Հինգ ախտանշան, որոնք նախազգուշացնում են սրտամկանի ինֆարկտի մասին

Սրտանոթային համակարգի հիվանդությունները համարվում են ամբողջ աշխարհում մարդկանց վաղաժամ մահվան հիմնական պատճառներից մեկը, սակայն դրանց մասին հուշող նախանշանները ժամանակին նկատելը թույլ կտա հնարավորինս շուտ միջոցներ ձեռնարկել լուրջ հետևանքներից խուսափելու համար։ Այս համակարգի առավել վտանգավոր հիվանդություններից մեկը սրտամկանի ինֆարկտն է, որը յուրաքանչյուր տարի հազարավոր մարդկանց մահվան պատճառ է դառնում, սակայն Ամերիկյան սրտաբանական ընկերակցության մասնագետները նշում են, որ օրգանիզմը միշտ նախազգուշացնում է այս հիվանդության զարգացման բարձր հավանականության մասին, ուստի բավական զգոն լինելու դեպքում կարելի է ժամանակին միջոցներ ձեռնարկել այն կանխելու համար

Մասնագետները հորդորում են ուշադրություն դարձնել որոշակի ախտանշաններին, որոնք կարող են սրտի նոպայի մասին նախազգուշացնող ազդանշան լինել։ Նրանց խոսքով՝ սրտամկանի այս հիվանդությունը զարգանում է բավական դանդաղ և սկզբնական շրջանում դրա մասին կարող են նախազգուշացնել միայն թույլ ցավերն ու տհաճ զգացողությունները, որոնք մարդիկ շատ հաճախ անուշադրության են մատնում կամ վերագրում են այլ խանգարումներին։ Փորձագետները նախազգուշացնում են, որ սրտամկանի ինֆարկտին միշտ նախորդում են օրգանիզմում տեղի ունեցող որոշակի փոփոխություններ, ուստի հարկավոր է շատ զգոն լինել ու չանտեսել դրանք։

Ձեր ուշադրությանն ենք ներկայացնում հինգ նախանշան, որոնք սովորաբար ի հայտ են գալիս սրտի նոպայից առաջ։ Այս նախանշաններն անուշադրության չմատնելը թույլ կտա ժամանակին միջոցներ ձեռնարկել ու կանխել առողջական լուրջ խնդիրները։ 

Տհաճ զգացողություններ կրծքավանդակում

Սրտի նոպայի ամենավաղ ախտանշաններից մեկը կրծքավանդակում նկատվող ցավն ու տհաճ զգացողություններն են։ Ցավը սովորաբար տեղակայված է լինում կրծքավանդակի կենտրոնական հատվածում և լինում է բավական տևական։ Որպես կանոն այն պահպանվում է առնվազն մի քանի րոպե։ Ինչ վերաբերում է տհաճ զգացողություններին, ապա դրանք նման են լինում սեղմվածության ու ճնշվածության զգացողության, որի դեպքում հնարավոր չի լինում անգամ լիաթոք շնչել։

Աստիճանաբար տարածվող ցավ

Սրտամկանի ինֆարկտի դեպքում ցավոտ զգացողությունները կարող են տարածվել նաև պարանոցի, ծնոտի կամ մեջքի հատվածում։ Նման տարածվող ցավը ոչ մի դեպքում չի կարելի անուշադրության մատնել, քանի որ այն կարող է շատ վտանգավոր լինել։

Գլխապտույտ

Սրտի նոպայի բարձր հավանականության մասին կարող է նախազգուշացնել նաև գլխապտույտը, որը շատ հաճախ ուղեկցվում է սրտխառնոցով։ Բացի այդ, այս դեպքում մարդը կարող է կորցնել հավասարակշռությունն ու պատվել սառը քրտինքով։

Ձեռքերի ցավ

Ձեռքի կամ ուսի հատվածում տարածվող ցավը սրտի նոպայի բարձր հավանականության մասին հուշող ամենավառ ախտանշանն է։ Որպես կանոն սրտի նոպայով պայմանավորված ցավը տարածվում է միայն ձախ ձեռքի հատվածում, սակայն որոշ դեպքերում այն կարող է ախտահարել նաև աջ ձեռքը։

Հևոց

Առանց որևէ ակնհայտ պատճառի նկատվող հևոցը ևս կարող է պայմանավորված լինել սրտի նոպայով, մինչդեռ շատերն այն պարզապես անուշադրության են մատնում։ Այս դեպքում հևոցը կարող է ուղեկցվել կրծքավանդակի հատվածի ցավով կամ լինել խնդրի մասին հուշող միակ ախտանշանը, ուստի այն ոչ մի դեպքում չի կարելի անտեսել։

Մասնագետները նախազգուշացնում են, որ սա չափազանց վտանգավոր ախտաբանություն է, ուստի վերոնշյալ ախտանշաններից անգամ մեկի առկայության դեպքում հարկավոր է անհապաղ շտապօգնություն կանչել։

Հիվանդության կանխարգելման համար Ամերիկյան սրտաբանական ընկերակցության մասնագետները խորհուրդ են տալիս առաջին հերթին հրաժարվել ծխախոտից ու առհասարակ խուսափել ծխախոտի ծխից, ինչպես նաև լինել ֆիզիկապես ակտիվ ու վերահսկողության տակ պահել զարկերակային ճնշումը, իսկ զարկերակային գերճնշման առկայության դեպքում հնարավորինս շուտ բուժել այն։

Նյութի աղբյուրը՝ Medikforum.ru