Արտասովոր արտաքին ախտանշաններ, որոնք կարող են պայմանավորված լինել թոքերի քաղցկեղով

Թոքերի քաղցկեղն այս հիվանդության ամենավտանգավոր ու տարածված տեսակներից մեկն է, որը շատ հաճախ է մահվան ելք ունենում։ Սա պայմանավորված է նրանով, որ հիվանդությունը սովորաբար ախտորոշվում է զարգացման ուշ փուլերում, մինչդեռ այն դասվում է այն հիվանդությունների շարքին, որոնց վաղ ախտորոշումը զգալիորեն բարձրացնում է բարեհաջող բուժման հավանականությունն ու նվազեցնում չարորակ նորագոյացության մետաստազների տարածման հավանականությունը։

Քաղցկեղի այս տեսակը ժամանակին հայտնաբերելու համար հարկավոր է պարբերաբար բուժզննում անցնել ու հետևել օրգանիզմի տված ազդանշաններին, սակայն խնդիրն այն է, որ հիվանդությունը կարող է բավական երկար ժամանակ չդրսևորվել ակնհայտ ախտանշաններով ու շարունակել զարգանալ աննկատ։ Բացի այդ, շատ հաճախ մարդիկ չեն կապում ի հայտ եկած արտասովոր ախտանշանները թոքերի ախտահարման հետ, ուստի հազվադեպ են ուշադրություն դարձնում դրանց։ Նման խնդիրներից խուսափելու համար Մեծ Բրիտանիայի Առողջապահության ազգային ծառայության (NHS ) մասնագետները ներկայացրել են թոքերի քաղցկեղի մասին հուշող մի քանի արտաքին ախտանշան, որոնց առկայության դեպքում հարկավոր է անհապաղ դիմել ուռուցքաբանին ու բուժզննում անցնել։

Կոպի իջեցում

Թոքերի քաղցկեղի մասին հուշող ամենաարտասովոր արտաքին դրսևորվումներից մեկը կոպի իջեցումն է։ Սա պայմանավորված է լինում նրանով, որ ուռուցքը հաճախ ախտահարում է օրգանի այն հատվածը, որտեղով անցնում են մեծ թվով նյարդեր, որոնց շարքին են դասվում նաև այն նյարդերը որոնք ազդում են աչքերի և մարմնի որոշակի հատվածների վիճակի վրա։  

Մաշկային ցան

Եթե ցանն ի հայտ է եկել անսպասելի և չունի որևէ պատճառ, ապա հարկավոր է անպայման բուժզննում անցնել ու խորհրդակցել մասնագետի հետ։ Շատ հաճախ նման արտասովոր ցանից են գանգատվում թոքերի քաղցկեղով հիվանդները, ուստի հարկավոր է զգոն լինել ու չանտեսել նման ախտանշանը։ Ընդ որում` առավել հաճախ հիվանդությունը դրսևորվում է մաշկին ի հայտ եկած կապտավուն կամ մանուշակագույն բծերով։

Արտասովոր քրտնարտադրություն

Թոքերում զարգացած չարորակ նորագոյացության մասին հուշող մյուս արտասովոր արտաքին ախտանշանը  դեմքի քրտնագեղձերի աշխատանքի խանգարումն է։ Այս հիվանդության դեպքում դեմքի մի կողմը կարող է մյուսից անհամեմատ ավելի շատ քրտնել։ Ընդ որում` ուռուցքը սովորաբար տեղակայված է լինում  այն կողմում, որ կողմում դեմքը քիչ է քրտնում։ 

Վերոնշյալ ախտանշաններից բացի հիվանդությունը կարող է դրսևորվել նաև մի շարք այլ ախտանշաններով, այդ թվում` բիբերի փոքրացմամբ ու ձայնի փոփոխություններով (օրինակ՝ խռպոտությամբ), ուստի նման ախտանշանները նույնպես չի կարելի անտեսել։

Մասնագետները նախազգուշացնում են, որ նշված ախտանշանները ոչ միշտ են պայմանավորված լինում թոքերի քաղցկեղով, ուստի պետք չէ խուճապի մատնվել և հուսալքվել, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել բժշկի հետ և բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ express.co.uk