Ինչ ատիպիկ ախտանշաններով կարող է դրսևորվել վահանաձև գեղձի քաղցկեղը

Վահանաձև գեղձը մարդու կարևորագույն օրգաններից է, որը մասնակցում է մի շարք կենսական նշանակություն ունեցող գործընթացներին։ Պարանոցի առջևի հատվածում գտնվող այս փոքրիկ գեղձը կարգավորում է քաշը, նյութափոխանակության գործընթացները, մկանների աշխատանքը, հորմոնալ ֆոնը, ուստի այս օրգանի շատ հիվանդություների դեպքում ի հայտ են գալիս բավական ակնհայտ ախտանշաններ, որոնք պայմանավորված են լինում օրգանի աշխատանքի խանգարումներով։ Միևնույն ժամանակ վահանագեղձի քաղցկեղի դեպքում պատկերը բոլորովին այլ է լինում։

Ինչպես գրում է MedikForum.ru կայքը, վահանագեղձի քաղցկեղն ախտորոշելը կարող է բավական դժվար լինել, քանի որ չարորակ նորագոյացությունը կարող է օրգանի գործառույթների վրա զգալի ազդեցություն չունենալ ու չառաջացնել ինքնազգացողության վատթարացում։ Այս դեպքում ևս հիվանդությունը դրսևորվում է որոշակի ախտանշաններով, սակայն դրանք բավական ատիպիկ են լինում և հաճախ վերագրվում են այլ հիվանդություններին։ 

Մասնագետները ներկայացրել են վահանաձև գեղձի քաղցկեղի մասին հուշող ատիպիկ ախտանշանները, որոնք ոչ մի դեպքում չի կարելի անուշադրության մատնել։

Ձայնի խռպոտություն

Ռեսպիրատոր հիվանդություններով չպայմանավորված խռպոտությունը պետք է անհանգստացնի յուրաքանչյուրին, քանի որ կարող է պայմանավորված լինել տարբեր վտանգավոր հիվանդություններով, այդ թվում՝ վահանագեղձի քաղցկեղով։ Բանն այն է, որ գեղձը շատ մոտ է գտնվում ձայնալարերի աշխատանքը կարգավորող նյարդին, ուստի քաղցկեղի դեպքում ուռուցքը կարող է ճնշում գործադրել և հանգեցնել ձայնի փոփոխության։

Պարանոցի փոփոխություններ

Վահանագեղձի քաղցկեղի մասին հուշող ախտանշաններից մեկը կարող է լինել պարանոցին ուռուցիկ հատվածների ի հայտ գալը, ուստի նման արտաքին փոփոխությունները չի կարելի անուշադրության մատնել։

Կլման հետ կապված խնդիրներ

Կլման ակտի խանգարման կարող են հանգեցնել քաղցկեղի մի շարք տեսակներ, այդ թվում մարսողական տրակտի տարբեր հատվածքների ուռուցքները, կոկորդի քաղցկեղն ու անգամ վահանաձև գեղձի քաղցկեղը։ Նման ախտանշանը դրսևորվում է սնունդը կուլ տալու հետ կապված դժվարություններով և առաջին հայացքից կարող է անկարևոր թվալ, սակայն եթե այն հաճախակի բնույթ է կրում, ապա հարկավոր է անպայման դիմել ներզատաբանին ու բուժզննում անցնել։

Հազ

Հազը նույնպես կարող է անվնաս թվալ և շատ հաճախ վերագրվել այլ հիվանդություններին, սակայն հարկ է հիշել, որ հազը, որը չի ուղեկցվում բարձր ջերմությամբ, խորխի արտազատմամբ և մրսածությանը բնորոշ այլ ախտանշաններով, կարող է պայմանավորված լինել քաղցկեղի այս տեսակով։ Նման դեպքերում հարկավոր է անպայման դիմել բժշկին։

Մասնագետները նախազգուշացնում են, որ նշված ախտանշանները ոչ միշտ են պայմանավորված լինում քաղցկեղով, ուստի խուճապի մատնվելու կարիք չկա, սակայն դրանց առկայության դեպքում, այնուամենայնիվ, հարկավոր է դիմել մասնագետին ու բուժզննում անցնել հավանական խնդիրը ժամանակին ախտորոշելու համար։ Հարկ է հիշել, որ սա այն հիվանդություններից է, որի կանխարգելումն ու բուժումը վաղ փուլերում շատ ավելի հեշտ է ու արդյունավետ, քան հետագայում դրա առաջացրած բարդությունների դեմ պայքարելը։ Բացի այդ, հարկավոր է հաշվի առնել, որ քաղցկեղի այս տեսակն առավել հաճախ ախտորոշվում է կանանց մոտ, ուստի իգական սեռի ներկայացուցիրները պետք է շատ զգոն լինեն և անուշադրության չմատնեն խնդրի մասին հուշող ախտանշանները։