7 ախտանշան, որոնք հուշում են արյան մեջ շաքարի մակարդակի տատանումների մասին

Արյան մեջ շաքարի մակարդակը վերահսկողության տակ պահելը շատ կարևոր է յուրաքանչյուրի համար, քանի որ այդ ցուցանիշի տատանումների դեպքում բարձրանում է  շաքարային դիաբետի առավել վտանգավոր բարդությունների՝ գլխուղեղի կաթվածի, սրտի հիվանդությունների, նյարդերի վնասվածքների զարգացման հավանականությունը։ Սա է պատճառը, որ հարկավոր է զգոն լինել ու չանտեսել ախտանշանները, որոնք կարող են հուշել արյան մեջ գլյուկոզայի մակարդակի բարձրացման մասին։

Մասնագետները ներկայացրել են յոթ ախտանշան, որոնք կարող են պայմանավորված լինել արյան մեջ շաքարի մակարդակի անկայունությամբ ու հաճախակի տատանումներով։ Նման ախտանշանների առկայության դեպքում հարկավոր է անհապաղ դիմել բժշկին ու բուժզննում անցնել հնարավորինս շուտ խնդիրն ախտորոշելու և անհրաժեշտ միջոցները ձեռնարկելու համար։

Հաճախամիզություն ու անհագ ծարավ

Օրվա ընթացքում սովորականից շատ ջուր խմելու պահանջն ու հաճախ միզելու անհրաժեշտությունը շաքարի մակարդակի բարձրացման մասին հուշող ամենատարածված ախտանշաններից են, սակայն ամռանն այն հաճախ է անուշադրության մատնվում, քանի որ վերագրվում է շոգ եղանակին։ Նման ախտանշանի առկայության դեպքում հարկավոր է շատ զգոն լինել և հետևել օրգանիզմում տեղի ունեցող այլ փոփոխություններին։ Եթե այն ուղեկցվում է ստորև ներկայացված այլ ախտանշաններով, ապա հարկավոր է անհապաղ բուժզննում անցնել։

Քաշի անբացատրելի նվազում

Արյան մեջ շաքարի մակարդակի բարձրացման դեպքում հաճախ է նկատվում նաև քաշի անբացատրելի նվազում։ Ընդ որում՝ այս դեպքում մարդու քաշը շարունակում է նվազել անգամ սովորականից ավելի շատ սնվելու դեպքում։ Սա պայմանավորված է լինում նյութափոխանակության խանգարումներով։ Բանն այն է, որ շաքարային դիաբետի դեպքում մարմինը դադարում է ստանալ անհրաժեշտ էներգիան գլյուկոզայից, ինչի հետևանքով ստիպում է լինում ստանալ այն մկաններից ու ճարպային հյուսվածքներից։ 

Մշտական հոգնածություն

Երբ օրգանիզմը չի յուրացնում ինսուլին հորմոնն ինչպես հարկն է կամ չի կարողանում ինքնուրույն արտադրել անհրաժեշտ քանակությամբ ինսուլին, շաքարը կուտակվում է արյան մեջ և չի հայտնվում բջիջներում։ Այս ամենի հետևանքով հյուսվածքներն ու օրգանները չեն ստանում անհրաժեշտ սնուցումն ու էներգիան, ինչն էլ հանգեցնում է մշտական հոգնածության։

Տեսողության աղոտացում

Արյան մեջ շաքարի անոմալ բարձր մակարդակը կարող է հանգեցնել աչքերի ոսպնյակների այտուցման, ինչը պայմանավորված է լինում հեղուկի արտահոսքով։ Սա իր ազդեցությունն է ունենում տեսողության վրա, քանի որ փոխում է ոսպնյակի ձևը, թույլ չի տալիս կենտրոնանալ ու հանգեցնում է տեսողության աղոտացման։

Ոտքերի կամ ձեռքերի թմրածություն ու ծակծկոց

Արյան մեջ շաքարի բարձր մակարդակը կարող է լրջորեն վնասել նյարդերը, ինչը կհանգեցնի ոտքերի կամ ձեռքերի թմրածության ու ծակծկոցի։ Ավելին՝ որոշ դեպքերում կարող են նկատվել անգամ վերջույթների ցավեր։

Մաշկի չորություն, բորբոքումներ և այլ փոփոխություններ

Արյան մեջ շաքարի մակարդակի բարձրացման դեպքում պարանոցի ետին հատվածում, ձեռքերի և թևատակերի ծալքերի հատվածներում կարող են ի հայտ գալ մուգ, թավշյա բծեր, որոնք ոչ մի դեպքում չի կարելի անտեսել։ Բացի այդ, շաքարի բարձր մակարդակը կարող է դրսևորվել մաշկի չորությամբ, քորով, գունազրկմամբ, բորբոքումներով, բշտիկներով և մի շարք այլ մաշկային խնդիրներով, ուստի նման արտասովոր փոփոխությունների դեպքում անհրաժեշտ է անպայման խորհրդակցել բժշկի հետ։

Լնդերի այտուցվածություն ու արյունահոսություն

Գլյուկոզան պարունակվում է ոչ միայն արյան, այլև թքի մեջ և որքան բարձր է լինում դրա մակարդակը, այնքան ավելի լուրջ են լինում բերանի խոռոչի ախտահարումները։ Շաքարային դիաբետով հիվանդների մոտ հատկապես հաճախ են հանդիպում լնդերի հիվանդություններ, որոնք զգալիորեն բարձրացնում են պերիօդոնտիտի զարգացման հավանականությունը։ Այս հիվանդությունն էլ իր հերթին կարող է դառնալ ատամների կորստի, հյուսվածքների թարախային ախտահարումների և բերանի խոռոչի խոցերի առաջացման պատճառ։

Նշված խանգարումները ոչ միշտ են պայմանավորված լինում շաքարային դիաբետով, ուստի անմիջապես խուճապի մատնվելու կարիք չկա, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել բժշկի հետ և բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ MedikForum.ru