Ինչ ատիպիկ ախտանշաններով կարող է դրսևորվել թոքերի քաղցկեղը

Թոքերի քաղցկեղն ամենավտանգավոր հիվանդություններից մեկն է, որը տարեկան հազարավոր մարդկանց կյանք է խլում։ Այս հիվանդությունը կարող է շատ երկար ժամանակ մնալ աննկատ, ինչի պատճառով հայտնաբերվում է բավական ուշ։ Այնուամենայնիվ սա այն ախտաբանություններից է, որի վաղ ախտորոշումը զգալիորեն բարձրացնում է բարեհաջող բուժման հավանականությունը, ուստի հիվանդութան մասին հուշող ախտանշաններն իմանալը շատ կարևոր է։

Ինչպես գրում է Express պարբերականը, Մեծ Բրիտանիայի Ազգային առողջապահական ծառայության՝ National Health Service-ի (NHS) մասնագետները ներկայացրել են այս հիվանդության տիպիկ ու ատիպիկ ախտանշանները՝ նշելով, որ նման ախտանշաններից մեկը կարող է լինել ստրիդորը, որին ոչ բոլորն են պատշաճ ուշադրություն դարձնում։ Ստրիդորը տերմին է, որով բնութգրվում է աղմուկով, սուլոցով ու կտրուկ ձայներով ուղեկցվող շնչառությունը։ Սովորաբար նման աղմուկը լսվում է շնչելիս, ինչը պայմանավորված է լինում շնչուղիների մասնակի խցանմամբ։ Այն զգացվում է ոչ թե կրծքավանդակում, այլ շնչափողում, կոկորդում կամ ըմպանում։ Ավելին՝ աղմուկը կարող է սկսվել ցածր ձայներից, իսկ ավելի ինտենսիվ շնչառության դեպքում դրսևորվել բարձր ձայներով։

Մասնագետներն ընդգծում են, որ ստրիդորը ոչ միշտ է լինում թոքերի քաղցկեղի ախտանշան։ Այն հաճախ է հանդիպում երեխաների մոտ վերին շնչուղիների վարակների դեպքում։ Բացի այդ, ստրիդորը կարող է լինել քրոնիկ և պայմանավորված լինել բնածին հիվանդություններով։ Մեծահասակների մոտ այս խնդիրը հազվադեպ է հանդիպում, իսկ քրոնիկ բնույթ կրելու դեպքում հուշում է շատ լուրջ հիվանդությունների մասին։

Ինչպես նշում են բժիշկները, թոքերի քաղցկեղի ախտանշաններն ունեն հիվանդության զարգացման հետ մեկտեղ զարգանալու միտում և ի հայտ են գալիս աստիճանաբար։ Ընդ որում՝ ստրիդորից բացի հիվանդությունը կարող է դրսևորվել նաև այլ ախտանշաններով։ Օրինակ՝ այս հիվանդությանը բնորոշ է նաև հազը, որը պահպանվում է ավելի քան 2-3 շաբաթ։ Բացի այդ, թոքերի քաղցկեղը կարող է անդրադառնալ նաև մարդու շնչառության վրա՝ հանգեցնելով ցավերի և հևոցի։

Թոքերի օնկոլոգիական հիվանդությունների մասին կարող են հուշել նաև այնպիսի ախտանշանները, ինչպիսին են.

• կրծքավանդակի օրգանների հաճախակի վարակումները,
• արյունոտ թուքը հազի ժամանակ, 
• մշտական հոգնածությունն ու ուժերի անկումը,
• ախորժակի կորուստն ու քաշի անբացատրելի նվազումը։

Վերնշյալ ախտանշանները բավական տարածված են և հաճախ են վերագրվում այս օնկոլոգիական հիվանդությանը, սակայն կան նաև այնպիսի ախտանշաններ, որոնք բավական արտասովոր են, ուստի ոչ միշտ են հիվանդները դրանք կապում թոքերի քաղցկեղի հետ։ Նման ատիպիկ ախտանշաններից են.

• մատների արտաքին տեսքի փոփոխությունը, դրանց ծալքի հատվածների ու ծայրերի հաստացումը,
• կլման ակտի խանգարումը կամ ցավոտ զգացողությունները սնունդը կուլ տալու ժամանակ,
• դեմքի կամ պարանոցի այտուցվածությունը,
• ցավոտ զգացողություններն ուսի հատվածում։

Այս ախտանշանները կարող են պայմանավորված լինել նաև այլ խնդիրներով և որևէ կապ չունենալ քաղցկեղի հետ, ուստի խուճապի մատնվել պետք չէ, սակայն դրանք այնուամենայնիվ ոչ մի դեպքում չի կարելի անուշադրության մատնել։ Նման ախտանշանների առկայության դեպքում հարկավոր է անհապաղ բուժզննում անցնել և անհրաժեշտության դեպքում սկսել բուժումը։ Հարկ է հիշել, որ քաղցկեղն այն հիվանդություններից է, որի բուժման արդյունավետությունը կախված է դրա վաղ ախտորոշումից, ուստի առաջին իսկ կասկածի դեպքում հարկավոր է դիմել մասնագետին և բուժզննում անցնել։