Երեք անվնաս թվացող գործոն, որոնք բարձրացնում են լյարդի հիվանդությունների զարգացման հավանականությունը

Լյարդի հիվանդություններն առավել հաճախ զարգանում են ալկոհոլի չարաշահման հետևանքով, սակայն այնուամենայնիվ ոգելից խմիչքների գործածությունն այս օրգանի ախտահարման միակ պատճառը չէ։ Չնայած այն բանին, որ ալկոհոլն իսկապես խիստ բացասաբար է անդրադառնում լյարդի վրա, կան նաև ոչ պակաս վնասակար մի շարք այլ գործոններ, որոնք հազվադեպ են  կապվում այս օրգանի առոջղության հետ։ Մասնագետները ներկայացրել են կենսակերպի երեք առանձնահատկություն, որոնք կարող են դառնալ լյարդի հիվանդությունների զարգացման պատճառ։

Ավելորդ քաշ

Սովորաբար մարդիկ համակերպվում են ավելորդ կիլոգրամների առկայության հետ, չեն դիտարկում դրանք որպես լուրջ խնդիր և չեն փորձում ազատվել դրանցից, սակայն ավելորդ քաշ ունեցող հասուն մարդկանց 25-90%-ը բախվում է լյարդի ոչ ալկոհոլային ճարպային հիվանդությանը, որը զարգանում է այն ժամանակ, երբ լյարդի բջիջներն սկսում են ճարպ կուտակել։ Ընդ որում՝ որպես կանոն այդ ճարպը կուտակվում է տրիգլիցերիդների տեսքով։ Եթե այն կազմում է ամբողջ օրգանի քաշի մինչև 10%-ը, զարգանում է ստեատոզ, որը ժամանակի ընթացքում կարող է հանգեցնել բորբոքման ու հյուսվածքների սպիացման։ Լյարդի ոչ ալկոհոլային ճարպային հիվանդությունը կարող է դառնալ լյարդի ցիռոզի կամ լյարդային անբավարարության զարգացման պատճառ։ Բացի այդ, այն նաև բարձրացնում է շաքարային դիաբետի ու սրտանոթային հիվանդությունների զարգացման հավանականությունը, ուստի ավելորդ քաշի դեպքում հարկավոր է հնարավորինս շուտ ազատվել այս խնդրից։

Վիտամինների ընդունում

Մասնագետները հաճախ են շեշտում, որ առանց բժշկի նշանակման վիտամիններ ընդունել չի կարելի, սակայն շատերն անտեսում են այս նախազգուշացումը։ Այնուամենայնիվ հարկ է հիշել, որ վիտամինների ընդունումն առանց մասնագետի հետ խորհրդակցելու կարող է աննկատ հանգեցնել ակտիվ բաղադրիչներով գերդոզավորման, որոնք էլ բարձրացնում են լյարդի վտանգավոր խանգարումների զարգացման հավանականությունը։ Օրինակ՝ լյարդի համար շատ վտանգավոր է վիտամին A-ի մակարդակի բարձրացումը, քանի որ այն կարող է դառնալ լյարդի ցիռոզի ու տոքսիկ վնասվածքների պատճառ։

Քաղցրի չարաշահում

Քաղցրակերների մոտ հաճախ է զարգանում ճարպակալում, որի դեպքում ճարպային բջիջները կարող են բազմանալ նաև ներքին օրգանների հյուսվածքներում։ Մասնագետների տվյալներով՝ ամեն օր քաղցրավենիքի տեսքով ավելորդ կալորիաներ օգտագործելու դեպքում ավելորդ քաշ է կուտակվում միայն 2% դեպքերում, սակայն միևնույն ժամանակ այդ խնդրին բախվածների 27%-ի մոտ ախտորոշվում է լյարդի ճարպակալում, որը նպաստում է լյարդի ոչ ալկոհոլային ճարպային հիվանդության զարգացմանը։ Մասնագետների խոսքով՝ շաքարի չարաշահումը լյարդի համար ալկոհոլի չարաշահումից պակաս վտանգավոր չէ, ուստի հարկավոր է հնարավորինս սահմանափակել քաղցրավենիքը։

Նյութի աղբյուրը՝ medikforum.ru