Լավագույն բնական միջոցը հարբուխի դեմ պայքարի համար

Հարբուխն ամենատարածված հիվանդություններից մեկն է, որը սովորաբար սեզոնային բնույթ է կրում, սակայն այնուամենայնիվ կարող է ի հայտ գալ տարվա ցանկացած եղանակին։ Շատ հաճախ մարդիկ պարզապես անուշադրության են մատնում այս հիվանդությունը՝ շարունակելով վարել սովորական կենսակերպ, քանի որ որպես կանոն հարբուխը բուժվում է առանց որևէ միջամտության ընդամենը մի քանի օրում, սակայն միևնույն ժամանակ այն կարող է դրսևորվել բավական տհաճ ախտանշաններով ու խիստ բացասաբար անդրադառնալ մարդու կյանքի որակի վրա, ուստի մասնագետները խորհուրդ են տալիս անպայման միջոցներ ձեռնարկել հիվանդության տհաճ դրսևորումները մեղմելու համար:

Հարբուխի ախտանշաններից ազատվելու համար մարդիկ հաճախ ընդունում են հատուկ դեղամիջոցներ, սակայն մասնագետները վստահ են, որ խնդրի դեմ կարելի է պայքարել նաև բնական միջոցներով, որոնք շատ ավելի անվտանգ են ու հասանելի։ Ավելին այս բնական միջոցներն իրենց արդյունավետությամբ չեն զիջում դեղորայքին, իսկ որոշ դեպքերում կարող են անգամ ավելի արդյունավետ լինել, ուստի մինչ դեղատնային միջոցներ կիրառելը կարելի է նախ փորձել բուժվել դրանց օգնությամբ։

Նման բնական միջոցներից ամենատարածվածը քրքումով կաթն է, որն ամրապնդում է իմունային համակարգն ու հատկապես արդյունավետ է տարվա ցուրտ եղանակներին։ Այս ըմպելիքի հիմնական բաղադրիչներից մեկը քրքումն է, որն արդյունավետ բնական միջոց է կոկորդի ցավի, քթաբորբի ու հազի դեմ պայքարում։ Այս համեմունքն օժտված է հակաբորբոքային ու հակաբակտերիալ ազդեցությամբ, իսկ հիլի և պղպեղի հետ համադրելու դեպքում այն իր արդյունավետությամբ չի զիջի անգամ լավագույն դեղորայքին։

Ավելին՝ այս ըմպելիքն օգնում է նաև պայքարել ավելորդ քաշի դեմ, ինչը պայմանավորված է նրանով, որ այն բարելավում է մարսողությունն ու օգնում է երկար ժամանակով մոռանալ քաղցի զգացման մասին։

Ըմպելիքի պատրաստման համար անհրաժեշտ բաղադրիչներն են.

• 1 բաժակ կաթ,
• ½ թեյի գդալ քրքում,
• 2-3 պղպեղի հատիկ,
• 1 մանրացրած հիլ.

Ըմպելիքի պատրաստման եղանակը.

Այս օգտակար ըմպելիքի պատրաստման համար հարկավոր է կաթը լցնել կաթսայի մեջ, ավելացնել պղպեղի հատիկներն ու աղացած հիլը, այնուհետև ավելացնել նաև քրքումի փոշին ու խառնել մինչև ստացվի դեղնաոսկեգույն ըմպելիք։ Դնել կաթսան կրակին ու տաքացնել կաթը, այնուհետև քամել ու թողնել սառչի մինչև խմելու համար հաճելի ջերմաստիճանին հասնի։ Ցանկության դեպքում կարելի է քաղցրացնել ըմպելիքը մեղրով։

Նյութի աղբյուրը՝ Freundin պարբերական