Հինգ պարզ քայլ, որոնք կօգնեն կանխել զարկերակային գերճնշման զարգացումը

Զարկերակային գերճնշումը ներկայում ամենատարածված ու վտանգավոր հիվանդություններից մեկն է։ Սա սրտանոթային համակարգի քրոնիկ հիվանդություն է, որի դեմ ժամանակին միջոցներ չձեռնարկելը կարող է շատ լուրջ խնդիրներ առաջացնել և անգամ հանգեցնել մահվան։ Բուժման բացակայության դեպքում զարկերակային բարձր ճնշումը կարող է դառնալ այնպիսի վտանգավոր խանգարումների պատճառ, ինչպիսին են իշեմիկ անբավարարությունը, սրտամկանի ինֆարկտն ու գլխուղեղի կաթվածը, ուստի այս խանգարման կանխարգելումն ու ճիշտ բուժումը շատ կարևոր է։

Մարդիկ հազվադեպ են միջոցներ ձեռնարկում այս հիվանդության զարգացման կանխարգելման համար, ինչի հետևանքով էլ այն բավական լուրջ հետևանքներ է ունենում, սական  մասնագետները վստահ են, որ զարկերակային գերճնշման զարգացումից խուսափելու համար մեծ ջանքեր գործադրելու կարիք չկա, քանի որ ամենաչնչին փոփոխություններն անգամ կարող են շատ արդյունավետ լինել։ Ձեր ուշադրությանն ենք ներկայացնում մի քանի պարզ քայլ, որոնք կօգնեն կանխել զարկերակային գերճնշման զարգացումը։

Պարբերաբար մարզվել

Ֆիզիկական ակտիվությունը նվազեցնում է զարկերակային գերճնշման զարգացման հավանականությունը, ուստի պարբերաբար մարզվելը շատ կարևոր է։ Առհասարակ ֆիզիկական ակտիվությունը համարվում է զարգերակային գերճնշման կանխարգելման լավագույն միջոցն անգամ աղտոտված օդով շրջաններում։ Չափավոր ֆիզիկական ակտիվությունը նվազեցնում է զարկերակային գերճնշման զարգացման հավանականությունը 4%-ով, իսկ բարձր ինտենսիվություն ունեցող ֆիզիկական ակտիվությունը՝ 13-15%-ով։

Հրաժարվել ալկոհոլից

Շատերին է հայտնի, են ալկոհոլը լայնացնում է անոթները, սակայն ոչ բոլորը գիտեն, որ նման ազդեցությունը պահպանվում է շատ կարճ ժամանակ, որից հետո անոթները նեղանում են, ինչը դժվարացնում է արյան հոսքն ու բարձրացնում զարկերակային ճնշումը։ Ալկոհոլի չարաշահման դեպքում զարկերակային գերճնշման զարգացման հավանականությունը բարձրանում է մի քանի անգամ, ուստի նման խնդրից խուսափելու համար մասնագետները խորհուրդ են տալիս նվազագույնի հասցնել ոգելից խմիչքների գործածությունը։

Մեդիտացիա անել ու յոգայով զբաղվել

Քրոնիկ սթրեսը կործանարար ազդեցություն է ունենում առողջության վրա ու հանգեցնում է սրտանոթային հիվանդությունների, ուռուցքների, շաքարային դիաբետի և մի շարք այլ հիվանդությունների զարգացման, ուստի այս խնդրից հարկավոր է անպայման ազատվել։ Սթրեսի մակարդակը նվազեցնելու շատ արդյունավետ միջոց կարող են լինել մեդիտացիաներն ու յոգան։

Ճիշտ սնվել

Սննդակարգը կարգավորելը զարկերակային գերճնշման կանխարգելման ամենապարզ ու արդյունավետ միջոցներից մեկն է։ Մասնագետները խորհուրդ են տալիս հնարավորինս սահմանափակել վերամշակում անցած մսամթերքի ու կարմիր մսի գործածությունը, ինչպես նաև հրաժարվել մարինացված ու թթու մթերքից, քանի որ սննդակարգում մեծ քանակությամբ աղի գործածությունը հանգեցնում է զարկերակային ճնշման տատանումների։

Հրաժարվել ծխախոտից

Ծխախոտի չարաշահումը ևս մի վատ սովորություն է, որը նպաստում է զարկերակային ճնշման բարձրացմանը, սակայն այս սովորությունից հրաժարվելու և քունը կարգավորելու դեպքում կարելի է հեշտությամբ կանխել նման վտանգավոր խնդրի զարգացումը։

Նյութի աղբյուրը` The Health Site