Սննդամթերքի տեսակներ, որոնք օգնում են վերահսկողության տակ պահել արյան մեջ շաքարի մակարդակը

Շաքարային դիաբետն ամենավտանգավոր ու տարածված հիվանդություններից մեկն է, որի դեպքում մարդիկ ստիպված են մշտական վերահսկողության տակ պահել արյան մեջ շաքարի մակարդակի ցուցանիշը՝ թույլ չտալով, որ այն նորմայից բարձր կամ ցածր լինի։ Բացի այդ, շաքարային դիաբետով հիվանդները պետք է նաև միջոցներ ձեռնարկեն իմունային համակարգի ամրապնդման համար, քանի որ արյան մեջ գլյուկոզայի մակարդակի բարձրացումը հանգեցնում է իմունային համակարգի թուլացման՝ բարձրացնելով վարակումների հավանականությունը։

Սովորաբար այս հիվանդության դեպքում մասնագետները նշանակում են հատուկ դեղամիջոցներ, սակայն գոյություն ունեն նաև շատ օգտակար սննդամթերքի տեսակներ, որոնք կօգնեն կարգավորել արյան մեջ գլյուկոզայի մակարդակն ու պահել այն նորմայի սահմաններում անգամ առանց դեղորայքի։ Սննդամթերքի այդ տեսակները, ոչ միայն բարելավում են շաքարի մակարդակի վերահսկման մեխանիզմները, այլև օգնում են պահպանել ֆիզիկական լավ վիճակը, ինչը շատ կարևոր է շաքարային դիաբետի կանխարգելման համար

Առհասարակ մարդու սննդակարգը շատ կարևոր նշանակություն ունի արյան մեջ շաքարի մակարդակը կայուն պահելու համար, ուստի օգտագործվող մթերքին հարկավոր է շատ լուրջ ուշադրություն դարձնել։ Հետազոտությունները ցույց են տվել, որ սննդակարգում մի քանի փոփոխություն անելն ու որոշակի սննդամթերքի տեսակներ օգտագործելը կարող է բարելավել արյան մեջ շաքարի մակարդակի վերահսկողության մեխանիզմներն ու նվազեցնել հիպերգլիկեմիայի հետևանքով բարդությունների զարգացման հավանականությունը, ուստի ձեր ուշադրությանն ենք ներկայացնում դրանցից մի քանիսը։

Մուգ կանաչ տերևավոր բանջարեղեն

Սպանախը, կաղամբի տարբեր տեսակներն ու մուգ կանաչ տերևավոր այլ բանջարեղենը հարուստ են վիտամիններով, հանքանյութերով ու հակաօքսիդանտներով (օրինակ՝ A, C, E և K վիտամիններով, երկաթով, կալցիումով, կալիումով և այլն), սակայն միաժամանակ ունեն ցածր կալորիականություն ու չեն պարունակում մեծ քանակությամբ ածխաջրեր։ Նման բաղադրության շնորհիվ բանջարեղենի այս տեսակները համարվում են լավագույններից մեկն արյան մեջ շաքարի մակարդակը կայուն պահելու համար։

Լոբի

Լոբին ամենահասանելի սննդամթերքի տեսակներից մեկն է, որը նաև բուսական սպիտակուցի, որոշ վիտամինների ու հանքանյութերի հիանալի աղբյուր է։ Բացի այդ, լոբու մեջ պարունակվող մեծ քանակությամբ մանրաթելերն օգնում են արդյունավետ կերպով նվազեցնել որովայնի հատվածում ճարպային կուտակումները, ինչը նույնպես շատ կարևոր է շաքարի բարձր մակարդակի դեմ պայքարի համար։ Սակայն մասնագետները նախազգուշացնում են, որ պահածոյացված լոբի օգտագործելու դեպքում այն հարկավոր է նախապես լավ լվանալ։ 

Լոլիկ

Շատ հասանելի ու օգտակար մթերք է նաև լոլիկը։ Այս մթերքը չի պարունակում օսլա և ունի ցածր գլիկեմիկ ինդեքս, ինչը նշանակում է, որ լոլիկի գործածությունը չի հանգեցնի արյան մեջ գլյուկոզայի մակարդակի կտրուկ տատանումներ։ Միևնույն ժամանակ լոլիկը հարուստ է մի շարք կենսական նշանակություն ունեցող սննդարար նյութերով, որոնց շարքին են դասվում վիտամին C-ն, վիտամին E-ն և կալիումը։

Հավկիթ

Հավկիթը բարձրորակ սպիտակուցի ամենահասանելի աղբյուրն է, ուստի այն սննդակարգում ներառելը կարող է շատ օգտակար լինել։ Դիաբետիկների ամերիկյան ընկերակցության գիտնականները հավկիթը համարում են հիանալի մթերք շաքարային դիաբետով հիվանդների համար, քանի որ այն պարունակում է շատ քիչ քանակությամբ ածխաջրեր ու ունի ցածր գլիկեմիկ ինդեքս։ Գիտնականների տվյալներով՝ նախադիաբետի կամ երկրորդ տիպի շաքարային դիաբետի դեպքում առավոտյան դատարկ ստամոքսին հավկիթ ուտելը կարող է զգալիորեն բարելավել արյան մեջ գլյուկոզայի մակարդակը, ուստի այս մթերքն ամենօրյա սննդակարգում ներառելը կարող է շատ օգտակար լինել։

Հատապտուղներ

Իրենց յուրահատուկ համի շնորհիվ հատապտուղները համարվում են քաղցր ուտելու ցանկությունը հագեցնելու լավագույն միջոցը։ Ընդ որում՝ այս մթերքը միաժամանակ ունի նաև շատ ցածր գլիկեմիկ ինդեքս, ուստի չի հանգեցնում արյան մեջ շաքարի մակարդակի կտրուկ տատանումների։

Ինչ չի կարելի ուտել և ինչ է հարկավոր անել

Արյան մեջ շաքարի մակարդակը վերահսկողության տակ պահելու համար հարկավոր է ոչ միայն հարստացնել սննդակարգը սննդամթերքի որոշակի տեսակներով, այլև բացառել որոշները սննդակարգից կամ սահմանափակել դրանց գործածությունը։ Նման դեպքերում վտանգավոր են համարվում տրանսճարպերով, նատրիումով ու մեծ քանակությամբ շաքարով հարուստ մթերքը, որից հարկավոր է խուսափել։

Բացի այդ, շատ կարևոր է նաև ընդհանուր ֆիզիկական ու հոգեկան առողջությունը, ուստի արյան մեջ շաքարի մակարդակը կայուն պահելու համար հարկավոր է լինել ֆիզիկապես ակտիվ ու յուրացնել մեթոդներ, որոնք թույլ կտան հեշտությամբ հաղթահարել սթրեսը։

Նյութի աղբյուրը՝ Times Now