Արտասովոր ախտանշաններ, որոնցով կարող է դրսևորվել զարկերակային գերճնշումը

Ընդունված է համարել, որ զարկերակային գերճնշումը սովորաբար ուղեկցվում է գլխացավերով, սակայն անգամ այս ախտանշանը ոչ բոլորի մոտ է ի հայտ գալիս, ինչի պատճառով էլ այս տարածված հիվանդությունը հաճախ անվանում են «լուռ մարդասպան»։ Սակայն սրտաբանները նշում են, որ զարկերակային գերճնշումը կարող է դրսևորվել նաև մի շարք այլ ախտանշաններով, որոնք երբեմն բավական անսպասելի են լինում և ոչ միշտ են վերագրվում սրտանոթային այս խանգարմանը։

Healthinfo.ua  կայքը ներկայացրել է զարկերակային գերճնշման մասին հուշող վեց արտասովոր ախտանշան, որոնք ոչ մի դեպքում չի կարելի անուշադրության մատնել։

Աչքերի ցավ

Սովորաբար մարդիկ պարզապես անտեսում են աչքերի ցավերը՝ վերագրելով դրանք համակարգչի երկարատև վնասակար ազդեցությանը, սակայն նման ցավը կարող է պայմանավորված լինել զարկերակային բարձր ճնշմամբ, ուստի այն ոչ մի դեպքում չի կարելի անուշադրության մատնել։

Չդադարող հազ

Զարկերակային գերճնշման մասին հուշող մյուս արտասովոր ախտանշանը չդադարող հազն է, որը չի անհետանում անգամ հորիզոնական դիրք ընդունելուց հետո։ Նման հազի դեպքում հարկավոր է անպայման չափել զարկերակային ճնշումը։

Կրծքավանդակի ցավեր

Կրծքավանդակի ցավերը սովորաբար ասոցացվում են սրտամկանի ինֆարկտի կամ սրտի այլ հիվանդությունների հետ, սակայն իրականում դրանք ոչ միշտ են պայմանավորված լինում այդ խանգարումներով։ Մասնագետները նախազգուշացնում են, որ հաճախակի կամ ոչ շատ ինտենսիվ ցավերը կրծքավանդակի հատվածում կարող են խոսել նորմայից բարձր զարկերակային ճնշման մասին։

Անտարբերություն

Սա, թերևս, զարկերակային գերճնշման մասին հուշող ամենաարտասովոր ախտանշանն է։ Այս հիվանդության դեպքում շատերը կորցնում են հետաքրքրությունն ամենօրյա գործերի ու սիրելի զբաղմունքների նկատմամբ, ուստի նման անտարբերության զգացողության դեպքում մասնագետները խորհուրդ են տալիս չանտեսել այն և խորհրդակցել բժշկի հետ։

Հոգնածություն

Հաճախակի նկատվող ֆիզիկական ու հոգեհուզական հոգնածությունը, որը պայմանավորված չէ գերծանրաբեռնվածությամբ, նույնպես կարող է պայմանավորված լինել զարկերակային բարձր ճնշմամբ։ Նման դեպքերում հարկավոր է խորհրդակցել մասնագետի հետ և պարբերաբար չափել զարկերակային ճնշումը։

Գլխապտույտ

Որոշ դեպքերում զարկերակային ճնշման կտրուկ բարձրացումներն ուղեկցվում են գլխապտույտներով։ Նման տհաճ ախտանշանի դեպքում հարկավոր է հորիզոնական դիրք ընդունել և որոշ ժամանակ պարզապես հանգստանալ։ Նման դեպքերում հարկավոր է առաջին իսկ հնարավորության դեպքում խորհրդակցել բժշկի հետ։

Հարկ է հիշել, որ զարկերակային գերճնշման զարգացման հավանականությունը տարիքի հետ բարձրանում է, ուստի 40 տարեկանից բարձր անձանց խորհուրդ է տրվում ամեն օր չափել զարկերակային ճնշումն ու պահել այն մշտական հսկողության տակ։ Մասնագետների խոսքով՝ ներկայում դեղատներում կարելի է գտնել բավական որակյալ ու ճշգրիտ արյան ճնշման ավտոմատ չափիչ սարքեր, որոնց օգնությամբ կարելի է պարբերաբար չափել զարկերակային ճնշումն ու ժամանակին հայտնաբերել պաթոլոգիկ տատանումները։