Կեֆիրով համեղ ու օգտակար կոկտեյլների բաղադրատոմսեր նյութափոխանակությունը բարելավելու համար

Նյութափոխանակության համակարգի ճիշտ աշխատանքը շատ կարևոր նշանակություն ունի ամբողջ օրգանիզմի համար, քանի որ հենց այս համակարգն է պատասխանատու սննդի յուրացման ու դրա շնորհիվ օրգանիզմին անհրաժեշտ սննդարար նյութերը ստանալու համար։ Այս համակարգի աշխատանքի խանգարումը սովորաբար ասոցացվում է քաշի ավելացման հետ, մինչդեռ իրականում այն կարող է դառնալ առողջական մի շարք լուրջ խնդիրների զարգացման պատճառ, ուստի զարմանալի չէ, որ մասնագետները հորդորում են հոգ տանել նյութափոպանակության համակարգի առողջության մասին և ցանկացած խնդրի դեպքում անհապաղ դիմել բժշկին։

Սովորաբար նյութափոխանակության կարգավորման համար մասնագետները որոշակի դեղամիջոցներ են նշանակում, սակայն նման խանգարումներից կարելի է հեշտությամբ խուսափել ճիշտ մթերքի գործածության դեպքում։ Գոյություն ունեն սննդամթերքի տեսակներ, որոնք բարենպաստ ազդեցություն են ունենում նյութափոխանակության համակարգի վրա, և դրանցից լավագույններից մեկն է կեֆիրը։ Այս մթերքն այլ օգտակար բաղադրիչների հետ համադրելու դեպքում կարելի է ստանալ շատ համեղ կոկտեյլներ, որոնք կօգնեն ոչ միայն կարգավորել նյութափոխանակությունն ու մարսողությունը, այլև մաքրել օրգանիզմն ու ազատվել ավելորդ քաշից։ Ձեր ուշադրությանն ենք ներկայացնում նման կոկտեյլների վեց բաղադրատոմս։

Ճարպերն այրող կոկտեյլ

Այս կոկտեյլը պատրաստելու համար հարկավոր է մի բաժակ կեֆիրին ավելացնել մեկ ճաշի գդալ մանրացրած մաղադանոս ու մի պտղունց աղացած դարչին, լավ խառնել ու թողնել առնվազն մեկ ժամ թրմվի։ Այս կոկտեյլը հարկավոր է խմել օրական երկու անգամ՝ առավոտյան դատարկ ստամոքսին ու երեկոյան։ Ընդհանուր կուրսը տևում է 10 օր։ Ընդ որում ՝ այս օրերին խորհուրդ է տրվում սնվել մեծ մասամբ բանջարեղենով, ինչպես նաև խմել մեծ քանակությամբ հեղուկ (ջուր, կանաչ թեյ)։

Չիչխանով կոկտեյլ

Այս կոկտեյլի համար հարկավոր է 250 մլ կեֆիր, 200 գրամ չիչխան և 1-1,5 ճաշի գդալ լորենու մեղր։ Այն պատրաստելու համար նախ հարկավոր է չիչխանը կոտորակիչով լավ մանրացնել, այնուհետև քամել, ավելացնել մեղրն ու լավ խառնել։ Կեֆիրը հարիչով լավ խառնել, այնուհետև ավելացնել չիչխանի հյութն ու կրկին խառնել մինչև ստացվի համասեռ զանգված։

Մեղրով կոկտեյլ

Այս համեղ ու օգտակար կոկտեյլը կարելի է համադրել սիրելի թխվածքաբլիթի հետ՝ օգտագործելով այն օրվա առաջին կեսին։ Ըմպելիքը պատրաստելու համար հարկավոր է մեկական թեյի գդալ աղացած կոճապղպեղին ու մեղրին ավելացնել երկու ճաշի գդալ եռացրած ջուր, այնուհետև ավելացնել մի պտղունց դարչին ու մի շերտ կիտրոն և լավ խառնել։ Ստացված խառնուրդին ավելացնել նաև 200 մլ կեֆիր, լավ խառնել ու խմել ըմպելիքը։

Խնձորով կոկտեյլ

Հինգ հատ միջին չափի խնձորը կեղևազրկել ու քերիչով մանրացնել, այնուհետև ավելացնել 300 մլ կեֆիր ու լավ խառնել հարիչով կամ կոտորակիչով։ Համեմել ըմպելիքը դարչնով ու խմել։ Այս կոկտեյլը ոչ միայն բարելավում է նյութափոխանակությունը, այլև ճնշում է ախորժակը, ուստի այն կարելի է օգտագործել նախաճաշի կամ ճաշի փոխարեն։

Բուժիչ կոկտեյլ

Կես լիտր կեֆիրին ավելացնել մեկ թեյի գդալ կոճապղպեղ, մի փոքր մեղր ու մի պտղունց աղ, թողնել 10 րոպե թրմվի, այնուհետև լցնել կոտորակիչի մեջ ու լավ խառնել։ Այս ըմպելիքը դրական ազդեցություն է ունենում աղիների միկրոֆլորայի վրա, ինչպես նաև օգնում է հեշտությամբ ազատվել ավելորդ քաշից։ Օրական երեք անգամ մեկական բաժակ կոկտեյլ խմելու, յուղոտ ու բարձր կալորիականություն ունեցող մթերքը բացառելու, ինչպես նաև ֆիզիկապես ակտիվ լինելու դեպքում ընդամենը մեկ շաբաթում հնարավոր կլինի ազատվել 2-4 կգ ավելորդ քաշից։

Համեմունքներով կոկտեյլ

Նյութափոխանակությունը խթանող հիանալի միջոց է նաև համեմունքների գործածությունը, ուստի կարելի է կեֆիրը համադրել նաև համեմունքների հետ։ Պարզապես հարկավոր է 200 մլ կեֆիրին ավելացնել մեկական պտղունց աղացած կոճապղպեղ, աղացած դարչին ու կարմիր պղպեղ, լավ խառնել, այնուհետև նոսրացնել ըմպելիքը երկու ճաշի գդալ հանքային ջրով, կրկին խառնել ու խմել։

Նյութի աղբյուրը՝ healthinfo.ua