Որոնք են նախադիաբետի մասին հուշող առաջին ախտանշաններն ու դրա զարգացմանը նպաստող գործոնները

Արյան մեջ շաքարի բարձր մակարդակը սովորաբար ասոցացվում է շաքարային դիաբետի հետ, սակայն լինում են դեպքեր, երբ այդ ցուցանիշը նորմայից բարձր է լինում, սակայն ոչ այնքան բարձր, որպեսզի հնարավոր լինել ախտորոշել շաքարային դիաբետ։ Նման վիճակը կոչվում է նախադիաբետ, որի դեպքում ժամանակին միջոցներ չձեռնարկելը կարող է ի վերջո հանգեցնել երկրորդ տիպի շաքարային դիաբետի զարգացման, սակայն խնդիրն այն է, որ նախադիաբետը հազվադեպ է ժամանակին հայտնաբերվում, քանի որ շատ հաճախ մարդիկ ուշադրություն չեն դարձնում դրա ախտանշաններին կամ վերագրում են դրանք այլ խնդիրներին։

Ռուս բժիշկ-սննդաբան Ալեքսեյ Կովալկովն իր ինստագրամյան էջում ներկայացրել է նախադիաբետի մասին հուշող առաջին ախտանշաններն ու նշել, թե որոնք են դրա զարգացմանը նպաստող ռիսկային գործոններն ու ովքեր են գտնվում ռիսկային խմբում։ Մասնագետի խոսքով՝ այս խանգարումը շատ տարածված է և կարող է հեշտությամբ վերածվել շաքարային դիաբետի։ Ընդամենը հինգ տարվա ընթացքում նախադիաբետով հիվանդ յուրաքանչյուր երկրորդը կարող է բախվել երկրորդ տիպի շաքարային դիաբետի խնդրին, ուստի այս խանգարումը ժամանակին նկատելը շատ կարևոր է։

Նախադիաբետը զարգանում է օրգանիզմում ինսուլինի բալանսի խանգարման ֆոնին, իսկ այս հորմոնի արտադրության համար պատասխանատու է ենթաստամոքսային գեղձը, ուստի ոմանց մոտ կարող է նկատվել անգամ ինսուլինակայունություն։ Նախադիաբետի զարգացմանը նպաստող գործոնների շարքում մասնագետն առանձնացնում է ավելորդ քաշը, ժառանգական նախատրամադրվածությունը, 45 տարեկանից բարձր տարիքը, շաքարի բարձր մակարդակը, կանանց մոտ ձվարանների պոլիկիստոզային համախտանիշը, ինչպես նաև էրեկտիլ դիսֆունկցիան տղամարդկանց մոտ։ Հիվանդության զարգացման հավանականությունը նվազեցնելու և շաքարային դիաբետի զարգացումը կանխելու համար առաջին հերթին հարկավոր է խուսափել այս գործոններից։

Նախադիաբետը կարող է երկար տարիներ զարգանալ առանց որևէ ախտանշանի, ինչի պատճառով էլ այն համարվում է շատ վտանգավոր։ Հիվանդների շուրջ 84%-ը կարող է անգամ չնկատել խնդիրը մինչ դրա բարդանալը։ Սակայն կան որոշակի ախտանշաններ, որոնք կարող են հուշել խնդրի զարգացման մասին՝ թույլ տալով ժամանակին հայտնաբերել այն ու միջոցներ կիրառել հետագա զարգացումը կանխելու համար։

Առաջին հերթին մասնագետը խորհուրդ է տալիս ուշադություն դարձնել ծարավի զգացումին, հաճախամիզությանն ու քաղցի զգացումին, որը պահպանվում է անգամ սնվելուց հետո։ Շատերը գանգատվում են նաև մաշկի չորությունից, որն առավել ակնհայտ է լինում արմունկների հատվածում։ Բացի այդ, նախադիաբետի մասին կարող է հուշել նաև տեսողության աղոտացումն ու մաշկին անբացատրելի մուգ բծերի առաջացումը, որոնք ևս չի կարելի անտեսել։

Հնարավոր ախտանշանների շարքին են դասվում նաև անբացատրելի հոգնածության զգացումը, քնի հետ կապված խնդիրները, քաշի կորուստն ու վերջույթների թմրածությունը, ուստի նման ախտանշանների դեպքում ևս խորհուրդ է տրվում դիմել բժշկին ու ստուգել արյան մեջ շաքարի մակարդակը։