Պարզ ու արդյունավետ խորհուրդներ, որոնք կօգնեն բարելավել ինքնազգացողությունն առիթմիայի դեպքում

Սրտի հիվանդությունները դասվում են ամենավտանգավոր ախտաբանությունների շարքին և հաճախ են դառնում հիվանդի մահվան պատճառ, ուստի նման խնդիրների դեպքում առողջական վիճակն ու ինքնազգացողությունը բարելավելը շատ կարևոր է։ Հատկապես տարածված խնդիր է առիթմիան (նախասրտերի ֆիբրիլյացիա), որին մարդիկ շատ հաճախ բավարար ուշադրություն չեն դարձնում, ինչը շատ վատ հետևանքներ է ունենում։

Մասնագետների խոսքով՝ առիթմիայի կամ սրտանոթային համակարգի հետ կապված որևէ այլ խնդրի կասկածների դեպքում առաջին հերթին հարկավոր է դիմել բժշկին։ Բուժզննման արդյունքում սրտաբանը կբացառի կամ կհաստատի հիվանդությունը, որից հետո անհրաժեշտության դեպքում կնշանակի բուժումն ու խորհուրդ կտա որոշակի փոփոխություններ անել կենսակերպում։ Սակայն մասնագետի խորհուրդներին հետևելուց բացի մարդիկ կարող են նաև ինքնուրույն որոշ միջոցներ ձեռնարկել ինքնազգացողության բարելավման համար։ Ձեր ուշադրությանն ենք ներկայացնում մի քանի պարզ ու արդյունավետ միջոց, որոնք առիթմիայով հիվանդներին կօգնեն խուսափել առողջական վիճակի վատթարացումից ու կբարելավեն ինքնազգացողությունը։

Խուսափել վնասակար մթերքից

Առիթմիայի դեպքում շատ կարևոր է բալանսավորված սննդակարգը, ուստի առաջին հերթին հարկավոր է խիստ սահմանափակել վնասակար մթերքի գործածությունն ու վերանայել սննդակարգը։ Մասնագետները նախազգուշացնում են, որ առիթմիայի ախտանշանները մեղմելու և ինքնազգացողությունը բարելավելու համար հարկավոր է անպայման կարգավորել սննդակարգն ու օգտագործել առողջարար մթերք։

Ոչ շատ ինտենսիվ ֆիզիկական ակտիվություն

Ֆիզիկական ակտիվությունը շատ կարևոր է լավ ինքնազգացողության համար, սակայն առիթմիայի դեպքում այն չպետք է չափազանց ինտենսիվ լինի և պետք է համապատասխանի մարդու օրգանիզմի հնարավորություններին։ Նման խնդրի դեպքում ակտիվության պահպանումը շատ կարևոր է, քանի որ ճիշտ վարժություններն օգնում են բարելավել սրտամկանի աշխատանքն ու ընդհանուր առողջական վիճակը։ Օրինակ՝ շատ առողջարար կարող են լինել աերոբային վարժությունները, որոնք պահպանում են սրտամկանի աշխատանքը։ Ակտիվության հիանալի տարբերակ կարող են լինել արագ քայլքը, հեծանվավազքն ու լողը։

Քաշի վերահսկողություն

Ճարպակալումը համարվում է նախասրտերի ֆիբրիլյացիայի զարգացմանը նպաստող հիմնական ռիսկային գործոններից մեկը, մինչդեռ քաշը նվազեցնելն օգնում է նվազեցնել նաև հիվանդության ռեցիդիվների քանակությունը։ Առհասարակ՝ մարմնի զանգվածը վերահսկողության տակ պահելը շատ կարևոր է ինքնազգացողության բարելավման համար։ Մարդիկ ի վիճակի չեն փոխել գենետիկան, սակայն անգամ առիթմիայի զարգացման գենետիկ նախատրամադրվածության դեպքում կարելի է ազատվել ավելորդ քաշից ու հետևել սննդակարգին, ինչը կօգնի բացառել հիվանդության զարգացմանը նպաստող հիմնական ռիսկային գործոններից մեկը։

Ալկոհոլի ու ծխախոտի բացառում

Ալկոհոլից հրաժարվելու դեպքում մարդը կարող է զգալիորեն բարելավել իր ինքնազգացողությունն ու առողջական վիճակը։ Ընդ որում՝ նման փոփոխությունը հատկապես օգտակար կլինի առիթմիայի դեպքում, քանի որ ոգելից խմիչքների գործածությունը նպաստում է նախասրտերի ֆիբրիլյացիայի զարգացմանը։ Գիտնականները ենթադրում են, որ գոյություն ունի այնպիսի հասկացություն, ինչպիսին է «տոնական սրտի համախտանիշը», որի դեպքում շողացող առիթմիան առաջանում է արձակուրդի ընթացքում կամ տոնական օրերին մեծ քանակությամբ ալկոհոլ օգտագործելու հետևանքով։ Շատ վնասակար կարող է լինել նաև ծխախոտը, ուստի այս սովորությունից ևս հարկավոր է հրաժարվել։

Լիարժեք քուն

Ինքնազգացողության բարելավման հարցում շատ կարևոր նշանակություն ունեն նաև լիարժեք քունն ու որակյալ հանգիստը։ Բանն այն է, որ անքնության դեպքում մարդը սովորաբար չարաշահում է սուրճն ու այլ խթանիչները, ինչը կարող է դառնալ առիթմիայի պատճառ։ Ընդ որում՝ խնդրի զարգացման հավանականությունն էլ ավել է մեծանում ալկոհոլի գործածության դեպքում։ Առհասարակ՝ հավելյալ սթրեսները բարձրացնում են առիթմիայի զարգացման հավանականությունն ու վատթարացնում են ինքնազգացողությունը, ուստի դրանցից հարկավոր է հնարավորինս խուսափել։ 

Նյութի աղբյուրը՝ medikforum.ru