն ձև է ունենում և անհետանում է առողջ եղունգի աճի հետ մեկտեղ, մինչդեռ քաղցկեղով պայմանավորված բիծը շարունակում է մնալ նույն տեղում անգամ եղունգի աճի դեպքում։

Բացի այդ, մելանոմայով պայմանավորված բիծը սովորաբար լինում է ուղղահայաց գծի տեսքով, որը մի քանի շաբաթվա կամ ամսվա ընթացքում կարող է լայնանալ և փոխել իր գույնը՝ շագանակագույնից վերածվելով սևի։ Ընդ որում՝ նման ախտանշանը որևէ անհանգստություն չի պատճառում և չի առաջացնում ցավոտ զգացողություններ, ուստի զարմանալի չէ, որ շատ հաճախ այն անուշադրության է մատնվում։

Եղունգի վրա ի հայտ եկած մուգ բծից բացի մաշկի քաղցկեղը կարող է դրսևորվել նաև մի շարք այլ ախտանշաններով։ Այս հիվանդության մասին կարող են հուշել.

• եղունգի շուրջը գտնվող մաշկի կամ նրբամաշկի մուգ երանգը,
• եղունգի տակ կուտակված արյունը կամ թարախային ախտահարումը,
• եղունգի ճաքը։

Այս ախտանշանները ոչ միշտ են հուշում մաշկի քաղցկեղի մասին, ուստի դրանց առկայության դեպքում խուճապի մատնվելու կարիք չկա, սակայն դրանք նաև չի կարելի անուշադրության մատնել և որևէ միջոց չձեռնարկել։ Նման դեպքերում հարկավոր ա անհապաղ դիմել բժշկին և պարզել խնդրի առաջացման պատճառը՝ անհրաժեշտության դեպքում բուժումը ժամանակին սկսելու համար։ Հարկ է հիշել, որ մաշկի քաղցկեղի և առհասարակ քաղցկեղի ցանկացած այլ տեսակի վաղ ախտորոշումը շատ կարևոր է, քանի որ թույլ է տալիս սկսել բուժումը հնարավորինս շուտ, խուսափել բարդություններից ու բարձրացնել բարեհաջող բուժման հավանականությունը։ Սա է պատճառը, որ հարկավոր է շատ զգոն լինել և առաջին իսկ կասկածելի ախտանշանի դեպքում դիմել մասնագետին։