Բերանի խոռոչի քաղցկեղ. հիվանդության ախտանշաններն ու զարգացմանը նպաստող հիմնական գործոնները

Քաղցկեղը համարվում է ամենավտանգավոր հիվանդություններից մեկը, որը տարեկան հազարավոր մարդկանց մահվան պատճառ է դառնում: Սա այն հիվանդություններից է, որոնց վաղ ախտորոշումը զգալիորեն բարձրացնում է բարեհաջող բուժման հավանականությունը, ուստի դրա զարգացման մասին հուշող ախտանշաններն իմանալը շատ կարևոր է:

Բերանի խոռոչի քաղցկեղը չի դասվում այս հիվանդության ամենատարածված տեսակների շարքին, սակայն այն նույնպես հանդիպում է բավական հաճախ և կարող է շատ վտանգավոր լինել: Այս հիվանդության ախտանշաններին մարդիկ ոչ միշտ են ուշադրություն դարձնում՝ հաճախ վերագրելով դրանք այլ խնդիրներին, սակայն մասնագետները պնդում են, որ ժամանակին միջոցներ ձեռնարկելը կօգնի ազատվել հիվանդությունից և խուսափել մետաստազների տարածումից: Լուրջ հետևանքների չբախվելու համար բժիշկները հորդորում են ուշադրություն դարձնել բերանի խոռոչի քաղցկեղի մասին հուշող հիմնական ախտանշաններին և անհապաղ դիմել մասնագետին ու բուժզննում անցնել դրանց առկայության դեպքում։

Բերանի խոռոչի քաղցկեղը ենթադրում է չարորակ նորագոյացության առաջացում բերանի խոռոչի որևէ հատվածում։ Հիվանդությունը կարող է ախտահարել լեզուն, այտերի ներքին հատվածները, քիմքը, շուրթերը կամ լնդերը։ Cancer Research UK բրիտանական կազմակերպության տվյալներով՝ քաղցկեղի այս տեսակի ամենատարածված ախտանշանն է լորձաթաղանթին ի հայտ եկած խոցը, որը չի ապաքինվում բավական երկար ժամանակ։ Սակայն խոցն այս հիվանդության միակ ախտանշանը չէ։

Ինչպես նշում է London Bridge հիվանդանոցի բժիշկ Լյուկ Կասկարինին, բերանի խոռոչի քաղցկեղը կարող է դրսևորվել նաև համային զգացողությունների փոփոխությամբ։ Այս հիվանդության դեպքում բերանում կարող է տհաճ համ առաջանալ, որը փչացած մսի համ է հիշեցնում, ուստի նման արտասովոր ախտանշանը ոչ մի դեպքում չի կարելի անտեսել։

«Սկզբում, երբ չարորակ նորագոյացությունը դեռ շատ փոքր է, այն ստանում է բավարար քանակությամբ արյուն գոյատևման համար, սակայն աճի ու մեծացման հետ մեկտեղ արյան մատակարարման գործընթացը խանգարվում է։ Արյունատար անոթները չեն կարողանում լիարժեք սնունդով ապահովել ուռուցքի բոլոր հատվածները, ինչի հետևանքով դրանցից որոշները մահանում են։ Հենց սա էլ դառնում է բերանում տհաճ համի առկայության պատճառ», - նշում է մասնագետը Express պարբերականի հետ զրույցում։

Բժշկի խոսքով՝ ուռուցքի աճի հետ մեկտեղ տհաճ համն ավելի ու ավելի ակնհայտ է դառնում։ Բացի այդ, հիվանդության զարգացումը հանգեցնում է նաև բերանի խոռոչի տհաճ հոտի առաջացման։ Ընդ որում՝ տհաճ հոտը նման է լինում այն հոտին, որն ի հայտ է գալիս լնդերի կամ նշագեղձերի հիվանդությունների դեպքում։

Այս հիվանդության բարեհաջող բուժումը կախված է լինում դրա վաղ ախտորոշումից, ուստի բժիշկ Կասկարինին նշել է նաև այն ախտանշանը, որը կարող է առաջինը հուշել բերանի խոռոչի քաղցկեղի մասին։ Խոսքը շուրթերի անսպասելի թմրածության մասին է, որը ոչ բոլորն են կապում քաղցկեղի հետ և շատ հաճախ անտեսում են։

Մասնագետի խոսքով՝ գոյություն ունեն որոշ գործոններ, որոնք զգալիորեն բարձրացնում են քաղցկեղի այս տեսակի զարգացման հավանականությունը, ուստի դրանցից խորհուրդ է տրվում խուսափել։ Առաջին հերթին բերանի խոռոչի քաղցկեղի զարգացմանն են նպաստում ծխախոտի գործածությունը (ինչպես ծխելը, այնպես էլ ծամելը) և պասիվ ծխելը։ Եթե մարդը ոչ միայն ծխում է, այլև ալկոհոլ է օգտագործում, ապա վտանգավոր հիվանդության զարգացման հավանականությունը էլ ավելի է բարձրանում։

«Ծխախոտն ու ալկոհոլը քաղցկեղածին են, ինչը նշանակում է, որ դրանք պարունակում են քիմիական տարրեր, որոնք կարող են վնասել բջիջների ԴՆԹ-ն ու նպաստել ուռուցքների զարգացմանը», - նշում է մասնագետը՝ հավելելով, որ հիվանդության զարգացմանը նպաստող գործոնների շարքին են դասվում նաև անառողջ սննդակարգն ու մարդու պապիլոմավիրուսը։