Արթրիտի մասին հուշող արտասովոր ախտանշաններ, որոնք հաճախ վերագրվում են այլ հիվանդություններին

Արթրիտը հոդերի բորբոքային հիվանդություն է, որին բնորոշ ախտանշաններն են հոդացավերն ու հոդերի շարժումների կաշկանդվածությունը, սակայն զարգացման վաղ փուլերում հիվանդությունը կարող է դրսևորվել այլ ախտանշաններով, որոնք շատ հաճախ անտեսվում են։

Շատերը ռևմատոիդ արթրիտը սխալմամբ համարում են միայն տարեցների հիվանդություն, մինչդեռ իրականում այս հիվանդությունը կարող է ախտորոշվել նաև երեխաների մոտ։ Արթիրիտը աուտոիմունային հիվանդություն է, որը բորբոքումներ է առաջացնում։ Հիվանությունն առաջին հերթին ախտահարում է հոդերը, սակայն դրանք արթրիտի միակ «թիրախը» չեն։ Արթրիտի առաջացրած բորբոքումները բացասաբար են անդրադառնում նաև սրտանոթային համակարգի վրա՝ բաձրացնելով գլխուղեղի կաթվածի ու սրտամկանի ինֆարկտի զարգացման հավանականությունը։ Այս հիվանդությունը հարկավոր է հայտնաբերել հնարավորինս շուտ, քանի որ որքան երկար է բորբոքային գործընթացը մնում առանց բուժման, այնքան մեծ է լուրջ բարդությունների զարգացման հավանականությունը։

Արթրիտի հետևանքով կողմնակի բարդությունների զարգացման հավանականությունը հնարավորինս նվազեցնելու համար հարկավոր է բուժումը շուտ սկսել, սակայն խնդիրն այն է, որ հիվանդության առաջին ախտանշանները սովորաբար վերագրվում են այլ խանգարումներին, քանի որ հազվադեպ են կապվում արթրիտի հետ։ Մանսագետները նշել են այս հիվանդության հիմնական ախտանշանները, որոնց առկայության դեպքում հարկավոր է դիմել բժշկին։

Հոգնածության զգացում

Այս ախտանշանը բնորոշ է բազմաթիվ հիվանդություններին։ Արթրիտի դեպքում այն ոչ միայն ավելի ուժգին է լինում, այլև հաճախ ուղեկցվում է ընկճախտով։ Բացի այդ, կարող է նկատվել նաև ինքնազգացողության ընդհանուր վատթարացում, որը հիշեցնում է մրսածություն, իսկ երբեմն էլ կարող է զարգանալ սակավարյունություն (անեմիա)։

Մարմնի ջերմաստիճանի բարձրացում

Արթրիտի մասին կարող է հուշել նաև մարմնի ջերմաստիճանի բարձրացումը։ Այս դեպքում այն չի գերազանցում 38°C-ը, չի ունենում որևէ պատճառ և պահպանվում է մի քանի օր շարունակ։

Աչքերի չորություն

Աչքերի չորությունը մարդիկ հազվադեպ են կապում արթրիտի հետ և սովորաբար այն վերագրվում է հոգնածությանն ու համակարգչի առջև շատ ժամանակ անցկացնելուն։ Այնուամենայնիվ մասնագետները նախազգուշացնում են, որ ռևմատոիդ արթրիտը կարող է դառնալ սպիտապատյանի մակերեսային շերտի բորբոքման (էպիսկլերիտ, աչքերի մակերևույթի բորբոքում) պատճառ, որն իր դրսևորմամբ շատ նման է շատերին ծանոթ չոր աչքի համախտանիշին, որի դեպքում արտասուքի քանակությունը նվազում է և ի հայտ է գալիս աչքերում օտար մարմնի կամ ավազի առկայության զգացողություն։

Քաշի նվազում

Արթրիտի դեպքում բորբոքումների պատճառով կարող է նկատվել ախորժակի վատթարացում, մինչդեռ շատերն անտեսում են այս ախտանշանը։ Սա է պատճառը, որ քաշի անբացատրելի նվազման ու ախորժակի բացակայության դեպքում հարկավոր է ուշադրություն դարձնել նաև հիվանդության մասին հուշող մյուս ախտանշաններին։

Կրծքավանդակի ցավեր

Այս տհաճ զգացողությունները կարող են պայմանավորված լինել նրանով, որ արթրիտը նպաստել է սրտակրանքի բորբոքման (պերիկարդիտ, պերիկարդի՝ սիրտը շրջապատող ֆիբրոզ թաղանթի բորբոքում)։

Նյութի աղբյուրը` medikforum.ru