Բերանի խոռոչի տհաճ հոտ, ականջների ցավ և այլն. որոնք են լեզվի քաղցկեղի մասին հուշող հիմնական ախտանշանները

Լեզվի քաղցկեղն ամենավտանգավոր հիվանդություններից մեկն է, որը ժամանակին չհայտնաբերելու և բուժումը չսկսելու դեպքում կարող է դառնալ մահվան պատճառ։ Սա այն հիվանդություններից է, որոնց վաղ ախտորոշումը զգալիորեն բարձրացնում է բարեհաջող բուժման հավանականությունը, ուստի հիվանդության մասին հուշող ախտանշաններն իմանալը շատ կարևոր է։

Մասնագետներն առանձնացնում են քաղցկեղի մի քանի տեսակ, որոնք ախտահարում են լեզուն։ Դրանց շարքին են դասվում լեզվի առջևի հատվածի ախտահարումը, որը կոչվում է բերանի խոռոչի քաղցկեղ և լեզվի հիմնային հատվածի ախտահարումը կամ քիթըմպանի քաղցկեղը։ Ընդ որում՝ եթե առաջինի դեպքում քաղցկեղը կարելի է տեսնել անզեն աչքով, ապա երկրորդի դեպքում խնդիրն ախտորոշելն ավելի դժվար է լինում, քանի որ հիվանդությունն ուղեկցվում է մի քանի ախտանշանով, որոնք շատ հաճախ մարդիկ չեն նկատում կամ վերագրում են այլ խնդիրներին։

Ամերիկացի մասնագետների խոսքով՝ լեզվի հիմնային հատվածի ուռուցքները զարգացման վաղ փուլերում նկատելը հեշտ չէ, ինչի հետևանքով էլ դրանք շատ հաճախ ախտորոշվում են այն ժամանակ, երբ արդեն բավական մեծացած են լինում։ Այս հիվանդության դեպքում միակ ակնհայտ վաղ ախտանշանը լինում է ականջների ցավը, ուստի այն ոչ մի դեպքում չի կարելի անուշադրության մատնել։

Ականջների ցավից բացի այս հիվանդության մասին կարող է հուշել նաև բերանի խոռոչի տհաճ հոտը։ Ուռուցքաբանների խոսքով՝ այս հոտը տարբերվում է վաղ առավոտյան հաճախ նկատվող տհաճ հոտից, քանի որ այս դեպքում խնդրից չի հաջողվում ազատվել անգամ ատամները լվանալուց հետո։ Սա պայմանավորված է լինում նրանով, որ ախտահարման օջախում են հայտնվում բակտերիաներ, որոնք հիվանդության զարգացման հետ մեկտեղ շարունակում են ակտիվ բազմանալ՝ դառնալով տհաճ հոտի պատճառ։

Այնուամենայնիվ մասնագետները նախազգուշացնում են, որ ականջների ցավն ու բերանի խոռոչի տհաճ հոտը լեզվի քաղցկեղի մասին հուշող միակ ախտանշանները չեն և հարկավոր է շատ ուշադիր լինել։ Այս հիվանդության դեպքում հաճախ են նկատվում նաև այնպիսի ախտանշաններ, ինչպիսին են.

• չապաքինվող վերքերը բերանի խոռոչում կամ շուրթերին,
• կարմիր կամ սպիտակ բիծը լնդերին, նշագեղձերին կամ բերանի խոռոչի լորձաթաղանթին,
• այտին, շուրթին, կոկորդում կամ բերանի խոռոչում պնդացումների առկայության զգացողությունը,
• ձայնի փոփոխությունը կամ խռպոտությունը,
• ցավը բերանի խոռոչում կամ կոկորդում։

Միևնույն ժամանակ մասնագետներն ընդգծում են, որ նշված ախտանշանները ոչ միշտ են պայմանավորված լինում լեզվի քաղցկեղով, ուստի խուճապի մատնվելու կարիք չկա, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել բժշկի հետ և բուժզննում անցնել խնդրի պատճառը պարզելու և անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ medikforum.ru