Ենթաստամոքսային գեղձի քացկեղի մասին հուշող ախտանշան, որը մարդիկ հաճախ են անտեսում

Ենթաստամոքսային գեղձի քաղցկեղն այս հիվանդության ամենավտանգավոր տեսակներից մեկն է, որը զարգանում է օրգանի բջիջների անկառավարելի աճի հետևանքով։ Ինչպես քաղցկեղի ցանկացած այլ տեսակի, այնպես էլ ենթաստամոքսային գեղձի քաղցկեղի դեպքում բուժման արդյունավետությունը կախված է լինում հիվանդության վաղ ախտորոշումից, սակայն խնդիրն այն է, քաղցկեղի այս տեսակի ախտանշանները զարգացման վաղ փուլերում նկատելը բավական բարդ է լինում, քանի որ շատ հաճախ դրանք ատիպիկ են լինում և վերագրվում են այլ հիվանդություններին։ Ավելին` գոյություն ունի այս հիվանդության մասին հուշող մի ախտանշան, որը կարող է ի հայտ գալ ժամանակ առ ժամանակ, ինչի պատճառով էլ հաճախ է անուշադրության մատնվում։

Խոսքը որովայնի ու մեջքի հատվածում բավական արտասովոր ցավի առկայության մասին է, որը կարող է ի հայտ գալ կտրուկ և որոշ ժամանակ անց մեղմվել։ Ինչպես նշում են Մեծ Բրիտանիայի առողջապահական ծառայության (NHS) մասնագետները, այս կամ այն ախտանշանի առկայության դեպքում խուճապի մատնվել պետք չէ, քանի որ դրանք կարող են պայմանավորված լինել տարբեր խնդիրներով ու շատ հաճախ կապված չեն լինում քաղցկեղի հետ, սակայն եթե այն ի հայտ է գալիս կտրուկ, ապա հարկավոր է անհապաղ դիմել թերապևտին ու բուժզննում անցնել։

Express պարբերականի հետ զրույցում մասնագետները նշել են, որ ենթաստամոքսային գեղձի քաղցկեղի մասին հուշող ախտանշանների շարքին է դասվում որովայնի ու մեջքի ցավը։ Ընդ որում` այս դեպքում ցավը կարող է պարբերաբար անհետանալ կամ կրկին ի հայտ գալ, ինչպես նաև կարող է ուժգնանալ պառկած ժամանակ կամ սնվելուց հետո։

Սակայն ցավը միակ ախտանշանը չէ, որը հուշում է այս խնդրի մասին, ուստի հարկավոր է շատ ուշադիր լինել ու չանտեսել նաև մյուս նախազգուշացումները։ Ենթաստամոքսային գեղձի քաղցկեղի մասին վկայող մյուս ախտանշաններն են.

• քաշի անբացատրելի կորուստը,
• մաշկի ու աչքերի սպիտակուցային թաղանթի դեղնավուն երանգը,
• մեզի մուգ դեղին կամ նարնջագույն երանգը,
• կղանքի արտասովոր բաց գույնը։

Pancreatic Cancer UK-ի տվյալներով` այս ախտանշանները կարող են պայմանավորված լինել նաև այնպիսի հիվանդություններով, ինչպիսին են ենթաստամոքսային գեղձի բորբոքումը, լեղաքարային հիվանդությունը (լեղապարկում քարերի առկայություն), գրգռված աղիների համախտանիշը կամ հեպատիտը (լյարդի բորբոքում)։ Սա է պատճառը, որ առանց որևէ պատճառի այս կամ այն ախտանշանի ի հայտ գալու դեպքում հարկավոր է դիմել բժշկին։ Բացի այդ, բժշկին է հարկավոր դիմել նաև չորս շաբաթ և ավելի պահպանվող փոփոխությունների դեպքում

Մասնագետները նախազգուշացնում են, որ հիվանդության զարգացման հավանականությունն աճում է 40 տարեկանից հետո։ Ենթաստամոքսային գեղձի քաղցկեղի դեպքում շատ մեծ դեր է խաղում նաև ժառանգական նախատրամադրվածությունը։ Բացի այդ հիվանդության զարգացմանը նպաստող գործոնների շարքին են դասվում նաև անառողջ կենսակերպը և առաջին հերթին ծխախոտի գործածությունը, ինչպես նաև ավելորդ քաշը, ուստի քաղցկեղի այս տեսակի կանխարգելման համար խորհուրդ է տրվում խուսափել վնասակար սովորություններից, վարել առողջ կենսակերպ ու պահել քաշը նորմայի սահմաններում։