Ինչ է համակարգային կարմիր գայլախտն ու ինչ ախտանշաններով է այն դրսևորվում

Համակարգային կարմիր գայլախտը քրոնիկ բորբոքային հիվանդություն է, որի էթիոլոգիան առայժմ գիտնականներին հայտնի չէ։ Սա աուտոիմունային հիվանդություն է, որն ախտահարում է օրգանիզմի շարակցական հյուսվածքները։ Այն կարող է ախտահարել ցանկացած օրգան, այդ թվում՝ թոքերը, երիկամները, արյունատար անոթներն ու սրտամկանը։ 

Համակարգային կարմիր գայլախտը շատ վտանգավոր խանգարում է և կարող է լուրջ հետևանքներ ունենալ, ուստի այն ժամանակին հայտնաբերելը շատ կարևոր է։ «Рамблер» պորտալը ներկայացրել է այն ախտանշանները, որոնք կնախազգուշացնեն համակարգային կարմիր գայլախտի մասին։

Քաշի փոփոխություն

Այս հիվանդությունը կարող է իր ազդեցությունն ունենալ վահանաձև գեղձի վրա՝ ստիպելով օրգանին ավելի ինտենսիվ աշխատել ու շատ հորմոն արտադրել կամ առհասարակ դանդաղեցնելով հորմոնների արտադրության գործընթացը։ Սա էլ իր հերթին անդրադառնում է քաշի վրա՝ ավելացնելով կամ նվազեցնելով այն։

Ավշային հանգույցների մեծացում

Համակարգային կարմիր գայլախտի դեպքում առավել հաճախ այտուցվում են պարանոցի հատվածում, ծնոտի տակ և ականջների հետևում գտնվող ավշային հանգույցները, սակայն չի բացառվում, որ այտուցներ ի հայտ կգան նաև ցայլքի կամ թեևատակերի հատվածում կամ մարմնի որևէ այլ մասում։

Մազաթափություն

Գայլախտի մասին նախազգուշացնող ախտանշան կարող է լինել նաև սաստիկ մազաթափությունը, ուստի եթե պարզապես վարսերը սանրելը հանգեցնում է մեծ քանակությամբ մազերի կորստի ապա հարկավոր է անպայման բուժզննում անցնել։

Ցավեր կրծքավանդակի հատվածում

Երբեմն գայլախտի դեպքում հիվանդները գանգատվում են կրծքավանդակի հատվածի բութ ցավերից, ուստի նման ախտանշանը ևս չի կարելի անուշադրության մատնել։ Բանն այն է, որ այս հիվանդությունը կարող է դառնալ այտուցների առաջացման պատճառ, որոնք ի հայտ են գալիս մարմնի տարբեր հատվածներում, այդ թվում՝ սրտամկանի ու թոքերի հատվածում։ Հենց նման այտուցներն էլ հանգեցնում են տհաճ զգացողությունների զարգացման։

Խոցերի առաջացում

Գայլախտի դրսևորումների շարքին կարող են դասվել նաև խոցերն ու լորձաթաղանթների ախտահարումները։ Եթե նման խոցերն ի հայտ են գալիս պարբերաբար և չեն ապաքինվում երկար ժամանակ, ապա հարկավոր է անպայման դիմել բժշկին։

Մշտական հոգնածություն

Գայլախտի մասին հուշող մյուս ախտանշանը հյուծվածությունն ու մշտական հոգնածությունն է, որի դեպքում մարդը դժվարությամբ է կատարում անգամ ամենապարզ գործողությունները։ Սա է պատճառը, որ նման անբնական հոգնածության դեպքում հարկավոր է անպայման բուժզննում անցնել։

Դեմքի ցան

Այս հիվանդությանը բնորոշ ամենատարածված ախտանշաններից մեկը քթի ու այտերի հատվածի մանր կարմիր ցանն է, որն առաջանում է արևի ճառագայթների ազդեցության տակ։ Այդ ցանն ունենում թիթեռի թևերի ձև, ինչի հետևանքով XIX դարում գայլախտն անվանում էին «թիթեռի հիվանդություն»։

Գրիպի ախտանշաններ, որոնք չեն մեղմվում

Համակարգային կարմիր գայլախտով հիվանդների մոտ հաճախ են նկատվում գրիպին բնորոշ այնպիսի ախտանշաններ, ինչպիսին են մկանային ցավերը, տենդը, դողն ու քնկոտությունը, սակայն ի տարբերություն գրիպի այս դեպքում ախտանշանները պահպանվում են բավական երկար։ Եթե գրիպով հիվանդի մոտ տհաճ զգացողությունները մեղմվում են մի քանի օրում, ապա գայլախտի դեպքում դրանք կարող են պահպանվել շաբաթներով։

Նշված ախտանշանները ոչ միշտ են պայմանավորված լինում համակարգային կարմիր գայլախտով, ուստի խուճապի մատնվելու կարիք չկա, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Սա է պատճառը, որ վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել բժշկի հետ ու բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ: