4 տարածված ռիսկային գործոն, որոնց առկայության դեպքում գրիպը շատ ավելի վտանգավոր կարող է լինել

19:16 • 02.11.20

Վերջին ամիսներին մարդկանց ուշադրության կենտրոնում է միայն համավարակի վերածված COVID-19-ը, սակայն առողջապահության ոլորտի փորձագետները նախազգուշացնում են, որ ոչ պակաս կարևոր է նաև սեզոնային գրիպից պաշտպանվելը, քանի որ այն նույնպես կարող է շատ վտանգավոր լինել ու առողջության համար լուրջ հետևանքներ ունենալ։

Գրիպը շնչառական համակարգն ախտահարող ամենատարածված վիրուսային հիվանդություններից մեկն է, որը խիստ վտանգավոր է և կարող է մի շարք ոչ պակաս վտանգավոր կողմնակի բարդությունների պատճառ դառնալ։ Ընդ որում՝ որոշակի ռիսկային գործոնների առկայության դեպքում այս վարակիչ հիվանդությունը շատ ավելի վտանգավոր է լինում, մինչդեռ մարդիկ այնուամենայնիվ հազվադեպ են դրան պատշաճ ուշադրություն դարձնում։

Մասնագետները ներկայացրել են չորս տարածված կարևոր գործոն, որոնց առկայության դեպքում գրիպը կարող է մահացու վտանգավոր լինել։

65 տարեկան և 65 տարեկանից բարձր տարիք

Տարեց անձինք այն ռիսկային խմբում են, որն առավել շատ է տուժում գրիպից ու կորոնավիրուսային վարակից։ Գրիպով պայմանավորված մահվան դեպքերի 70-85%-ը, ինչպես նաև գրիպով հիվանդների հոսպիտալացման դեպքերի 70%-ը գրանցվում է 65 տարեկան և 65 տարեկանից բարձր տարիքի անձանց շրջանում։ ԱՄՆ-ի Ինֆեկցիոն հիվանդությունների ազգային հիմնադրամի գնահատականներով՝ տարիքային այս խմբում գտնվող մարդկանց շուրջ 50%-ի մոտ առկա է նաև երկրորդ ռիսկային գործոնը, ինչի հետևանքով նրանք շատ ավելի խոցելի են լինում։ Սա պայմանավորված է լինում նրանով, որ տարեց անձանց իմունային համակարգը պարզապես նույնքան կայուն չի լինում, որքան երիտասարդ տարիքում էր, ուստի օրգանիզմի դիմադրողականությունն անկում է և ախտածին տարրերը հեշությամբ են այն ախտահարում։

Սրտի հիվանդություններ կամ անամնեզում գլխուղեղի կաթվածի առկայություն

Վերջին տարիներին գիտնականները նկատել են, որ գրիպի ու սրտի հիվանդությունների միջև կա կապ։ Օրկնակ՝ օգոստոսին հրապարակված CDC-ի հետազոտությունը ցույց է տվել, որ գրիպով հոսպիտալացված տարեց հիվանդներից ութից մեկի մոտ երբևէ որևէ լուրջ սրտանոթային խնդիր է ախտորոշվել։ Հետազոտության համար գիտնականները դիտարկել են 80 000 մարդու տվյալները։ Ավելին՝ 2018 թվականին հրապարակված մեկ այլ հետազոտություն էլ ցույց է տվել, որ գրիպի ախտորոշումից հետո մեկ շաբաթվա ընթացքում սրտի նոպայի հավանականությունը սովորականից բարձր է լինում վեց անգամ, ինչը ևս հաստատում է այս հիվանդությունների միջև առկա կապը։

Շաքարային դիաբետ

Շաքարային դիաբետը խիստ բացասաբար է անդրադառնում իմունային համակարգի վրա և հանգեցնում է իմունիտետի անկման, ինչի հետևանքով օրգանիզմը դժվարությամբ է պայքարում հիվանդությունների դեմ։ Բացի այդ, գրիպը վատթարացնում է արյան մեջ շաքարի մակարդակի վերահսկման գործընթացը, ուստի վարակին ի պատասխան գլյուկոզայի մակարդակը կարող է բարձրանալ կամ սաստիկ նվազել ինչպես հարկն է չսնվելու դեպքում։ Միևնույն ժամանակ գրիպի ախտանշանները կարող են թույլ չտալ ժամանակին նկատել արյան մեջ շաքարի մակարդակի բարձրացման կամ անկման մասին հուշող նախանշանները, ինչը կարող է շատ վտանգավոր լինել։ Մասնագետների խոսքով՝ շաքարային դիաբետի դեպքում գրիպով վարակվելը կարող է դառնալ նաև ջրազրկման կամ երիկամների հետ կապված խնդիրների զարգացման պատճառ, ուստի հարկավոր է շատ ուշադիր լինել։

Ասթմա կամ թոքերի հիվանդություններ

Թոքերի քրոնիկ օբստրուկտիվ հիվանդության դեպքում գրիպը կարող է հանգեցնել շնչուղիների այտուցման ու լորձի խցանման՝ դժվարացնելով շնչառությունն ու առողջական լուրջ խնդիրների պատճառ դառնալով։ Գրիպը շատ վտանգավոր կարող է լինել նաև ասթմայի դեպքում՝ անգամ եթե այս հիվանդությունը մշտական վերահսկողության տակ է պահվում։ Ասթմայի դեպքում վիրուստը կգրգռի շնչուղիներն ու կդառնա ասթմայի հաճախակի նոպաների պատճառ։ Բացի այդ, թոքերի քրոնիկ օբստրուկտիվ հիվանդությամբ ու ասթմայով հիվանդ մեծահասակների մոտ մեծ է նաև գրիպի հետևանքով թոքաբորբի կամ շնչառական համակարգն ախտահարող այլ վարակիչ հիվանդության զարգացման հավանականությունը, ուստի այս ռիսկային խմբում գտնվողները պետք է առանձնահատուկ ուշադիր լինեն իրենց առողջության նկատմամբ։

Նյութի աղբյուրը՝ medikforum.ru