Մասնագետը նշել է՝ որոնք են  շաքարային դիաբետի զարգացմանը նպաստող հիմնական գործոններն ու հիվանդության մասին հուշող առաջին ախտանշանը

Շաքարային դիաբետը ներկայում ամենատարածված ու վտանգավոր հիվանդություններից մեկն է, որի վաղ ախտորոշումը թույլ է տալիս ժամանակին միջոցներ ձեռնարկել ու կանխել լուրջ բարդությունների զարգացումը։ Այս հիվանդությունը դրսևորվում է բավական վառ ախտանշաներով, սակայն դրանք ի հայտ են գալիս այն ժամանակ, երբ հիվանդությունն արդեն զարգացել է և իր կործանարար ազդեցությունն է ունենում օրգանիզմի վրա։ Այնուամենայնիվ գոյություն ունի մի ախտանշան, որն առաջինն է հուշում շաքարային դիաբետի մասին՝ թույլ տալով հնարավորինս շուտ միջոցներ ձեռնարկել։

Մոսկվայի Ի. Սեչենովի անվան առաջին պետական բժշկական համալսարանի ներզատաբանության ամբիոնի ընթերակա, բժշկական գիտությունների թեկնածու, բժիշկ-ներզատաբան Նադեժդա Մաքսիմովան ներկայացրել է այն գործոնները, որոնք բարձրացնում են շաքարային դիաբետի զարգացման հավանականությունը, ինչպես նաև նշել մի ախտանշան, որը ոչ մի դեպքում չի կարելի անտեսել։

Մասնագետի խոսքով՝ շաքարային դիաբետի մասին հուշող առաջին ախտանշանը շաքարի մակարդակի բարձրացումն է, որը հաճախ անուշադրության են մատնում։ Խոսքն այն ցուցանիշի մասին է, որը համարվում է նորմայից բարձր, սակայն այնքան բարձր չէ, որպեսզի մասնագետները շաքարային դիաբետ ախտորոշեն։ Նման խնդիրը կոչվում է նախադիաբետ, որը ժամանակին չնկատելը կհանգեցնի շաքարային դիաբետի զարգացման։ Այնուամենայնիվ նախադիաբետի դեպքում կենսակերպում ու սննդակարգում որոշակի փոփոխություններ անելը թույլ կտա կանխել նման վտանգավոր հիվանդության զարգացումը։

«Յուրաքանչյուր տասներեքերորդ հասուն մարդն ունի նախադիաբետ, իսկ յուրաքանչյուր վեցերորդ երեխան լույս աշխարհ է գալիս մորից, որի արյան մեջ գլյուկոզայի մակարդակը հղիության ընթացքում բարձր է եղել։ 84% դեպքերում գլյուկոզայի բարձր մակարդակն ասոցացվում է շաքարային դիաբետի հետ», - kp.ru-ի հետ զրույցում նշել է մասնագետը՝ ընդգծելով, նման վիճակը հետագայում կարող է դառնալ երկրորդ տիպի շաքարային դիաբետի զարգացման պատճառ։

Նրա խոսքով՝ շաքարային դիաբետի զարգացմանը նպաստող հիմնական գործոններն են ավելորդ քաշը, ֆիզիկական ակտիվության պակասն ու ժառանգական նախատրամադրվածությունը։ Մասնագետն ընդգծում է, որ այս վտանգավոր հիվանդությունից պաշտպանվելու համար հարկավոր է անպայման պարբերաբար մարզվել։ Ընդ որում՝ բավական կլինի անգամ շաբաթական ընդամենը 2,5 ժամ ոչ շատ ինտենսիվ ֆիզիկական ակտիվությունը։ Օրինակ՝ կարելի է հրաժարվել մեքենայից և պարզապես զբոսնել մաքուր օդին։

Բժիշկը նաև նախազգուշացնում է, որ շաքարային դիաբետի զարգացման հավանականությունը բարձրացնող ռիսկային գործոնների շարքին են դասվում խոլեստերինի բարձր մակարդակն ու զարկերակային գերճնշումը, ուստի այս ցուցանիշները ևս հարկավոր է պահել վերահսկողության տակ։