Լյարդի հիվանդությունների մասին հուշող վեց ախտանշան, որոնք ոչ մի դեպքում չի կարելի անտեսել

Լյարդը մարդու ամենակարևոր օրգաններից մեկն է, ուստի դրա աշխատանքի խանգարումը բացասաբար է անդրադառնում ամբողջ օրգանիզմի վրա։ Լուրջ խնդիրներից խուսափելու համար այս օրգանի հիվանդությունները հարկավոր է հնարավորինս շուտ նկատել ու սկսել բուժումը, սակայն խնդիրն այն է, որ դրանք բավական դժվար են ախտորոշվում և հաճախ հայտնաբերվում են միայն զարգացման ուշ փուլերում։

Լյարդը յուրահատուկ օրգան է, որն ունակ է ինքնուրույն վերականգնվել անգամ լուրջ վնասվածքների դեպքում, սակայն լինում են դեպքեր, երբ օրգանը չի ունենում բավարար պաշարներ վերականգնման համար, ուստի նախազգուշացնում է խնդրի մասին որոշակի ախտանշանների միջոցով։ Այդ ախտանշաններն իմանալը կօգնի ժամանակին նկատել խանգարումն ու միջոցներ ձեռնարկել խնդրից ազատվելու համար, ուստի ձեր ուշադրությանն ենք ներկայացնում լյարդի հիվանդությունների մասին հուշող վեց ախտանշան, որոնք ոչ մի դեպքում չի կարելի անուշադրության մատնել։

Լեզվին առաջացած դեղին փառ

Լյարդի հիվանդությունների դեպքում լեզուն հաճախ է պատվում դեղին փառով։ Ընդ որում` փառի գույնի ինտենսիվությունը ու դրա քանակությունը կախված է հիվանդության տեսակից։ Օրինակ` հեպատիտների վաղ փուլերում դեղնավուն երանգ կարող է նկատվել լեզվի առջևի հատվածում, խիտ դեղնականաչավուն փառը բնորոշ է մարսողական տրակտի, լյարդի և լեղուղիների ծանր ախտաբանություններին, իսկ փառի վառ դեղին գույնը սովորաբար հուշում է լեղու լճացման մասին։

Սրտխառնոց ու փսխում

Այս ախտանշանը բնորոշ է մարսողական տրակտի տարբեր հիվանդություններին, սակայն առավել արտահայտված է լինում լյարդի հիվանդությունների դեպքում։ Սրտխառնոցի ֆոնին հիվանդների մոտ հաճախ նկատվում են նաև ախորժակի վատթարացում կամ անգամ կորուստ, ինչպես նաև փորլուծություն ու ցավոտ զգացողություններ աջ կողատակի հատվածում։ Երբեմն սրտխառնոցը հանգեցնում է փսխման, ինչի շնորհիվ տհաճ զգացողությունները ժամանակավորապես մեղմվում են։ Ընդ որում` լյարդի հիվանդությունների ժամանակ փսխման դեպքում կարող են նկատվել լեղու հետքեր

Կղանքի արտասովոր բաց գույն

Կղանքի արտասովոր բաց գույնը կարող է նկատվել լյարդի, ենթաստամոքսային գեղձի ու լեղուղիների որոշ հիվանդությունների դեպքում։ Բացի այդ, նման ախտանշան կարող է նկատվել նաև որոշակի դեղորայքի ընդունումից ու չափազանց յուղոտ մթերքի գործածությունից հետո։ Լյարդի հիվանդություններով պայմանավորված լինելու դեպքում այս ախտանշանը պահպանվում է մի քանի օր և ուղեկցվում է հավելյալ ախտանշաններով։

Տարատեսակ արյունահոսություններ

Լյարդի աշխատանքի երկարատև խանգարումները (օրինակ՝ հեպատիտները) կարող են հանգեցնել արյան մակարդելիության բազմաթիվ գործոնների սինթեզի նվազման, ինչի հետևանքով հիվանդի մոտ կարող են նկատվել տարատեսակ անսպասելի արյունահոսություններ։ Օրինակ՝ կարող են նկատվել տարբեր ներքին արյունահոսություններ, քթային արյունահոսություն, լնդերի արյունահոսություններ կամ դաշտանային առատ արյունահոսություններ։

Մաշկի ու լորձաթաղանթների դեղնավուն երանգ

Լյարդի ախտաբանությունների մասին հուշող նման ախտանշանները պայմանավորված են լինում արյան ու հյուսվածքների մեջ այն գունանյութերի կուտակմամբ, որոնք պարունակվում են լեղու մեջ։ Այս ախտանշանը հաճախ է նկատվում հեպատիտների կամ ցիռոզի դեպքում և ուղեկցվում է մեզի գույնի մգացմամբ ու կղանքի գույնի բացացմամբ։ Սակայն հարկ է հիշել, որ դեղնուկը կարող է պայմանավորված լինել նաև լեղաքարային հիվանդությամբ, և հենց սա է պատճառը, որ հստակ ախտորոշման համար հարկավոր է նաև հավելյալ հետազոտություններ անցկացնել։

Բերանում դառը համի առկայություն

Լյարդի հիվանդությունների դեպքում բերանում դառնահամի առկայությունը պայմանավորված է լինում ստամոքսից կերակրափող լեղու արտամղմամբ։ Նման ախտանշան կարող է նկատվել լյամբլիոզի, վիրուսային հեպատիտների, ստեատոզների, ցիռոզի կամ լյարդի ուռուցքների դեպքում։ Երբեմն նման տհաճ խնդիրը պայմանավորված է լինում սթրեսային իրավիճակներով ու որոշակի դեղորայքի ընդունմամբ կամ նկատվում է լեղապարկի, լեղածորանների կամ աղեստամոքսային տրակտի հիվանդությունների դեպքում։ Սա է պատճառը, որ բերանում դառը համի առկայության դեպքում հարկավոր է անպայման մանրակրկիտ բուժզննում անցնել խնդրի պատճառը պարզելու համար։

Նյութի աղբյուրը՝ med2.ru