Որ ախտանշաններն են հուշում արյան մեջ շաքարի մակարդակի անկայունության մասին

Արյան մեջ շաքարի ոչ կայուն մակարդակը բացասաբար է անդրադառնում ինքնազգացողության ու տարբեր օրգանների աշխատանքի վրա, ուստի այս խնդրի կանխարգելումը շատ կարևոր է յուրաքանչյուրի համար։ Ինչպես գրում է MedikForum.ru կայքը, շաքարի մակադակը դառնում է անկայուն դրա կտրուկ աճի կամ նվազման դեպքում։ Նման տատանումները վկայում են ինսուլինի արտադրության գործընթացում տեղի ունեցած խանգարումների և այդ տարրի նկատմամբ բջիջների ընկալունակության խանգարման մասին, իսկ նման գործընթացները հաճախ ասոցացվում են երկրորդ տիպի շաքարային դիաբետի զարգացման հետ։

Այս լուրջ խնդիրը ժամանակին հայտնաբերելը թույլ կտա հնարավորինս արագ միջոցներ ձեռնարկել՝ կանխելով դրա հետագա զարգացումն ու զգալիորեն բարելավելով ինքնազգացողությունը, սակայն խանգարումը վաղ հայտնաբերելու համար հարկավոր է նախ իմանալ, թե ինչ ախտանշաններով է այն դրսևորվում և որ փոփոխություններին է հարկավոր ուշադրություն դարձնել։

Մասնագետները ներկայացրել են այն ախտանշանները, որոնք կհուշել արյան մեջ շաքարի մակարդակի անկայունության մասին։

Արտասովոր քաղցր զգացում

Եթե քաղցի զգացումը տանջում է անգամ օրվա ընթացքում բավարար քանակությամբ սնունդ գործածության դեպքում, ապա հարկավոր է շատ զգոն լինել, քանի որ նման անբացատրելի քաղցը կարող է պայմանավորված լինել արյան մեջ շաքարի մակարդակի շատ կտրուկ տատանումներով (մասնավորապես՝ բարձր մակարդակի կտրուկ անկմամբ)։ Նման տատանումները կարող են կապված լինել սննդի վատ որակի և սննդակարգում մեծ քանակությամբ պարզ ածխաջրերի առկայության ու մանրաթելերի պակասի հետ։ Ընդ որում՝ այս ախտանշանը բնորոշ է նաև շաքարային դիաբետին։

Որովայնի հատվածի ճարպաշերտեր

Որովայնի հատվածում ավելորդ ճարպային հյուսվածքների կուտակումը կարող է հուշել ինսուլինի նկատմամբ կայունության զարգացման մասին, ինչը ենթադրում է արյան մեջ գլյուկոզայի մակարդակը կարգավորող ինսուլին հորմոնի նկատմամբ բջիջների զգայունության նվազում։ Այս խանգարման դեպքում օրգանիզմը ճիշտ չի արձագանքում ինսուլինին, ինչի հետևանքով ավելորդ գլյուկոզան կուտակվում է և վերածվում ճարպաշերտերի, որոնք հաճախ կուտակվում են որովայնի հատվածում։ 

Քաղցր ուտելու ցանկություն

Անդադար քաղցր մթերք ուտելու ցանկությունը նույնպես բնական երևույթ չէ, ուստի այն ևս չի կարելի անուշադրության մատնել։ Այս ախտանշանը հուշում է արյան մեջ շաքարի մակարդակի կտրուկ նվազման մասին, ինչը բավական հաճախ հանդիպող խնդիր է երկրորդ տիպի շաքարային դիաբետի դեպքում։

Կտրուկ և սաստիկ հոգնածության «նոպաներ»

Նման անբացատրելի հոգնածությունը ևս համարվում է արյան մեջ շաքարի ցածր մակարդակի մասին նախազգուշացնող հիմնական նշաններից մեկը։ Սա պայմանավորված է լինում մեծ քանակությամբ ինսուլինի արտադրությամբ, ինչի պատճառ է հանդիսանում այս հորմոնի նկատմամբ կայունության զարգացումը։ 

Քնի խանգարումներ

Երկրորդ տիպի շաքարային դիաբետի զարգացումը զգալիորեն բարձրացնում է քնի օբստրուկտիվ ապնոէի, անհանգիստ ոտքերի համախտանիշի և քնի որակի վրա բացասաբար անդրադարձող մի շարք այլ խանգարումների զարգացման հավանականությունը։

Ճնշված հոգեհուզական վիճակ

Արյան մեջ շաքարի մակարդակի տատանումները կարող են իրենց ազդեցությունն ունենալ նաև տրամադրության վրա։ Գլյուկոզայի մակարդակի նվազումը հաճախ դարձնում է մարդուն դյուրագրգիռ, բարձրացնում է անհանգստության ու տագնապի մակարդակը և կարող է անգամ դառնալ ընկճախտի ու տրամադրության անկման պատճառ։

Հարկ է հիշել, որ նշված ախտանշանները ոչ միշտ են պայմանավորված լինում արյան մեջ շաքարի մակարդակի տատանումներով, ուստի խուճապի մատնվելու կարիք չկա, սակայն դրանց առկայության դեպքում, այնուամենայնիվ, հարկավոր է դիմել մասնագետին ու բուժզննում անցնել խնդիրը ժամանակին հայտնաբերելու համար։ Հարկ է հիշել, որ հիվանդության ախտորոշումը վաղ փուլերում թույլ է տալիս ժամանակին միջոցներ ձեռնարկել ու խուսափել հետագա բարդություններից, ուստի վերոնշյալ ախտանշանները ոչ մի դեպքում չի կարելի անուշադրության մատնել։ Բացի այդ, ոչ մի դեպքում չի կարելի զբաղվել ինքնաբուժությամբ, քանի որ միայն փորձառու բժիշկը կկարողանա ճիշտ ախտորոշել հիվանդությունն ու նշանակել անհրաժեշտ բուժումը, որը կլինի արդյունավետ ու անվտանգ։