Հինգ ախտանշան, որոնք հուշում են միջողային սկավառակի ճողվածքի մասին

Միջողային սկավառակի ճողվածքը բավական տարածված խնդիր է, որը հաճախ հայտնաբերվում է պատահաբար հերթական բուժզննման ընթացքում։ Շատ դեպքերում այս խանգարումը հայտնաբերվում է չափազանց ուշ, մինչդեռ այն ժամանակին նկատելն ու հնարավորինս շուտ միջոցներ ձեռնարկելը շատ կարևոր է, քանի որ թույլ է տալիս ազատվել տհաճ զգացողություններից ու բարելավել մեջքի վիճակն ու ինքնազգացողությունը։

Միջողային սկավառակի ճողվածքի առաջացման պատճառները կարող են տարբեր լինել, սակայն առավել հաճախ այս խնդիրը պայմանավորված է լինում հյուսվածքների «մաշվածությամբ», տարիքային դեգեներատիվ փոփոխություններով ու նստակյաց կենսակերպով և ֆիզիկական ակտիվության պակասով։

Այս խանգարումը կարող է դառնալ շատ տհաճ զգացողությունների պատճառ ու հանգեցնել սաստիկ ցավերի։ Ժամանակին միջոցներ չձեռնարկելու դեպքում այն կարող է դառնալ անգամ լուծանքի պատճառ, ուստի ոչ մի դեպքում չի կարելի թույլ տալ, որ հիվանդությունն այդքան խորանա։ Նման խնդիրներից խուսափելու համար հարկավոր է ժամանակին ախտորոշել հիվանդությունը, ինչը հնարավոր կլինի անել միայն խնդրի մասին հուշող ախտանշաններն իմանալու և դրանք չանտեսելու դեպքում։

Ձեր ուշադրությանն ենք ներկայացնում միջողային սկավառակի ճողվածքի մասին հուշող հինգ ախտանշան, որոնց առկայությունը ոչ մի դեպքում չի կարելի անուշադրության մատնել։

Ծանրության զգացողություն ու ցավ օրվա վերջում

Եթե նստած աշխատանք անելուց հետո օրվա վերջում նկատվում է ծանրության զգացողություն ու թույլ ցավ պարանոցի, գոտկատեղի ու կրծքավանդակի հատվածում, ապա հարկավոր է շատ ուշադիր լինել։ Ընդ որում՝ հարկավոր է հաշվի առնել, որ այս խնդրի դեպքում տհաճ զգացողություններն էլ ավելի են սաստկանում գլուխը կրծքավանդակին մոտեցնելու կամ իրանն առաջ բերելու դեպքում։

Այրոցի զգացում

Նման տհաճ զգացողությունները կարող են ի հայտ գալ ողնաշարի հատվածում՝ հուշելով միջողային սկավառակի ճողվածքի մասին։ Այս ախտանշանը ոչ մի դեպքում չի կարելի անտեսել, ուստի նման խնդրի դեպքում հարկավոր է դիմել մասնագետին։

Մկանների տոնուսի թուլացում

Այս խնդրի դեպքում շարժումները կարող են ուղեկցվել մկանների տոնուսի թուլացմամբ։ Սա սովորաբար սուր է զգացվում ձեռքերում, ինչի հետևանքով հաճախ թվում է, թե ուժերը սպառվել են։ Նման դեպքերում մարդը դժվարանում է որևէ բան պահել ձեռքերում կամ անգամ սեղմել բռունցքը, ուստի նման ախտանաշանի դեպքում հարկավոր է անհապաղ դիմել մասնագետին։

Այտուցված հատվածներ ողնաշարի մոտ

Նման այտուցները որպես կանոն առաջանում են ողնաշարի երկայնքով։ Սովորաբար դրանց սեղմելն ուղեկցվում է ցավոտ զգացողություններով, ինչը պայմանավորված է լինում մկանների սպազմներով։

Ծանրության զգացողություն ու ցավ նույն դիրքով երկար ժամանակ մնալուց հետո

Նման տհաճ զգացողությունները կարող են առաջանալ ողնաշարի ցանկացած հատվածում։ Ժամանակի ընթացքում այտուցն ավելի ու ավելի է մեծանում՝ ճնշում գործադրելով ընկալիչների վրա և հանգեցնելով ցավոտ զգացողությունների առաջացման։ Եթե երկար ժամանակ նստած դիրքով մնալն ուղեկցվում է նման զգացողություններով, ապա հարկավոր է անպայման ստուգել ողնաշարի վիճակը։

Այս ախտանշանները ոչ միշտ են պայմանավորված լինում միջողային սկավառակի ճողվածքով, սակայն դրանք այնուամենայնիվ չի կարելի անտեսել։ Եթե դրանք պահպանվում են ավելի քան վեց շաբաթ և ուղեկցվում են քնի խանգարումներով ու ձեքերի և ոտքերի թմրածությամբ, ապա հարկավոր է անպայման դիմել նյարդաբանին ու բուժզննում անցնել։ Հարկ է հիշել, որ վաղ ախտորոշումն օգնում է ավելի արդյունավետ դարձնել բուժումն ու կանխել բարդությունները, ուստի խնդիրը ոչ մի դեպքում չի կարելի անտեսել։

Նյութի աղբյուրը՝ medikforum.ru