Որ ախտանշաններն են հուշում ամորձու քաղցկեղի մասին և ինչպես ժամանակին նկատել խնդիրը

Ամորձու քաղցկեղը չարորակ ուռուցքի այն տեսակն է, որը սովորաբար ախտահարում է ամորձիներից մեկը և կարող է տարածվել նաև ամորձու հավելումների ու սերմնածորանի հատվածում։ Այս հիվանդությունը միայն հազվադեպ դեպքերում է ախտահարում երկու ամորձին, սակայն նման հավանականությունը ևս չի կարելի բացառել։

Քաղցկեղի այս տեսակի զարգացումը սովորաբար սկսվում է  սեռական բջիջների ախտահարումից։ Սրանք այն բջիջներն են, որոնք հետագայում վերածվում են սերմնաբջիջների ու սերմնահեղուկի։ Մասնագետների խոսքով՝ այս հիվանդությունը կարելի է բուժել ժամանակին ախտաբանական փոփոխությունները նկատելու և միջոցներ ձեռնարկելու դեպքում, քանի որ որքան շուտ է հայտնաբերվում ուռուցքը, այնքան ավելի արդյունավետ է լինում բուժումը։

Հիվանդությունը զարգացման վաղ փուլերում հայտնաբերելու համար առաջին հերթին հարկավոր է սովորել տարբերել դրա մասին հուշող ախտանշանները, մինչդեռ շատ հաճախ տղամարդիկ պատշաճ ուշադրություն չեն դարձնում դրանց, ինչը հանգեցնում է խնդրի հետագա խորացման։ Նման խնդիրներից խուսափելու համար հարկ է հիշել, որ ամորձու քաղցկեղի մասին կարող են հուշել այնպիսի ախտաբանական փոփոխությունները, ինչպիսին են.

• ամորձու հյուսվածքներում պնդացումների առկայությունը, որը չի ուղեկցվում ցավոտ զգացողություններով,
• ամորձիների հատվածի այտուցվածությունն ու ցավը,
• ամորձապարկում ծանրության զգացողությունը, 
• ամորձու չափի փոփոխությունը,
• ամորձիների կամ ցայլքի հատվածի մղկտուն ցավը,
• կրծքի այտուցն ու ցավը, որը կարող է տարածվել ինչպես կրծքի միայն մի կողմում, այնպես էլ երկու,
• մեջքի ցավը, որը պայմանավորված է լինում որովայնի հետին հատվածում ավշային հանգույցների մեծացմամբ (այս ախտանշանը սովորաբար ի հայտ է գալիս հիվանդության զարգացման ուշ փուլերում)։

Այս ախտանշանների առկայության դեպքում մասնագետները խորհուրդ են տալիս անմիջապես միջոցներ ձեռնարկել, սակայն դրանք ժամանակին նկատելու համար հարկավոր է շատ ուշադիր լինել ու պարբերաբար ինքնուրույն զննել օրգանը վերոնշյալ ախտաբանական փոփոխությունների առկայությունը բացառելու համար։ Պնդացումների առկայությունը, օրգանի չափերի փոփոխությունն ու անզեն աչքով նկատելի այլ փոփոխությունները կարելի է հեշտությամբ նկատել հասարակ շոշափման ու արտաքին զննման միջոցով, իսկ ցավն ու տհաճ զգացողություններն արդեն իսկ կհուշեն խնդիրների առկայության մասին, ուստի պարզապես հարկավոր է ավելի ուշադիր լինել։

Նշված ախտանշանները ոչ միշտ են պայմանավորված լինում ամորձու քաղցկեղով, ուստի խուճապի մատնվելու կարիք չկա, սակայն դրանց առկայությունն այնուամենայնիվ հուշում է անհապաղ մասնագետին դիմելու և բուժզննում անցնելու անհրաժեշտության մասին, քանի որ օրգանիզմում տեղի ունեցող ցանկացած ախտաբանական փոփոխություն միշտ իր պատճառն է ունենում։ Նմանատիպ ախտանշաններով կարող են դրսևորվել նաև բարորակ կիստաները, էպիդիդիմիտը կամ ամորձապարկում հեղուկի կուտակում, սակայն անկախ պատճառից խնդիրը ենթադրում է անհապաղ բուժում։

Վերոնշյալ ախտանշաններից մեկի կամ մի քանիսի առկայության դեպքում հարկավոր է անպայման խորհրդակցել մասնագետի, ցանկալի է՝՝թ ուրոլոգի կամ անդրոլոգի հետ և բուժզննում անցնել խնդրի պատճառը պարզելու ու անհրաժեշտության դեպքում բուժումն սկսելու համար։ Հարկ է հիշել, որ ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել և էլ ավելի վատթարացնել հիվանդի վիճակը։ Բացի այդ, միայն փորձառու մասնագետը կկարողանա պարզել խնդրի պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:

Նյութի աղբյուրը՝ medikforum.ru