Ինչ չի կարելի անել հարբուխի դեպքում. խորհուրդներ բժիշկներից

Հարբուխը շնչառական համակարգն ախտահարող ամենատարածված հիվանդություններից մեկն է, որը սովորաբար դրսևորվում է հազով, քթաբորբով կոկորդի ցավով ու մի շարք այլ ախտանշաններով։ Այս հիվանդության դեպքում մարդիկ հազվադեպ են դիմում բժշկին, քանի որ չեն համարում այն լուրջ խնդիր, սակայն մասնագետները նախազգուշացնում են հիվանդությունն անուշադրության մատնելը կարող է շատ վտանգավոր լինել՝ հանգեցնելով լուրջ բարդությունների զարգացման։

Շատերի կարծիքով՝ հարբուխի դեպքում լուրջ միջոցներ ձեռնարկելու անհրաժեշտություն չկա և կարելի է վարել բնականոն կյանք, սակայն բժիշկները նախազգուշացնում են, որ այնուամենայնիվ կան որոշ սովորություններ, որոնցից հարբուխի դեպքում հարկավոր է հրաժարվել։

Medikforum.ru կայքը ներկայացրել է, թե ինչ չի կարելի անել հարբուխի դեպքում։

Լոգանք ընդունել

Մրսածության դեպքում շատերը որպես բուժման միջոց տաք լոգանք են ընդունում, մինչդեռ այս հիվանդության դեպքում լոգանքը հակացուցված է։ Այս պրոցեդուրան ավելորդ լարվածություն կստեղծի արյան շրջանառության համակարգի համար և էլ ավելի կթուլացնի օրգանիզմը, ուստի դրանից հարկավոր է հրաժարվել։

Շոգեբաղնիք հաճախել

Բժիշկների խոսքով՝ շոգեբաղնիք հաճախելը կարող է շատ ավելի վտանգավոր լինել, քան տաք լոգանքը։ Բանն այն է, որ տաք ու խոնավ օդը ծանրաբեռնում է արյան շրջանառության համակարգ։ Բացի այդ, նման միջավայրում մանրէները շատ ավելի արագ են բազմանում։ Սա է պատճառը, որ մրսածության դեպքում շոգեբաղնիք հաճախելը կտրականապես հակացուցված է։

Մրսածությանը պատշաճ ուշադրություն չդարձնել

Մասնագետները հաճախ են նշում, որ մրսածությունը զարգանում է երեք օր, երեք օր պահպանվում է, որից հետո ևս երեք օրվա ընթացքում՝ անցնում։ Եթե ինը օր անց տհաճ ախտանշանները, բարձր ջերմությունն ու քթային արտադրությունը պահպանվում են, ապա հարկավոր է դիմել բժշկին ու չզբաղվել ինքնաբուժությամբ։ Նման դեպքերում խնդիրն անուշադրության մատնելը կարող է շատ վտանգավոր լինել։

Աշխատանքի գնալ

Ոչ շատ լուրջ դեպքերում հարբուխը չի դրսևորվում չափազանց տհաճ ախտանշաններով, ուստի շատերը գերադասում են չբացակայել աշխատանքից հիվանդության պատճառով, սակայն մասնագետները նախազգուշացնում են, որ անկախ ինքնազգացողությունից հիվանդության առաջին օրերին հիվանդները շատ վտանգավոր են, քանի որ համարվում են վիրուսակիր և կարող են վարակել նաև մյուս աշխատակիցներին՝ դառնալով վիրուսի տարածման պատճառ։

Շնչառություն կարգավորման համար նախատեսված կաթիլներ օգտագործել

Հարբուխը հաճախ է ուղեկցվում քթաբորբով ու քթի փակվածությամբ, ուստի շնչառության կարգավորման համար մարդիկ հաճախ են կիրառում հատուկ կաթիլներ, սակայն հարկ է հիշել, որ նման դեղամիջոցների գործածությունը կարող է հանգեցնել այտուցման ու լորձաթաղանթների չորացման, ինչը ոչ միայն չի լուծի խնդիրը, այլև էլ ավելի կվատթարացնի վիճակը։ Սա է պատճառը, որ հնարավորության դեպքում մասնագետները հորդորում են խուսափել նման դեղամիջոցներից ու օգտագործել դրանք միայն ծայրահեղ անհրաժեշտության դեպքում։ Հարկ է հիշել, որ մարդու օրգանիզմն ունի վերականգնման համար անհրաժեշտ պաշարներ, ուստի կարող է ինքնուրույն հաղթահարել խնդիրը։ 

Անկողնային ռեժիմով բուժվել

Հարբուխի դեպքում օրգանիզմին հարկավոր է հանգիստ ու ֆիզիկական ակտիվության սահմանափակում, սակայն անկողնային ռեժիմի անհրաժեշտություն չկա։ Ավելին՝ մաքուր օդին զբոսնելը կարող է հիանալի բուժիչ պրոցեդուրա լինել, քանի որ կօգնի թթվածին ու վիտամին D ստանալ, կխթանի արյան շրջանառությունը և կհանգստացնի գրգռված լորձաթաղանթները։ Սա է պատճառը, որ անկողնային ռեժիմի փոխարեն հարկավոր է պարզապես ավելի շատ հանգստանալ և ժամանակ առ ժամանակ զբոսնել մաքուր օդին՝ չմոռանալով տաք հագուստի մասին։

Տաք կաթ խմել

Մի գդալ մեղրով տաք կաթը բուժման ամենատարածված միջոցներից մեկն է, որը շատերն են կիրառում, սակայն մասնագետները հորդորում են հրաժարվել այս սովորությունից։ Բանն այն է, որ հազի դեպքում այն ոչ միայն անարդյունավետ է, այլև խթանում է լորձի արտազատումը՝ դրանով իսկ էլ ավելի վատթարացնելով հիվանդի վիճակն ու հանգեցնելով հազի խորացման։

Վազքով զբաղվել

Բժիշկները նախազգուշացնում են, որ հարբուխի դեպքում վազքով զբաղվելը կտրականապես հակացուցված է, քանի որ կարող է շատ վտանգավոր լինել։ Բանն այն է, որ վազքի ժամանակ ախտածին միկրոօրգանիզմները գրոհում են սրտամկանը, ինչը վատագույն դեպքում կարող է հանգեցնել սրտամկանի բորբոքման՝ միոկարդիտի զարգացման։