Երկրորդ տիպի շաքարային դիաբետի մասին հուշող արտասովոր ախտանշաններ, որոնց ոչ բոլորն են ուշադրություն դարձնում

Երկրորդ տիպի շաքարային դիաբետն ամենավտանգավոր ու տարածված հիվանդություններից մեկն է, որի դեմ պայքարում են միլիոնավոր մարդիկ։ Այս հիվանդությունը կարող է դրսևորվել ամենատարբեր ախտանշաններով, որոնցից շատերը հիվանդները հաճախ չեն կապում այս խանգարման հետ, ինչի հետևանքով էլ այն շատ հաճախ ախտորոշվում է բավական ուշ։ Diabetes.UK (Մեծ Բրիտանիա) կազմակերպության մասնագետները ներկայացրել են երկրորդ տիպի շաքարային դիաբետի մասին հուշող այդ արտասովոր ախտանշաններից մեկը, որին մարդիկ հազվադեպ են ուշադրություն դարձնում։

Կազմակերպության տվյալներով՝ այս հիվանդության մասին կարող է նախազգուշացնել մարդու եղունգների վիճակը։ Առհասարակ, ինչպես նշում են մասնագետները, եղունգները կարող են շատ բան պատմել մարդու առողջության մասին, ուստի դրանց հետ տեղի ունեցող փոփոխություններն ուշադրության կենտրոնում պահելը շատ կարևոր է։

«Եղունգերի վիճակը կարող է հուշել մի շարք հիվանդությունների, այդ թվում՝երկրորդ տիպի շաքարային դիաբետի մասին։ Այս հիվանդության ախտանշանները ժամանակին հայտնաբերելու դեպքում կարելի է ձեռնարկել միջոցներ, որոնք անչափ արդյունավետ կլինեն։ Եղունգների փոփոխությունները կարող են հուշել շաքարային դիաբետի վաղ փուլերի մասին», - նշում են մասնագետները։

Երկրորդ տիպի շաքարային դիաբետն ազդում է մարդու արյան մեջ շաքարի մակարդակի վրա՝ նվազեցնելով օրգանիզմի՝ ինսուլին արտադրելու և օգտագործելու կարողությունը։ Այս հորմոնն իր հերթին մասնակցում է գլյուկոզան էներգիայի վերածելու գործընթացին, ուստի դրա արտադրության գործընթացի խանգարումը կարող է շատ վտանգավոր լինել։ Նման խանգարման դեպքում մարդու օրգանիզմում շաքարի մակարդակը բարձրանում է և խնդիրը ձեռք է բերում քրոնիկ բնույթ, ինչի հետևանքով մարդու եղունգների վիճակը կարող է փոփոխվել։

Ինչպես նշում է Diabetes.UK-ի ներկայացուցիչ բժիշկ Էլիզաբեթ Սալադան, առողջ մարդու եղունգներն ունենում են վարդագույն երանգ, լինում են հարթ և չեն ունենում կառուցվածքային կամ գույնի որևէ խանգարումներ, ուստի եղունգի ձևի, հաստության, կառուցվածքի, գույնի կամ մակերևույթի վիճակի ցանկացած փոփոխություն պետք է անպայման լուրջ առիթ հանդիսանա բժշկին դիմելու համար։

Express պարբերականի հետ զրույցում մասնագետը նշել է, որ եղունգների վրա ի հայտ եկած փոքրիկ «փոսերը» հուշում են պսորիազի՝ մաշկային հիվանդություններից մեկի մասին, մինչդեռ եղունգի տակ ի հայտ եկած կարմրավուն երանգը կարող է պայմանավորված լինել շաքարային դիաբետով։

Բացի այդ, բժիշկը շեշտում է, որ շաքարային դիաբետով հիվանդներն ավելի հաճախ են բախվում եղունգների սնկային հիվանդության՝ օնիխոմիկոզի խնդրին։ Ընդ որում՝ սովորաբար սնկերն ախտահարում են ոտքերի մատների եղունգները, ինչի հետևանքով դրանք ձեռք են բերում դեղնավուն անառողջ երանգ ու դառնում են շատ ավելի փխրուն։

Եղունգները կարող են հուշել նաև այլ հիվանդությունների մասին։ Օրինակ՝ եղունգների սպիտակ երանգը կարող է պայմանավորված լինել լյարդի հիվանդություններով, իսկ մասամբ վարդագույն ու մասամբ սպիտակ եղունգները հուշում են երիկամների հիվանդությունների մասին։ Բացի այդ, եղունգի արմատային հատվածի կարմիր գույնը կարող է նախազգուշացնել սրտամկանի հիվանդությունների մասին, մինչդեռ դեղնավուն երանգ ունեցող ու հաստացած եղունգները՝ թոքերի հիվանդությունների։