Որ ախտանշաններն են հուշում ենթաստամոքսային գեղձի բորբոքման մասին

Ենթաստամոքսային գեղձը մարդու ամենակարևոր օրգաններից մեկն է, որն արտադրում է նորմալ մարսողության համար անհրաժեշտ ֆերմենտներ ու հորմոններ։ Այս գեղձի հիվանդությունները բացասաբար են անդրադառնում ամբողջ օրգանիզմի վրա, ուստի դրանց առկայության դեպքում հարկավոր է անհապաղ միջոցներ ձեռնարկել։ 

Այս օրգանի ամենատարածված հիվանդություններից մեկը ենթաստամոքսային գեղձի բորբոքումն է, որն ուղեկցվում է օրգանում ի հայտ եկած բորբոքային գործընթացներով։ Սա բավական վտանգավոր ախտաբանություն է, որի դեպքում ժամանակին միջոցներ չձեռնարկելը կարող է անդառնալի հետևանքներ ունենալ ամբողջ օրգանիզմի համար։

Բժիշկ-գաստրոէներոլոգ Օլգա Եվդոկիմովայի խոսքով՝ ենթաստամոքսային գեղձի բորբոքումն ախտորոշելը բավական բարդ է օրգանի տեղակայման անատոմիական առանձնահատկությունների պատճառով։ Բանն այն է, որ ենթաստամոքսային գեղձը գտնվում է ողնաշարին մոտ, ինչն էլ դժվարացնում է դրա հետ կապված խնդիրների ախտորոշումը։ Սակայն մասնագետը նշում է, որ օրգանիզմը միշտ նախազգուշացնում է վտանգավոր ախտաբանության մասին որոշակի ախտանշանների միջոցով, ուստի դրանց ուշադրություն դարձնելը կօգնի ժամանակին միջոցներ ձեռնարկել։

Բժշկի խոսքով՝ անհապաղ բուժզննում անցնելու անհրաժեշտության մասին են խոսում այնպիսի տհաճ ախտանշանները, ինչպիսին են.

• էպիգաստրալ հատվածի սաստիկ ցավերը,
• սնվելուց հետո ի հայտ եկող ուժգին ցավը, որը հաճախ տարածվում է մեջքի հատվածում,
• ցավը, որը մեղմվում է քաղցած ժամանակ, ինչպես նաև մարմնի դիրքը փոխելու և կռանալու դեպքում։

«Գոտևորող ցավը, նորմայից շատ արտաթորանքն ու զուգարանակոնքի վրա հետքեր թողող կղանքը, ինչպես նաև փորափքանքն ու գազերի կուտակումը կարող են վկայել ենթաստամոքսային գեղձի չափազանց խորացած բորբոքման մասին», - նշում է մասնագետը։

Այս հիվանդության դեպքում գեղձի հյուսվածքները փաստացիորեն սկսում են մարսել իրենք իրենց, ինչը կարող է դառնալ ոչ միայն գեղձի վնասվածքների, այլև պանկրեանեկրոզի՝ ենթաստամոքսային գեղձի բջիջների մի մասի մեռուկի զարգացման։ Նման խնդիրների դեմ հարկավոր է ժամանակին միջոցներ ձեռնարկել, քանի որ որևէ այլ օրգան չի կարող կատարել ենթաստամոքսային գեղձի գործառույթները, իսկ դրա հիվանդությունները խիստ վտանգավոր են ամբողջ օրգանիզմի համար, իսկ որոշ դեպքերում կարող են վտանգավոր լինել անգամ կյանքի համար։

Ինչպես նշում է բժիշկը, ենթաստամոքսային գեղձի բորբոքման զարգացմանն են նպաստում լեղաքարային հիվանդությունը, վիրուսային վարակիչ հիվանդությունները, ծխախոտի հետևանքով օրգանի տոքսիկ վնասվածքները, ալկոհոլի չարաշահումը, սպիտակուցների դեֆիցիտը և կալցիումի չարաշահումը, ուստի այս գործոններից խուսափելն ու պարբերաբար բուժզննում անցնելը կօգնի կանխել բորբոքային գործընթացներն ու խուսափել նման վտանգավոր հիվանդության զարգացումից։

Նյութի աղբյուրը՝ medikforum.ru