Մասնագետը ներկայացրել է, թե ինչ ախտանշաններով են դրսևորվում լյարդի հիվանդությունները

Բոլորն էլ գիտեն, որ լյարդը մարդու կարևորագույն օրգաններից մեկն է, ուստի դրա աշխատանքի խանգարումը բացասաբար է անդրադառնում ամբողջ օրգանիզմի վրա։ Լուրջ խնդիրներից խուսափելու համար այս օրգանի հիվանդությունները հարկավոր է հնարավորինս շուտ նկատել ու սկսել բուժումը, սակայն խնդիրն այն է, որ դրանք բավական դժվար են ախտորոշվում և հաճախ հայտնաբերվում են միայն զարգացման ուշ փուլերում, քանի որ մարդիկ հազվադեպ են նկատում օրգանի ախտահարումների մասին հուշող ախտանշանները կամ վերագրում են դրանք այլ խնդիրներին։

Այնուամենայնիվ առողջական ցանկացած խնդրի դեպքում օրգանիզմը միշտ նախազգուշացնում է դրա մասին որոշակի ախտանշանների միջոցով, և լյարդի հիվանդությունները ևս բացառություն չեն։ Այդ ախտանշաններն իմանալը կօգնի ժամանակին նկատել խանգարումն ու միջոցներ ձեռնարկել դրանցից հնարավորինս շուտ ազատվելու համար։

Բժիշկ-թերապևտ Վիկտոր Լիշինը «Вечерняя Москва»-ի հետ զրույցում ներկայացրել է այն հիմնական ախտանշանները, որոնք հուշում են լյարդի հիվանդությունների մասին։ Մասնագետի խոսքով՝ լյարդի հյուսվածքները չունեն ցավային ընկալիչներ, ուստի այս օրգանի ախտահարումները չեն դրսևորվում ցավոտ զգացողություններով։ Այն, ինչը մարդիկ համարում են լյարդի ցավ, սովորաբար լինում են տհաճ զգացողությունները լեղապարկում, ուստի այս կերպ լյարդի հիվանդություններն ախտորոշել չի հաջողվի։

Այնուամենայնիվ գոյություն ունեն որոշակի ախտանշաններ, որոնք հուշում են լյարդի հետ կապված խնդիրների մասին, ուստի հարկավոր է շատ զգոն լինել ու չանտեսել դրանք։ Օրինակ՝ նման ախտանշանների շարքին են դասվում ստամոքսի այրոցն ու բերանում դառը համի առկայությունը, ուստի նման խնդիրների հաճախակի կրկնության դեպքում հարկավոր է բուժզննում անցնել։ Բացի այդ, կենսական նշանակութուն ունեցող այս օրգանի ախտահարումներին բնորոշ է նաև կղանքի բաց գույնը, փորափքանքն ու գազերի կուտակում, մինչդեռ մարդիկ հազվադեպ են ուշադրություն դարձնում նման խնդիրներին։

Լյարդի հիվանդությունները կարող են դրսևորվել նաև մաշկի չորությամբ, քորով ու գույնի փոփոխությամբ։ Բացի այդ, չի կարելի անուշադրության մատնել նաև ընդհանուր հոգնածությունը, թուլությունն ու աշխատունակության անկումը, քանի որ նման խնդիրները ևս կարող են պայմանավորված լինել լյարդի հիվանդություններով։

Այնուամենայնիվ լյարդի հիվանդություններից խուսափելն ու անգամ դրանցից ազատվելն այդքան էլ բարդ չէ։ Բժշկի խոսքով՝ կրիտիկական ու անդառնալի վնասվածքների բացակայության դեպքում լյարդի առողջացման համար բավական կլինի պարզապես առողջ կենսակերպ վարելը, քանի որ այս օրգանը կարող է ինքնուրույն վերականգնվել ու թարմանալ։ Ինչպես նշում է մասնագետը ճիշտ սնվելու և ալկոհոլից ու ծխախոտից հրաժարվելու դեպքում հնարավոր կլինի երկար տարիներ պահպանել լյարդի առողջությունն առանց մեծ ջանքեր գործադրելու։