Լավագույն բնական միջոցները կոկորդի ցավն առանց դեղորայքի մեղմելու համար

Կոկորդի ցավը շնչառական համակարգի հիվանդություններին բնորոշ ամենատարածված ախտանշաններից մեկն է, սակայն այն կարող է հանդես գալ նաև որպես առանձին խնդիր: Նման ցավը բավական տհաճ է և բացասաբար է անդրադառնում կյանքի որակի վրա, ուստի զարմանալի չէ, որ մարդիկ փորձում են հնարավորինս շուտ ազատվել դրանից:

Նման դեպքերում հաճախ կիրառվում են բուժիչ օշարակներ կամ սառնաշաքարներ, սակայն նմանատիպ ազդեցությամբ օժտված դեղամիջոցներ կարելի է պատրաստել նաև ինքնուրույն՝ օգտագործելով միայն բնական բաղադրիչներ: 

Aif.ru կայքը ներկայացրել է վեց արդյունավետ ու փորձված ժողովրդական դեղամիջոցի բաղադրատոմս, որոնք կօգնեն հեշտությամբ մեղմել կոկորդի ցավը: 

• 1 թեյի գդալ անիսոնի սերմերին ավելացնել մի բաժակ եռման ջուր, 15 րոպե դնել տաք գոլորշու վրա, այնուհետև թրմել ևս կես ժամ։ Ստացված թուրմը բաժանել երեք մասի և խմել օրվա ընթացքում։
• 1:2 հարաբերակցությամբ խառնել լորենու ծաղիկներն ու կաղնու կեղևը, այնուհետև ստացված խառնուրդի 1 ճաշի գդալին ավելացնել մի բաժակ եռման ջուր, հինգ րոպե դնել թույլ կրակին, որից հետո մեկ ժամ թրմել թերմոսի մեջ։ Ստացված եփուկը քամել, ավելացնել մի փոքր մեղր և օգտագործել գոլ հեղուկը կոկորդը ողողելու համար։
• 2:2:1 հարաբերակցությամբ խառնել տատրակի տերևները, տուղտի արմատն ու խնկածաղիկը, այնուհետև ստացված խառնուրդի 1 ճաշի գդալին ավելացնել մի բաժակ եռման ջուր ու թրմել մինչև հեղուկը սառչի։ Ստացված թուրմը հարկավոր է խմել օրական 3-4 անգամ կես բաժակ։ Ցանկության դեպքում կարելի է քաղցրացնել այն մեղրով։ 
• 1 թեյի գդալ մանուշակի ծաղիկներին ավելացնել մի բաժակ եռման ջուր, թողնել մի փոքր թրմվի, այնուհետև ստացված հեղուկն օգտագործել կոկորդը ողողելու համար։ Բացի այդ, հարկավոր է նաև օրական 4-5 անգամ երկուական ճաշի գդալ թուրմ խմել։
• 1 ճաշի գդալ մանուշակի ծաղիկներին ավելացնել 100 մլ սպիրտ, թրմել, այնուհետև ստացված ոգեթուրմը ընդունել օրական երեք անգամ ուտելուց առաջ 1 ճաշի գդալ։ 
• Այս ոգեթուրմը կարելի է կիրառել նաև կոկորդի ողողումների համար։ Հարկավոր է 10 մլ ոգեթուրմը լուծել մի բաժակ գոլ ջրում և լուծույթն օգտագործել ողողումների համար։

Այս բնական միջոցները շատ արդյունավետ են տհաճ զգացողությունները մեղմելու համար, սակայն հարկ է հիշել, որ առողջական լուրջ խնդիրների դեպքում հարկավոր է անպայման դիմել մասնագետին, քանի որ ինքնաբուժությունը կարող խիստ վնասակար լինել ու էլ ավելի վատթարացնել հիվանդի վիճակը: Նման խնդիրներից խուսափելու համար հարկավոր է անպայման խորհրդակցել բժշկի հետ, քանի որ միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ: