Լավագույն բնական միջոցները մեջքի ցավը մեղմելու համար. հինգ բաղադրատոմս

Մեջքի ցավերը բավական տարածված խնդիր են, որոնց առաջացման պատճառները կարող են տարբեր լինել։ Դրանք կարող են պայմանավորված լինել նյարդի բորբոքմամբ, միջանցիկ քամիների վնասակար ազդեցությամբ, գերծանրաբեռնվածությամբ և այլ պատճառներով, սակայն անկախ առաջացման պատճառից հարկավոր է անհապաղ միջոցներ ձեռնարկել ցավը մեղմելու համար։

Նման տհաճ խնդրից ազատվելու համար մարդիկ սովորաբար հատուկ քսուքներ են կիրառում, սակայն լինում են դեպքեր, երբ նման դեղամիջոցներ տվյալ պահին չեն լինում, ուստի օգնության են հասնում ոչ պակաս արդյունավետ բնական դեղամիջոցները։ Ավելին՝ շատ հաճախ իրենց քիմիական բաղադրության պատճառով դեղամիջոցներն առաջացնում են տարատեսակ կողմնակի բարդություններ ու ալերգիկ ռեակցիաներ, մինչդեռ ժողովրդական միջոցները պատրաստվում են բացառապես բնական բաղադրիչներից, ուստի չեն առաջացնում կողմնակի խնդիրներ և որևէ բաղադրիչի նկատմամբ անհատական անհանդուրժողականության բացակայության դեպքում չեն ունենում նաև հակացուցումներ։

Aif.ru կայքը ներկայացրել է մեջքի ցավերի դեմ պայքարի մի քանի պարզ ու արդյունավետ միջոց, որոնք կօգնեն հեշտությամբ մեղմել ցավն առանց դեղորայքի։

• Խաշած կարտոֆիլը տրորել ու խյուս դարձնել, այնուհետև ստացված խյուսին ավելացնել մի փոքր մեղր (1 կարտոֆիլին մոտ 1 ճաշի գդալ), լավ խառնել ու գոլ վիճակում քսել ցավոտ հատվածին։ Այս կոմպրեսը հարկավոր է թողնել մինչև կարտոֆիլը սառչի։
• Կես բաժակ քերիչով մանրացրած հում կարտոֆիլին ավելացնել 2 ճաշի գդալ քացախ (9%-անոց), ստացված խառնուրդը դնել ցավոտ հատվածին ու թողնել կոմպրեսը կես ժամ։
• 3 ճաշի գդալ չորացրած սրոհունդին ավելացնել 1 լիտր եռման ջուր, կես ժամ թրմել թերմոսի մեջ, այնուհետև քամել։ Մաքուր թանզիֆը թրջել գոլ թուրմով և օգտագործել ցավոտ հատվածին կոմպրես դնելու համար։
• Կես կիլոգրամ սոճու երիտասարդ ճյուղերին ավելացնել 3 լիտր ջուր ու մոտ 10 րոպե եռացնել, այնուհետև քամել ու թողնել մի փոքր սառչի։ Ստացված հեղուկն ավելացնել լոգանքի ջրին և 10-15 րոպե հանգստացնող լոգանք ընդունել։
• Թանզիֆե փոքրիկ պարկի մեջ լցնել 2 ճաշի գդալ մանանեխի փոշի,  կախել պարկը ծորակից, որից հոսում է տաք ջուրը, այնուհետև լցնել լոգնոցը տաք ջրով և 10 րոպե լոգանք ընդունել։

Այս բնական միջոցները շատ արդյունավետ են ու հասանելի, սակայն հարկ է հիշել, որ առողջական լուրջ խնդիրների և ուժեղ ցավերի դեպքում հարկավոր է անպայման դիմել մասնագետին, քանի որ ինքնաբուժությունը կարող է խիստ վնասակար լինել ու էլ ավելի վատթարացնել հիվանդի վիճակը: Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ: