Վեց մթերք, որոնք բարձրացնում են կրծքագեղձի քաղցկեղի զարգացման հավանականությունը

Կրծքագեղձի քաղցկեղը կանանց շրջանում այս հիվանդության ամենատարածված տեսակներից մեկն է, որի հետևանքով տարեկան տասնյակ հազարավոր կանայք են մահանում։ Սա այն հիվանդություններից է, որոնց կանխարգելումն ու բուժումը զարգացման վաղ փուլերում շատ ավելի հեշտ է, քան հետագայում դրա պատճառով առաջացած մի շարք բարդությունների դեմ պայքարելը, ուստի հարկավոր է անել հնարավոր ամեն բան խնդրի զարգացումից խուսափելու համար։

Քաղցկեղի այս տեսակի զարգացման հավանականությունը նվազեցնելու համար հարկավոր է առաջին հերթին խուսափել դրա զարգացմանը նպաստող ռիսկային գործոններից։ Այս գործոններից մեկը կարող է լինել սննդակարգը, քանի որ գոյություն ունեն սննդամթերքի տեսակներ, որոնք բարձրացնում են կրծքագեղձի քաղցկեղի զարգացման հավանականությունը։ Ձեր ուշադրությանն ենք ներկայացնում նման վեց մթերք, որոնցից մասնագետները խորհուրդ են տալիս հնարավորինս խուսափել։

Ալկոհոլ

Ալկոհոլային ըմպելիքների չարաշահումը բարձրացնում է էստրոգեն հորմոնի և հորմոններով պայմանավորված կրծքագեղձի քաղցկեղի զարգացման հետ կապված այլ քիմիական տարրերի մակարդակը։ Բացի այդ, ալկոհոլը կարող է վնասել բջիջներում պարունակվող ԴՆԹ-ն, ինչը բարձրացնում է քաղցկեղի զարգացման հավանականությունը։

Արագ սնունդ

Մեծ քանակությամբ արագ սննդի գործածությունը հանգեցնում է քաշի ավելացման ու ճարպակալման, ինչը համարվում է կրծքագեղձի քաղցկեղի զարգացմանը նպաստող հիմնական ռիսկային գործոններից մեկը։ Բացի այդ, բարձր յուղայնություն ունեցող մթերքը կապված է նաև սրտի հիվանդությունների ու շաքարային դիաբետի զարգացման բարձր հավանականության հետ։

Տապակած մթերք

Տապակած ուտեստներով հարուստ սննդակարգը բարձրացնում է կրծքագեղձի քաղցկեղի զարգացման հավանականությունը։ Իրանում 620 կնոջ մասնակցությամբ անցկացված հետազոտությունը ցույց է տվել, որ տապակած մթերքի գործածությունը կրծքագեղձի քաղցկեղի զարգացմանը նպաստող հիմնական գործոնն է։ Ավելին՝ 2002 թվականին անցկացված հետազոտությունը ևս ցույց է տվել, որ տապակած կարմիր մսի գործածությունը կապված է կրծքագեղձի քաղցկեղի զարգացման բարձր հավանականության հետ։

Վերամշակում անցած միս

Հարվարդի համալսարանի գիտնականները պարզել են, որ վերամշակում անցած մսի գործածությունը նույնպես կարող է հանգեցնել նման վտանգավոր հիվանդության զարգացման։ Սա է պատճառը, որ մասնագետները հորդորում են հազվադեպ ուտել երշիկեղեն, նրբերշիկ, խոզապուխտ կամ նմանատիպ այլ մթերք։

Հավելյալ շաքար

Ավելորդ շաքարի գործածությունը հանգեցնում է քաշի ավելացման ու ճարպակալման, ինչն էլ բարձրացնում տարատեսակ ուռուցքների, այդ թվում նաև կրծքագեղձի քաղցկեղի զարգացման հավանականությունը։ Նման խնդիրներից խուսափելու համար հարկավոր է նվազեցնել օրվա ընթացքում օգտագործվող շաքարի քանակությունն ու հնարավորինս սահմանափակել տարատեսակ հյութերի, գազավորված ըմպելիքների, քաղցրավենիքի և մեծ քանակությամբ շաքար պարունակող այլ մթերքի գործածությունը։

Ռաֆինացված ածխաջրեր

Մեծ քանակությամբ ածխաջրերի գործածությունը հանգեցնում է արյան մեջ շաքարի մակարդակի կտրուկ բարձրացման, ինչն էլ բարձրացնում է տարատեսակ ուռուցքների, այդ թվում ստամոքսի քաղցկեղի, աղիների քաղցկեղի և կրծքագեղձի քաղցկեղի զարգացման հավանականությունը։ Նման խնդիրներից խուսափելու համար մասնագետները խորհուրդ են տալիս սահմանափակել սպիտակ հացի ու առհասարակ հացաբուլկեղենի գործածությունն ու հարստացնել սննդակարգն ամբողջական հացահատիկից պատրաստված մթերքով ու բանջարեղենով։

Նյութի աղբյուրը՝ The Health Site