Որոնք են լյարդի քաղցկեղի մասին հուշող հիմնական ախտանշաններն ու խնդրի զարգացմանը նպաստող գործոնները

Լյարդը մարդու կարևորագույն օրգաններից մեկն է, ուստի այս օրգանի աշխատանքի խանգարումները կարող են խիստ բացասաբար անդրադառնալ ամբողջ օրգանիզմի վրա։ Հատկապես վտանգավոր է լյարդի քաղցկեղը, որի դեպքում բուժման արդյունավետությունը կախված է լինում դրա վաղ ախտորոշումից, սակայն հիվանդության ախտանշանները չիմանալու դեպքում խնդիրը զարգացման վաղ փուլերում հայտնաբերելն այդքան էլ հեշտ չի լինի, ինչը կարող է շատ վտանգավոր հետևանքներ ունենալ։ Նման խնդիրներից խուսափելու համար Cancer Research UK կազմակերպության ուռուցքաբանները ներկայացրել են այն ախտանշանները, որոնք կհուշեն քաղցկեղի զարգացման մասին։

Մասնագետների խոսքով՝ լյարդը խոշոր օրգան է, որը տեղակայված է որովայնի վերին աջ հատվածում, սակայն այս օրգանի քաղցկեղը սկզբնական փուլում սովորաբար չի դրսևորվում վառ ախտանշաններով։ Այնուամենայնիվ հիվանդության զարգացումն ուղեկցվում է մի կողմնակի բարդությամբ, որը կարող է լինել քաղցկեղի մասին հուշող ամենաակնհայտ ախտանշանը։ Խոսքն ասցիտով (ջրգողություն) ուղեկցվող քաղցկեղի մասին է, որի դեպքում որովայնը մեծանում է կուտակված հեղուկի պատճառով։

«Աճող ուռուցքը մեծացնում է լյարդի վրա գործադրվող ճնշումը՝ հանգեցնելով անոթներում արյան կուտակման։ Սա, իր հերթին, դուրս է մղում հեղուկն անոթներից դեպի որովայնի խոռոչ, ինչը հանգեցնում է որովայնի չափերի մեծացման։ Այս ամենի հետ մեկտեղ երակներում բարձրանում է արյան ճնշումը, ինչի պատճառով դրանք ուռչում են ու դառնում ավելի նկատելի մաշկի տակ», - նշում են մասնագետները։

Սակայն ասցիտն ու ավելի արտահայտված անոթներն այս հիվանդության մասին հուշող միակ ախտանշանները չեն, ուստի հարկավոր է ուշադրություն դարձնել նաև այլ փոփոխություններին։ Քաղցկեղի այս տեսակի մասին են հուշում.

• մաշկի ու աչքերի սպիտակուցային թաղանթի դեղնավուն երանգը, 
• մեզի մուգ գույնն ու կղանքի բաց գույնը,
• առանց որևէ ջանք գործադրելու քաշի անբացատրելի կորուստն,
• որովայնի աջ հատվածի փքվածությունը,
• ինքնազգացողության վատթարացումն ու տհաճ զգացողությունները, որոնք նման են գրիպի ախտանշաններին։

Մասնագետների խոսքով՝ լյարդի քաղցկեղը շատ վտանգավոր հիվանդություն է, որը կարող է զարգանալ յուրաքանչյուրի մոտ, քանի որ դրա զարգացման պատճառները դեռ պարզ չեն, սակայն գոյություն ունեն գործոններ, որոնք զգալիորեն բարձրացնում են դրա հավանականությունը։ Այդ գործոնների շարքում ամենավտանգավորն ալկոհոլի երկարատև գործածությունն է, ինչը հանգեցնում է լյարդի ցիռոզի զարգացման ու օրգանի հյուսվածքների սպիացման։ Ավելին՝ ոգելից խմիչքները կարող են նաև վնասել լյարդի բջիջների ԴՆԹ-ն՝ այդ կերպ խթանելով բջիջների մուտացիան ու հանգեցնելով դրանց չարորակացման։

Բացի այդ, լյարդի քաղցկեղի զարգացման հավանականությունը բարձրացնող գործոնների շարքին է դասվում նաև ծխախոտի գործածությունը, ուստի այս վտանգավոր խանգարումից խուսափելու համար հարկավոր է հրաժարվել այս վատ սովորությունից։

Նյութի աղբյուրը՝ medikforum.ru