Լավագույն բնական միջոցները լնդերի արյունահոսությունից ազատվելու համար. 7 բաղադրատոմս

Լնդերի արյունահոսությունը բերանի խոռոչի ամենատարածված խնդիրներից մեկն է, որը մարդիկ հաճախ են անուշադրության մատնում։ Սովորաբար լնդերի արյունահոսության դեպքում մարդիկ դիմում են ատամնաբույժին միայն այն ժամանակ, երբ խնդիրը չափազանց խորացած է լինում, մինչդեռ մասնագետները նախազգուշացնում են, որ ժամանակին լնդերը չբուժելը կարող է դառնալ ատամների կորստի պատճառ, ուստի նման տհաճ խնդրի առկայության դեպքում հարկավոր է հնարավորինս շուտ միջոցներ ձեռնարկել։ 

Որպես կանոն լնդերն ամրապնդելու և արյունահոսությունից ազատվելու համար մասնագետները հատուկ դեղորայքային բուժում են նշանակում, սակայն կան նաև ոչ պակաս արդյունավետ ու շատ ավելի հասանելի բնական միջոցներ, որոնք կօգնեն բուժել լնդերն ու ազատվել արյունահոսությունից և միաժամանակ չեն առաջացնի որևէ կողմնակի բարդություն։ Ձեր ուշադրությանն ենք ներկայացնում դրանցից լավագույնները։

• 1 ճաշի գդալ չորացրած սրոհունդին ավելացնել մի բաժակ եռման ջուր ու թրմել մինչև հեղուկը սառչի։ Ստացված թուրմը քամել ու օգտագործել օրական երկու անգամ բերանի խոռոչի ողողումների համար։ 
• Կարելի է նաև լնդերին ակնամոմի ոգեթուրմ քսել ու մի փոքր մերսել կամ պարզապես մի կտոր մեղրամոմը դանդաղ ծամել։ Ընդ որում՝ ոգեթուրմը կարելի է գնել դեղատնից։
• 20 գրամ չորացրած վաղենակի ծաղիկներին ավելացնել մի բաժակ եռման ջուր, դնել թույլ կրակին ու տաքացնել 15 րոպե, սակայն չեռացնել։ Թողնել հեղուկը սառչի, այնուհետև քամել ու օգտագործել օրվա ընթացքում բերանի խոռոչի ողողումների համար։ 
• Բերանի խոռոչի ողողումների համար կարելի է օգտագործել նաև վաղենակի սպիրտային ոգեթուրմը, որը վաճառվում է դեղատներում։ Պարզապես հարկավոր է 1 թեյի գդալ ոգեթուրմը լուծել մի բաժակ եռացրած գոլ ջրում և օգտագործել լուծույթը ողողումների համար։
• 1:1 հարաբերակցությամբ խառնել թարմ կաղամբի հյութն ու եռացրած ջուրը և ստացված լուծույթն օգտագործել օրական 3-4 անգամ բերանի խոռոչը ողողելու համար։
• 1 ճաշի գդալ մանրացրած կաղնու կեղևին ավելացնել մի բաժակ եռման ջուր, թրմել 10 րոպե, այնուհետև քամել։ Ստացված թուրմն օգտագործել առավոտյան ու երեկոյան ատամները լվանալուց հետո բերանի խոռոչը ողողելու համար։
• 3 ճաշի գդալ չորացրած դեղատնային երիցուկի ծաղիկներին ավելացնել կես լիտր եռման ջուր ու թրմել մեկ ժամ, այնուհետև թուրմը քամել ու օգտագործել օրական երկու անգամ բերանի խոռոչը ողողելու համար։

Այս պարզ բնական միջոցները կարող են շատ արդյունավետ լինել, սակայն հարկ է հիշել, որ որոշ դեպքերում լնդերի արյունահոսությունը պայմանավորված է լինում որոշակի առողջական խնդիրներով, որոնք անուշադրության մատնելը կարող է վտանգավոր լինել, ուստի մինչ նման միջոցներ կիրառելը հարկավոր է նախ պարզել բուն խնդիրն ու չզբաղվել ինքնաբուժությամբ: Հարկ է հիշել, որ ինքնաբուժությունը կարող է շատ տհաճ հետևանքներ ունենալ, ուստի առաջին հերթին հարկավոր է դիմել բժշկին: Լուրջ խնդիրների դեպքում միայն փորձառու մասնագետը կկարողանա պարզել ցավի առաջացման պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ aif.ru