Մասնագետը նշել է՝ որոնք են թրոմբոզի զարգացման հիմնական պատճառներն ու հիվանդության մասին հուշող առաջին ախտանշանները

12:45 • 11.09.20

Թրոմբոզը շատ վտանգավոր հիվանդություն է, որը բնորոշվում է անոթներում արյան մակարդուկների առաջացմամբ։ Սա բավական տարածված խանգարում է, որի վաղ ախտորոշումը շատ կարևոր նշանակություն ունի, ուստի ռուս սրտաբան Յուրի Բելենկովը «Ամենակարևորի մասին» («О самом главном») հաղորդաշարի եթերում նշել է այս հիվանդության առաջին ախտանշանները, որոնք թույլ կտան ժամանակին նկատել այն ու միջոցներ ձեռնարկել։

Մասնագետի խոսքով՝ այս հիվանդությունը կանանց ու տղամարդկանց մոտ կարող է տարբեր բնույթի լինել։ Եթե կանանց մոտ առավել հաճախ ախտորոշվում է երակային թրոմբոզ, ապա տղամարդիկ սովորաբար բախվում են զարկերակային թրոմբոզի խնդրին։ Երակներում թրոմբի առաջացմանն են նպաստում երակների վարիկոզ լայնացումը, նստակյաց կենսակերպը, որի դեպքում վերջույթները երկար ժամանակ մնում են որևէ դիրքով ու չեն շարժվում, ինչպես նաև անհարմար դիրքն ու հորմոնալ հակաբեղմնավորիչ դեղահաբերի ընդունումը։ Զարկերակային թրոմբոզի զարգացումը հաճախ պայմանավորված է լինում արյան մակարդելիության խանգարմամբ, շողացող առիթմիայով, վնասվածքներով, ծխախոտի գործածությամբ, շաքարային դիաբետով ու նստակյաց կենսակերպով։

Հիվանդությունը ժամանակին նկատելու համար մասնագետը հորդորում է ուշադրություն դաձնել դրա մասին հուշող առաջին ախտանշաններին։ Ինչպես նշում է Բելենկովը, թրոմբոզի մասին կարող են նախազգուշացնել վերջույթների այտուցները, մաշկի կարմրությունն ու այդ հատվածի ջերմության բարձրացումը։ Բացի այդ, հիվանդությունը կարող է դրսևորվել նաև ոտքերի մատների գույնի մգացմամբ, վերջույթների սառնության զգացողությամբ և դրանց սուր ցավով։

Մասնագետը նախազգուշացնում, որ է նման ախտանշանները ոչ մի դեպքում չի կարելի անտեսել, քանի որ ժամանակին բուժումը չսկսելը կարող է շատ վտանգավոր լինել։ Թրոմբոզի դեպքում կարող են զարգանալ բարդություններ, որոնք կհանգեցնեն անդամահատության և անգամ մահվան, ուստի հնարավորինս շուտ բուժումն սկսելը շատ կարևոր է։