Որոնք են ոտքերի ջղաձգումների առաջացման հիմնական պատճառները

Ոտքերի ջղաձգումները բավական տհաճ զգացողություններ առաջացնող խնդիր են, որոնք պայմանավորված են լինում մեկ կամ մի քանի մկանների ակամա կծկումներով։ Գիշերային ջղաձգումները բավական ցավոտ զգացողություններ են առաջացնում՝ բացասաբար անդրադառնալով քնի որակի վրա։ Ընդ որում՝ այդ տհաճ զգացողությունները ոչ միշտ է հաջողվում հեշտությամբ մեղմել, ուստի շատ ավելի ճիշտ կլինի սովորել կանխել նման խնդրի առաջացումը։

Գիշերային ջղաձգումներից խուսափելու համար հարկավոր է նախ պարզել դրանց պատճառներն ու խուսափել դրանցից, ուստի ձեր ուշադրությանն ենք ներկայացնում այն հիմնական խնդիրները, որոնք կարող են հանգեցնել ջղաձգումների։

Ջղաձգումների առաջացման ամենատարածված ու համեմատաբար անվնաս պատճառներից մեկը երկար ժամանակ ֆիզիկական ակտիվությունից խուսափելն է, ինչը ներկայում բավական արդիական խնդիր է։ Սակայն նման տհաճ զգացողությունների առաջացման պատճառ կարող է դառնալ ոչ միայն նստակյաց կենսակերպը, այլև երկար ժամանակ կանգնած անցկացնելը, ուստի ինչ-ինչ պատճառներով օրվա ընթացքում շատ քայլող կամ երկար ժամանակ կանգնած անցկացնող մարդիկ ևս կարող են բախվել այս խնդրին։ Բանն այն է, որ ջղաձգումների պատճառ կարող է դառնալ ոչ միայն մկանների ակտիվության պակասը, այլև մկանների գերծանրաբեռնվածությունը, ուստի երկու դեպքում էլ հարկավոր է զգոն լինել։

Այնուամենայնիվ ոչ մի դեպքում չի կարելի վերագրել ջղաձգումները միայն ակտիվության պակասին կամ գերծանրաբեռնվածությանը, քանի որ որոշ դեպքերում մկանային սպազմները պայմանավորված են լինում որոշակի խնդիրներով և հուշում են անհապաղ մասնագետին դիմելու անհրաժեշտության մասին։

Ձեր ուշադրությանն ենք ներկայացնում այն հիմնական գործոնները, որոնք կարող են նպաստել գիշերային ջղաձգումների առաջացմանը։

Հիպոկալիեմիա (օրգանիզմում կալիումի ցածր մակարդակ)

Ջղաձգումների հավանական պատճառներից մեկը կարող է լինել օրգանիզմում կալիումի ցածր մակարդակը։ Այս տարրը շատ կարևոր սննդարար նյութ է օրգանիզմի բազմաթիվ գործառույթների պահպանման համար։ Այն օգնում է պահպանել բջիջաթաղանթն ամուր, ապահովում է երիկամների կենսագործունեությունն ու կարգավորում է մկանային կծկումները։ Օրգանիզմում այս տարրի չափազանց ցածր մակարդակի դեպքում կարող են նկատվել այնպիսի տհաճ ախտանշաններ, ինչպիսին են մկանային թուլությունն ու ջղաձգումները։

Մագնեզիումի դեֆիցիտ

Մագնեզիումի դեֆիցիտը կարող է պայմանավորված լինել տարբեր խանգարումներով, այդ թվում՝ աղիների հետ կապված խնդիրներով, քրոնիկ փորլուծությամբ կամ ալկոհոլի չարաշահմամբ։ Օրգանիզմում մագնեզիումի պակասի մասին հուշող հիմնական ախտանշաններից մեկը ոտքերի ջղաձգումներն են, ուստի նման խնդրի դեպքում հարկավոր է անպայման ստուգել օրգանիզմում այս տարրի մակարդակը։

Դեղորայքի հետևանքով առաջացած կողմնակի բարդություններ

Գոյություն ունեն որոշակի դեղամիջոցներ, որոնք կարող են դառնալ ոտքերի ջղաձգումների պատճառ կամ առաջացնել կողմնակի բարդություններ ջղաձգումների տեսքով։ Նման դեղամիջոցների շարքին են դասվում բետա-ագոնիստները, ստատինները, միզամուղ դեղամիջոցները և այլն։

Սխալ կոշիկի ընտրություն

Ջղաձգումների պատճառ կարող է դառնալ նաև կոշիկի սխալ ընտրությունը։ Նման խնդիր սովորաբար նկատվում է այն ժամանակ, երբ կոշիկը չափազանց կիպ է լինում և ճնշում է գործադրում ոտնաթաթերի և ոտքերի մատների վրա։

Քրոնիկ հիվանդություններ

Որոշակի քրոնիկ հիվանդությունները նույնպես բարձրացնում են մկանային սպազմների հավանականությունը։ Նման հիվանդությունների շարքին են դասվում.

• սրտանոթային հիվանդությունները,
• շաքարային դիաբետը,
• երիկամային անբավարարությունը,
• լյարդային անբավարարությունը,
• սպինալ նեղացումը,
• հարթաթաթությունը,
• հիպոթիրեոզը,
• օստեոարթրիտը։

Նյութի աղբյուրը՝ medikforum.ru