Քրոնիկ բորբոքման մասին հուշող չորս ախտանշան, որոնք մարդիկ հաճախ են անուշադրության մատնում

Բորբոքումն օրգանիզմի բնածին իմունային պատասխանն է վտանգավոր խթաններին, որոնց շարքին են դասվում ախտածին պաթոգենները, վնասված բջիջներն ու շրջակա միջավայրի տոքսինները։ Նման գործոնների առկայության դեպքում իմունային համակարգը գործարկում է բորբոքային ռեակցիան՝ փորձելով օգնել օրգանիզմին ազատվել վտանգից ու սկսել ապաքինվել։

Բորբոքումը շատ կարևոր է օրգանիզմի համար, սակայն երկար պահպանվելու դեպքում այն կարող է խիստ վտանգավոր լինել։ Ընդ որում՝ այն կարող է երկար պահպանվել ամենատարբեր պատճառներով, որոնց շարքին են դասվում անգամ սխալ սննդակարգն ու ֆիզիկական ակտիվության պակասը։ Նման դեպքերում միջոցներ չձեռնարկելը կհանգեցնի կայուն բորբոքման, որն էլ կարող է դառնալ մի շարք վտանգավոր քրոնիկ հիվանդությունների, այդ թվում՝ սրտի հիվանդությունների, շաքարային դիաբետի ու քաղցկեղի զարգացման պատճառ։ Սա է պատճառը, որ նման խնդիրներից խուսափելու համար հարկավոր է հնարավորինս շուտ ազատվել քրոնիկ բորբոքումից։

Այս խնդրից ազատվելու և անդառնալի վնասներից խուսափելու համար հարկավոր է առաջին հերթին հասկանալ՝ արդյոք բորբոքումն արդեն քրոնիկ բնույթ է ստացել, ուստի անհրաժեշտ է ուշադրություն դարձնել օրգանիզմի տված հուշումներին, սակայն խնդիրն այն է, որ քրոնիկ բորբոքման մասին հուշող ախտանշանները հաճախ ակնհայտ չեն լինում կամ վերագրվում են այլ խնդիրներին, ինչի հետևանքով էլ մարդիկ հազվադեպ են ժամանակին նկատում խանգարումը։ Այնուամենայնիվ կան ախտանշաններ, որոնք նկատելու դեպքում հարկավոր է դիմել մասնագետին ու միջոցներ ձեռնարկել օրգանիզմում բորբոքման մակարդակը նվազեցնելու համար։ Այդ ախտանշաններն են.

Վահանագեղձի աշխատանքի խանգարումը

Քրոնիկ բորբոքումը կարող է հանգեցնել հիպոթիրեոզի՝ վահանագեղձի ակտիվության պակասի զարգացման, ինչի հետևանքով այս կարևոր օրգանը չի արտադրի կենսական նշանակություն ունեցող հորմոններն անհրաժեշտ քանակությամբ։ Հիպոթիրեոզն անտեսելն և չբուժելը կարող է հանգեցնել նյութափոխանակության խանգարումների, հոգնածության ու դեպրեսիաների զարգացման։ Նման խնդիրներից խուսափելու համար հարկավոր է ժամանակին հայտնաբերել հիվանդությունն ու միջոցներ ձեռնարկել։ Այս խնդրի մասին հուշող առաջին ախտանշաններից են մազերի որակի անսպասելի վատթարացումն ու մազաթափությունը, ուստի նման խնդիրներ նկատելու դեպքում հարկավոր է անհապաղ դիմել ներզատաբանին ու բուժզննում անցնել։

Քնի վատ որակը

Քրոնիկ բորբոքումները կարող են հանգեցնել քնի խանգարումների ու դառնալ անքնության պատճառ, իսկ քնի պակասի դեպքում բորբոքման մակարդակը նվազեցնելն ու ապաքինման գործընթացը խթանելը դժվարանում է։ Սա նշանակում է, որ բորբոքումներից ազատվելու համար հարկավոր է առաջին հերթին կարգավորել քունը, մինչդեռ քնի կարգավորումն անմիջականորեն կախված է բորբոքման մակարդակից։

Սթրեսի բարձր մակարդակը

Սթրեսային գործոնների հաճախակի ազդեցությունը հանգեցնում է օրգանիզմում կորտիզոլի՝ սթրեսի հորմոնի  մակարդակի բարձրացման։ Բացի այդ, սթրեսը նաև գործարկում է մարմնի «պայքարի» կամ «փախուստի» ռեժիմը, ինչը ևս բացասաբար է անդրադառնում օրգանիզմի վրա։

Սննդային անհանդուրժողականությունը

Սթրեսի ու բորբոքման բարձր մակարդակի մասին կարող է հուշել նաև այս կամ այն սննդամթերքի նկատմամբ օրգանիզմի անհանդուրժողականությունը։ Սննդային անհանդուրժողականության զարգացման համար պատասխանատու է մարդու իմունային համակարգը, ուստի որոշակի մթերքի նկատմամբ զգայուն լինելու դեպքում տվյալ մթերքի գործածությունը կարող է հանգեցնել բորբոքային ռեակցիայի զարգացման։

Նյութի աղբյուրը՝ medikforum.ru