Ինչ հիվանդություններով կարող է պայմանավորված լինել կրծքավանդակի ցավը

Կրծքավանդակի սուր ցավն այն ախտանշանն է, որը հնարավոր չէ անտեսել։ Սովորաբար նման ցավերի դեպքում մարդիկ անհապաղ դիմում են բժշկին, քանի որ շատերին է հայտնի, որ այն կարող է պայմանավորված լինել սրտամկանի ինֆարկտով, սակայն սա միակ հիվանդությունը չէ, որն ուղեկցվում է կրծքավանդակի հատվածի ցավով։ «Рамблер» պորտալը ներկայացրել է այն հիվանդությունները, որոնց մասին կարող է հուշել կրծքավանդակի ցավը։

Սրտանոթային համակարգի հիվանդություններ

Սրտանոթային հիվանդություններն առաջինն են, ինչը փորձում են հերքել բժիշկները, քանի որ նման խնդիրները կարող են շատ վատ հետևանքներ ունենալ։ Գոյություն ունեն սրտի տարբեր հիվանդություններ, որոնք կարող են դրսևորվել կրծքավանդակի ցավով, սակայն առավել հաճախ նման ախտանշանը հուշում է սրտի իշեմիկ հիվանդության տարբեր տեսակների մասին (ստենոկարդիա (կրծքային հեղձուկ), սրտամկանի ինֆարկտ, պերիկարդիտ)։ Նման դեպքերում ցավը լինում է ուժգին, այրող ու ճնշող։ Այն կրում է նոպայանման բնույթ և տևում է 2-15 րոպե։ Շատ հաճախ նման ցավերն ուղեկցվում են սրտի ռիթմի խանգարումներով ու զարկերակային ճնշման անկմամբ կամ բարձրացմամբ։

Թոքերի հիվանդություններ

Հաճախ կրծքավանդակի ցավը հուշում է շնչառական ու արյունատար համակարգերի հետ կապված խնդիրների մասին։ նման դեպքերում ցավը լինում է կայուն ու ինտենսիվ, իսկ երբեմն էլ ուղեկցվում է հազով ու խորխի մեջ նկատվող արյունով։ Եթե այս ամենի հետ մեկտեղ նկատվում է նաև զարկերակային ճնշման նվազում ու անոթազարկի ուժգնության թուլացում, ապա խնդիրն ամենայն հավանականությամբ պայմանավորված է ներքին արյունահոսությամբ, որի պատճառն աորտայի շերտավորումն է։

Աղեստամոքսային տրակտի հիվանդություններ

Մարսողական համակարգի ախտաբանությունները նույնպես կարող են դառնալ կրծքավանդակի ցավի պատճառ։ Նման հիվանդությունների շարքին են դասվում գաստրիտը, գաստրոէզոֆագեալ ռեֆլյուքս հիվանդությունը, ստամոքսի ու աղիների խոցային հիվանդությունը, լյարդի, լեղապարկի կամ ենթաստամոքսային գեղձի հիվանդությունները։ Որոշ դեպքերում ցավը կարող է պայմանավորված լինել կերակրափողի սպազմներով, ճաղվածքով կամ թափածակումով, սակայն սա հազվադեպ բնույթ է կրում։

Աղեստամոքսային տրակտի աշխատանքի խանգարումների հետ կապված ցավերը բավական արտասովոր բնույթ են կրում։ Որպես կանոն հիվանդներն այն նկարագրում են որպես այրոցի զգացում ու սնունդը կուլ տալու անկարողություն։ Ընդ որում՝ ցավը լինում է ոչ սուր։ Հաճախ տհաճ զգացողություններն ի հայտ են գալիս անմիջապես սնվելուց հետո։ Դրանք կարող են ուղեկցվել ստամոքսի այրոցով, գխտոցով, սնվելիս նկատվող տհաճ զգացողություններով, աղիների աշխատանքի խանգարումով, իսկ երբեմն էլ փսխումով։

Նյարդաբանական հիվանդություններ

Կրծքավանդակի ցավի հիմնական պատճառներից մեկը միջկողային նյարդացավն է։ Այս դեպքում ցավը լինում է սուր ու այրող և կարող է դառնալ որոշ շարժումների կաշկանդվածության պատճառ։ Այն կարող է ուժգնանալ երկար ժամանակ չշարժվելու, գերսառեցման, ինչպես նաև փռշտոցի, հազի և այլ ֆիզիկական գրգռման դեպքում։ Այս դեպքում ցավոտ զգացողությունները հաճախ տարածվում են ուսի, ձեռքի, պարանոցի ու գլխի հատվածում։

Վնասվածքներ

Կրծքավանդակի ցավի պատճառ կարող են դառնալ նաև ողնաշարի տարբեր վնասվածքները։ Օրինակ՝ այն, ինչն անվանում են օստեոխոնդրոզ, իրականում ողնաշարի տարբեր հատվածների դեգեներատիվ-դիստրոֆիկ փոփոխություններն են, որոնք միշտ ուղեկցվում են ցավոտ զգացողություններով։ Ընդ որում՝ ցավոտ զգացողությունները կարող են ի հայտ գալ նաև կրծքավանդակի հատվածում։ Բացի այդ, ցավի պատճառ կարող են դառնալ նաև սկոլիոզը, կիֆոզը, միջողային սկավառակի ճողվածքը, ողերի կամ միջողային սկավառակների քայքայումները և այլն։ Նման խանգարումները սովորաբար հանգեցնում են բորբոքման օջախին մոտ գտնվող նյարդերի գրգռման, ինչն էլ առաջացնում է ցավոտ զգացողություններ։