Արտասովոր ախտանշաններ, որոնք կարող են պայմանավորված լինել զարկերակների խցանմամբ ու սրտամկանի հիվանդություններով

13:38 • 11.07.20

Անոթների խցանումներն ու սրտի հիվանդությունները շատ վտանգավոր խնդիր են, որոնք կարող են լուրջ հետևանքներ ունենալ ժամանակին միջոցներ չձեռնարկելու դեպքում։ Նման խնդիրները ժամանակին նկատելու համար հարկավոր է չանտեսել խանգարման մասին նախազգուշացնող ախտանշանները, սակայն խնդիրն այն է, որ այդ ախտանշանները երբեմն բավական արտասովոր են լինում, ուստի մարդիկ ոչ միշտ են դրանք ասոցացնում սրտանոթային հիվանդությունների հետ։

Ձեր ուշադրությանն ենք ներկայացնում այն արտասովոր ախտանշանները, որոնք կարող են պայմանավորված լինել անոթների խցանումներով։

Էրեկտիլ դիսֆունկցիա

Տղամարդկանց օրգանիզմը միշտ նախազգուշացնում է սրտի իշեմիկ հիվանդության զարգացման մասին։ Էրեկցիայի հետ կապված խնդիրները կարող են հուշել փոքր կոնքի անոթների խցանման մասին, ինչն ի հայտ է գալիս մինչ սրտամկանի ինֆարկտը։ Մասնագետները նախազգուշացնում են, որ էրեկտիլ դիսֆունկցիայի ի հայտ գալու և սրտի իշեմիկ հիվանդության զարգացման միջև միջինում անցնում է 3-5 տարի, ուստի հարկավոր է զգոն լինել։

Ճաղատացում

Շուրջ 37 000 տղամարդու մասնակցությամբ հետազոտությունը ցույց է տվել, որ կտրուկ ճաղատացումը կարող է նախազգուշացնել սրտի իշեմիկ հիվանդության մասին։ Չափավոր կամ զգալի մազաթափությունը կապված է սրտի հիվանդությունների հետևանքով մահվան հավանականության կրկնապատկման հետ։ Ընդ որում՝ այս կապը նկատվում է ինչպես տղամարդկանց, այնպես էլ կանանց մոտ։

Ականջի վրա առաջացած ծալք

Նման ծալքը միայն ծերացման նշան չէ, այլև սրտի հիվանդությունների մասին նախազգուշացնող ախտանշան։ Լսողական անցուղուց դեպի ականջաբլթակի ստորին եզրը ձգվող ծալքը կարող է պայմանավորված լինել արյան շրջանառության խանգարմամբ կամ սրտամկանը սնուցող զարկերակների՝ խոլեստերինային վահանիկներով խցանմամբ։

Սրունքի ցավեր քայլելու ընթացքում

Աթերոսկլերոզի դեպքում ոտքերի զարկերակները կարող են խցանվել դեռ մինչ սրտի իշեմիկ հիվանդության ախտորոշումը։ Այս արտասովոր ախտանշանի դեպքում հարկավոր է անհապաղ դիմել բժշկին ու բուժզննում անցնել։ Հարկ է հիշել, որ սրտի այս հիվանդության վաղ ախտորոշումը շատ կարևոր է, քանի որ կան բուժման բազմաթիվ միջոցներ, որոնք կօգնեն հեշտությամբ ազատվել խնդրից։ Ընդ որում՝ բուժումը կարելի է իրականացնել ինչպես հատուկ սննդակարգի, այնպես էլ դեղամիջոցների օգնությամբ։

Ծնոտի կարծրություն ու տհաճ զգացողություններ

Հարվարդի համալսարանի բժշկական դպրոցի գիտնականների տվյալներով՝ ծնոտի ու պարանոցի հատվածում առաջացող տհաճ զգացողությունները ստենոկարդիայի (կրծքային հեղձուկ) հիմնական ախտանշաններն են, որոնք ի հայտ են գալիս արյան շրջանառության վատթարացման պատճառով։ Նման տհաճ զգացողություններ են առաջացնում այն ազդանշանները, որոնք փոխանցում է սրտամկանը։ Այս ազդանշանները փոխանցում է թափառող նյարդը, որը մշտական կապի մեջ է պարանոցի ու ծնոտի հետ։

Գոտկատեղի ցավեր

Մեջքի ստորին հատվածը հաճախ լինում է մարմնի այն հատվածներից մեկը, որն առաջինն է արձագանքում աթերոսկլերոզին։ Սա պայմանավորված է լինում նրանով, որ անոթների խցանման հետևանքով արյան հոսքը նվազում է, ինչն էլ թուլացնում է միջողային սկավառակներն ու դառնում ցավոտ զգացողությունների պատճառ։

Նյութի աղբյուրը՝ medikforum.ru