Հինգ տարածված մթերք, որոնց գործածությունը զարկերակային գերճնշման դեպքում կարող է վտանգավոր լինել

Զարկերակային գերճնշումն ամենատարածված ու վտանգավոր հիվանդություններից է, որի դեմ պայքարում են միլիոնավոր մարդիկ։ Ընդ որում՝ վերջին շրջանում նկատվում է հիվանդության «երիտասարդացման» միտում, քանի որ այն ավելի ու ավելի հաճախ է ախտորոշվում երիտասարդների մոտ։ Այս հիվանդության դեպքում սննդակարգին հետևելը շատ կարևոր է, քանի որ կան սննդամթերքի տեսակներ, որոնք օգնում են կարգավորել ճնշումը, սակայն կան նաև այնպիսինները, որոնք կարող են շատ վտանգավոր լինել ու հանգեցնել արյան ճնշման բարձրացման։

Մասնագետները ներկայացրել են հինգ տարածված մթերք, որոնք շատ վնասակար են զարկերակային գերճնշման դեպքում։ Նման մթերքը խորհուրդ է տրվում խիստ սահմանափակել կամ առհասարակ հրաժարվել դրանից։

Աղ

Աղի չարաշահումը հանգեցնում է արյան մեջ նատրիումի մակարդակի բարձրացման և խանգարում է աղի ու ջրի բալանսը, ինչի հետևանքով երիկամները չեն կարողանում ինչպես հարկն է դուրս բերեն ավելորդ ջուրն օրգանիզմից։ Ի վերջո օրգանիզմում մեծ քանակությամբ ջրի կուտակումն ու արյունատար անթոների վրա գործադրվող ծանրաբեռնվածությունը հանգեցնում են զարկերակային ճնշման բարձրացման։ Սա է պատճառը, որ զարգերակային գերճնշումով հիվանդներին մասնագետներն առաջին հերթին խորհուրդ են տալիս սահմանափակել աղը։

Վերամշակում անցած սննդամթերք ու մսամթերք

Նման մթերքը հարուստ է նատրիումով, որն էլ, ինչպես արդեն նշվել է, նպաստում է արյան ճնշման բարձրացմանը։ Զարկերակային ճնշման հետ կապված խնդիրների առկայության դեպքում հարկավոր է հնարավորինս սահմանափակել ինտենսիվ վերամշակման ենթարկված սննդամթերքի գործածությունը, քանի որ մեծ քանակությամբ օգտագործելու դեպքում այն կարող է վտանգավոր լինել։

Պահածոյացված մթերք

Զարկերակային գերճնշման դեպքում շատ վատնագավոր է նաև պահածոյացված մթերքը, ուստի այն հարկավոր է օգտագործել խիստ հազվադեպ և միայն բացառության կարգով։ Պահածոները պարունակում են մեծ քանակությամբ աղ, որը երկարացնում է մթերքի պիտանելիության ժամկետն ու օգնում է պահպանել այն հնարավորինս երկար, սակայն դրա հետևանքով մթերքը դառնում է շատ վնասակար։

Շաքար

Շաքարի գործածությունը բարձրացնում է զարկերակային գերճնշման զարգացման հավանականությունը, նպաստում է քաշի ավելացմանն ու հանգեցնում օրգանիզմում տարբեր խանգարումների զարգացման։ Ամերիկյան սրտաբանական ընկերակցության տվյալներով՝ տղամարդիկ ու կանայք պետք է սահմանափակեն շաքարի գործածությունը՝ օրական օգտագործելով առավելագույնը 9 և 6 թեյի գդալ համապատասխանաբար։ Այդ չափաբաժինը գերազանցելը վտանգավոր է սրտամկանի համար, ուստի հարկավոր է հնարավորինս խուսափել այս մթերքից։

Ալկոհոլ

Բոլորն էլ գիտեն, որ ալկոհոլը բացասաբար է անդրադառնում լյարդի վրա, սակայն քչերին է հայտնի, որ այն նպաստում է նաև զարկերակային ճնշման բարձրացմանը։ Հետազոտությունները ցույց են տվել, որ պարբերաբար ալկոհոլ օգտագործելը հանգեցնում է զարկերակային գերճնշման զարգացմանն ու սրտամկանի առողջական վիճակի վատթարացմանը։ Մասնագետների խոսքով՝ ալկոհոլի գործածության հիմնական խնդիրներից մեկն այն է, որ մարդիկ հազվադեպ են այն չափավոր օգտագործում, ինչը հանգեցնում է մի շարք առողջական խնդիրների զարգացման։

Նյութի աղբյուրը՝ Times Now