7 համեղ ու տարածված մթերք, որոնք նվազեցնում են քաղցկեղի զարգացման հավանականությունը

18:46 • 01.09.20

Քաղցկեղն ամենավտանգավոր հիվանդություններից մեկն է, որը տարեկան միլիոնավոր կյանքեր է խլում։ Սա դասվում է այն հիվանդությունների շարքին, որոնց կանխարգելումն ու բուժումը վաղ փուլերում շատ ավելի հեշտ է, քան հետագայում դրա պատճառով զարգացած մի շարք կողմնակի բարդությունների դեմ պայքարելը, ուստի դրա դեմ պայքարը հնարավորինս շուտ սկսելը շատ կարևոր է։

Քաղցկեղի կանխարգելման լավագույն միջոցներից մեկն առողջ կենսակերպ վարելն ու հիվանդության զարգացման նպաստող գործոններից խուսափելն է, ուստի առաջին հերթին հարկավոր է հետևել այս պարզ կանոններին։ Բացի այդ, կարելի է նաև որոշ փոփոխություններ անել սննդակարգում՝ բացառելով քաղցկեղածին նյութեր պարունակող մթերքն ու դրանց փոխարեն հակաքաղցկեղային ազդեցությամբ օժտված սննդամթերքի տեսակներ օգտագործելով։

Մասնագետները ներկայացրել են յոթ համեղ ու հասանելի հակաքաղցկեղային մթերք, որոնք ամենօրյա սննդակարգում ներառելը կօգնի զգալիորեն նվազեցնել օնկոլոգիական հիվանդությունների զարգացման հավանականությունը։

Սխտոր

Հակաքաղցկեղային ազդեցությամբ օժտված սննդամթերքի լավագույն տեսակներից մեկը սխտորն է, որն արդյունավետ կերպով խթանում է իմունային համակարգի բնական պաշտպանական հատկությունները։ Նման ազդեցությունը պայմանավորված է լինում սխտորում պարունակվող ծծմբի միացություններով։ Բացի այդ, հետազոտությունները ցույց են տվել, որ սխտորի գործածությունը ստամոքսի քաղցկեղի կանխարգելման լավագույն միջոցներից մեկն է. այս մթերքը նվազեցնում է քաղցկեղի այս տեսակի զարգացման հավանականությունը 15%-ով։

Բրազիլական ընկույզ

Հակաքաղցկեղային ազդեցությամբ է օժտված նաև բրազիլական ընկույզը, որը նվազեցնում է կոլոռեկտալ քաղցկեղի ու շագանակագեղձի քաղցկեղի զարգացման հավանականությունը։ Այս մթերքը սելենի հարուստ աղբյուր է, իսկ այս հանքանյութը նպաստում է վնասված բջիջների ոչնչացմանը՝ այդ կերպ կանխելով դրանց չարորակացումը։ Ամերիկացի գիտնականների հետազոտությունները ցույց են տվել, որ այս ընկույզի շնորհիվ շագանակագեղձի քաղցկեղի զարգացման հավանականությունը նվազում է 63%-ով, իսկ աղիների քաղցկեղի զարգացման հավանականությունը՝ 58%-ով։ Ընդ որում՝ նման արդյունքի հասնելու համար հարկավոր է օրական ընդամենը երկու հատ բրազիլական ընկույզ ուտել։

Բրոկոլի

Չարորակ հիվանդությունների դեմ պայքարի լավագույն բնական միջոցներից մեկը բրոկոլին է, ինչը պայմանավորված է դրանում պարունակվող յուրահատուկ նյութերով։ Հետազոտությունները ցույց են տվել, որ այս մթերքը պարունակում է I3С մոլեկուլ, որը ճնշում է ուռուցքների տարբեր տեսակների հետ ասոցացվող WWP1 գենը։ Բացի այդ, բրոկոլին պարունակում է նաև սուլֆարոֆան, որն օժտված է աղիների ու շագանակագեղձի ուռուցքների բջիջների զարգացումը ճնշելու հատկությամբ։

Խնձոր

Հիանալի հակաքաղցկեղային մթերք է նաև հասարակ խնձորը, որի հաճախակի գործածությունն օգնում է կանխել կոլոռեկտալ քաղցկեղի զարգացումը։ Սա պայմանավորված է խնձորում պարունակվող մանրաթելերով ու հակաօքսիդանտային հատկություններով օժտված նյութերով՝ պրոցիանիդներով, որոնք ոչնչացնում են չարորակ բջիջները։

Թեյ

Քաղցկեղի զարգացման հավանականության նվազմանն է նպաստում նաև թեյի գործածությունը։ Հետազոտությունները ցույց են տվել, որ օրական երկու բաժակ թեյ խմելը նվազեցնում է ձվարանների քաղցկեղի զարգացման հավանականությունը 32%-ով, ինչը պայմանավորված է թեյի տերևներում պարունակվող մեծ քանակությամբ ֆլավոնոիդների ու հակաօքսիդանտների ազդեցությամբ։

Յուղոտ ձկնատեսակներ

Շատ օգտակար կարող են լինել նաև յուղոտ ձկնատեսակները, որոնք նույնպես կարող են պաշտպանել չարորակ հիվանդություններից։ Շաբաթական չորս բաժին ձուկ ուտելն օգնում է նվազեցնել լեյկոզի, միելոմայի ու լիմֆոմայի զարգացման հավանականությունը 30%-ով։

Ցիտրուսային մրգեր

Չարորակ հիվանդությունների կանխարգելման հիանալի միջոց կարող են լինել նաև ցիտրուսային մրգերը։ Այս մրգերի գործածությունը զգալիորեն նվազեցնում է բերանի խոռոչի, կոկորդի ու ստամոքսի քաղցկեղի զարգացման հավանականությունը, ուստի դրանք հարկավոր է անպայման մշտական սննդակարգի մասը դարձնել։

Մասնագետները նախազգուշացնում են, որ գոյություն չունի որևէ մթերք, որը լիովին կպաշտպանի քաղցկեղից, սակայն սննդամթերքի վերոնշյալ տեսակների գործածությունն այնուամենայնիվ կօգնի զգալիորեն պաշտպանել օրգանիզմն այս հիվանդության զարգացումից։ Նշված մթերքի գործածությունը դրական ազդեցություն է ունենում իմունային համակարգի աշխատանքի վրա, ինչը կարող է առնվազն 20%-ով նվազեցնել օնկոլոգիական որոշ հիվանդությունների զարգացման հավանականությունը, ուստի դրանք հարկավոր է անպայման ներառել սննդակարգում։

Նյութի աղբյուրը` medikforum.ru