Մասնագետները ներկայացրել են՝ որոնք են բարակ աղիքի քաղցկեղի մասին հուշող հիմնական ախտանշանները 

Քաղցկեղն ամենավտանգավոր հիվանդություններից մեկն է, որը կարող է ախտահարել մարմնի ցանկացած օրգանն ու հյուսվածքը։ Այս հիվանդության բարեհաջող բուժման համար հարկավոր է հնարավորինս շուտ այն հայտնաբերել ու միջոցներ ձեռնարկել, սակայն խնդիրն այն է, որ կան քաղցկեղի որոշ տեսակներ, որոնք ախտորոշելն այդքան էլ հեշտ չի լինում։ Նման դժվար ախտորոշվող քաղցկեղի տեսակներից մեկը բարակ աղիքի քաղցկեղն է։ Յուրահատուկ տեղակայման պատճառով բարակ աղիքում առաջացած ուռուցքները նկատելը բավական դժվար է լինում, սակայն հիվանդությունը կարող է դրսևորվել որոշակի ախտանշաններով, որոնք էլ թույլ կտան հայտնաբերել այն հնարվորինս շուտ։ 

ԱՄՆ-ի Օնկոլոգիայի ազգային ինստիտուտի մասնագետների խոսքով` սովորաբար կոլոռեկտալ քաղցկեղի մասին խոսելիս բժիշկները նկատի են ունենում հաստ աղիքում կամ ուղիղ աղիքում առաջացած ուռուցքները, մինչդեռ բարակ աղիքի քաղցկեղն ավել հազվադեպ է ախտորոշվում և դրա ախտանշանները տարբերվում են մյուսների ախտանշաններից։

Ինչպես բացատրում են բժիշկները, բարակ աղիքը մարսողական համակարգի մասն է կազմում և նույնպես մասնակցում է սննդի յուրացման ու անպետք բաղադրիչների դուրսբերման գործընթացներին։ Սա երկար խողովակ է, որը միացնում է ստամոքսը հաստ աղիքին։ Այս օրգանում հայտնաբերվող ուռուցքները սովորաբար լինում են սարկոմաներ, ադենոմակարցինոմաներ, լիմֆոմաներ, կարցինոիդ ուռուցքներ և աղեստամոքսային ստրոմալ ուռուցքներ։ Որոշ դեպքերում այս հիվանդությունը չի առաջացնում ինքնազգացողության ակնհայտ փոփոխություններ, սակայն որոշ ախտանշաններ այնուամենայնիվ կարող են ի հայտ գալ։

Բժիշկները ներկայացրել են այն ախտանշանները, որոնցով կարող է դրսևորվել բարակ աղիքի քաղցկեղը։ Այս վտանգավոր հիվանդության մասին կարող են հուշել.

• կղանքի մեջ արյան առկայությունը,
• սև կամ մուգ գույնի կղանքը,
• փորլուծությունը,
• որովայնում օտար մարմնի առաջացման զգացողությունը,
• որովայնի ցավերն ու սպազմները,
• քաշի անբացատրելի կորուստը։        

Ինչպես նախազգուշացնում են բժիշկները, բարակ աղիքի քաղցկեղի մասին հուշող ամենատարածված ախտանշանը որովայնի ցավերն են, որոնք ուղեկցվում են սրտխառնոցով ու փսխումով, ուստի նման տհաճ ախտանշանի առկայությունը ոչ մի դեպքում չի կարելի անուշադրության մատնել։

Միևնույն ժամանակ մասնագետները նախազգուշացնում են, որ նշված ախտանշանները ոչ միշտ են պայմանավորված լինում բարակ աղիքի քաղցկեղով, ուստի խուճապի մատնվելու կարիք չկա, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել բժշկի հետ և բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ medikforum.ru