Աղիների քաղցկեղի մասին հուշող ախտանշաններ, որոնք ոչ մի դեպքում չի կարելի անուշադրության մատնել

Աղիների քաղցկեղը շատ վտանգավոր հիվանդություն է, որի բուժման արդյունավետությունը կախված է վաղ ախտորոշումից, քանի որ ժամանակին հիվանդությունը չախտորոշելու դեպքում բուժումը կարող է անարդյունավետ լինել։ Սա է պատճառը, որ մասնագետները հորդորում են զգոն լինել, պարբերաբար բուժզննում անցնել և անուշադրության չմատնել խնդրի մասին հուշող ախտանշանները, քանի որ միայն այդ դեպքում կհաջողվի հայտնաբերել հիվանդությունը զարգացման վաղ փուլերում և միջոցներ ձեռնարկել դրանից ազատվելու համար։ Սակայն խնդիրն այն է, որ աղիների քաղցկեղը կարող է դրսևորվել ոչ շատ ակնհայտ ախտանշաններով, ուստի շատերը դրանք անգամ չեն նկատում կամ վերագրում են այլ խնդիրներին և հիվանդությունն ախտորոշվում է չափազանց ուշ։ Նման խնդիրներից խուսափելու համար Ավստրալիայի Վիկտորիա նահանգի քաղցկեղի խորհրդի (Cancer Council Victoria) մասնագետները ներկայացրել են աղիների քաղցկեղի մասին հուշող այն ախտանշանները, որոնք ոչ մի դեպքում չի կարելի անուշադրության մատնել։

Առհասարակ աղիների քաղցկեղը հավաքական անվանում է, որը բնորոշում է քաղցկեղի բոլոր այն տեսակները, որոնք ախտահարում են հաստ աղիքի տարբեր հատվածները, իսկ երբեմն էլ ուղիղ աղիքը։ Այս հիվանդության զարգացման վաղ ախտանշանները կարող են աննկատ լինել, ինչը թույլ չի տալիս նկատել վտանգն ու ժամանակին քայլեր ձեռնարկել, սակայն հարկ է հիշել, որ միայն վաղ ախտորոշումն է թույլ տալիս բարձրացնել բարեհաջող բուժման հավանականությունը։

Մասնագետների խոսքով՝ այս հիվանդության մասին հուշող առաջին ախտանշանների շարքին են դասվում աղիների աշխատանքում նկատվող չնչին փոփոխությունները։ Օրինակ՝ հիվանդի մոտ կարող է սովորականից հաճախ նկատվել դեֆեկացիայի անհրաժեշտություն։

Աղիներկ քաղցկեղի մասին հուշող մյուս ախտանշանը կարող է լինել կղանքի փոփոխությունը։ Այն կարող է սովորականից քիչ քանակությամբ լինել կամ լինել ավելի թույլ։ Ուռուցքաբանների խոսքով՝ նման խանգարումները կարող են պայմանավորված լինել մասնակի փորկապությամբ, որն առաջանում է ուռուցքի պատճառով։

Մասնագետները նշում են, որ փորկապությունն ու կղանքի քիչ քանակությունը ոչ միշտ են պայմանավորված լինում քաղցկեղով։ Որոշ դեպքերում նման ախտանշանների պատճառ կարող է դառնալ սննդակարգում մանրաթելերի ու ջրի պակասը, սթրեսը կամ ֆիզիկական ակտիվության բացակայությունը, սակայն քաղցկեղի գործոնը ևս չի կարելի բացառել։ Չի կարելի մոռանալ, որ աղիների չարորակ նորագոյացությունը դրսևորվում է աղիների աշխատանքի այնպիսի փոփոխություններով, ինչպիսին են փորկապությունն ու փորլուծությունը, ինչպես նաև նորմայից շատ կամ քիչ դեֆեկացիան։

Բժիշկներն ընդգծում են, որ զարգացման վաղ փուլերում կոլոռեկտալ քաղցկեղը կարող է դրսևորվել անկարևոր ու անվտանգ թվացող ախտանշաններով, ուստի վտանգավոր հիվանդությունը ժամանակին նկատելու համար հարկավոր է շատ զգոն լինել։Վերոնշյալ ախտանշաններից բացի չի կարելի անուշադրության մատնել նաև քաշի անբացատրելի նվազումը, արտասովոր հոգնածության զգացումն ու կղանքի մեջ արյան հետքերի առկայությունը։ Ընդ որում՝ 90% դեպքերում հիվանդությունը զարգանում է 50 տարեկանից բարձր անձանց մոտ, ուստի տարիքային այս խմբին պատկանող մարդիկ պետք է առանձնահատուկ ուշադիր լինեն։

Միևնույն ժամանակ բժիշկները վստահ են, որ քաղցկեղի այս տեսակի զարգացման հավանականությունը կարելի է զգալիորեն նվազեցնել մի քանի պարզ կանոնին հետևելու դեպքում։ Հարկ է հիշել, որ այս հիվանդությունից խուսափելու համար հարկավոր է սահմանափակել ալկոհոլի գործածությունը, հրաժարվել ծխախոտից ու վերահսկողության տակ պահել կարմիր ու վերամշակում անցած մսից պատրաստված մթերքի գործածությունը։

Նյութի աղբյուրը՝ medikforum.ru