Հինգ արտասովոր ախտանշան, որոնք կարող են հուշել թոքերի քաղցկեղի մասին

Թոքերի քաղցկեղն ամենավտանգավոր հիվանդություններից մեկն է, որը տարեկան հազարավոր մարդկանց կյանք է խլում։ Այս հիվանդությունը կարող է շատ երկար ժամանակ մնալ աննկատ, ինչի պատճառով հայտնաբերվում է բավական ուշ։ Այնուամենայնիվ սա այն ախտաբանություններից է, որի վաղ ախտորոշումը զգալիորեն բարձրացնում է բարեհաջող բուժման հավանականությունը, ուստի հիվանդութան մասին հուշող ախտանշաններն իմանալը շատ կարևոր է։ 

Քաղցկեղի այս տեսակի ախտորոշումը բավական դժվար է, քանի որ հիվանդությունը հաճախ դրսևորվում է ախտանշաններով, որոնք հաճախ չեն ասոցացվում թոքերի ախտահարման հետ։ Այնուամենայնիվ մասնագետները վստահ են, որ բավական զգոն լինելու դեպքում կարելի է ժամանակին նկատել խնդիրն ու սկսել բուժումը։ 

Ինչպես նշում են Ռոյ Քասլի թոքերի քաղցկեղի դեմ պայքարի հիմնադրամի (Roy Castle Lung Cancer Foundation) մասնագետները, թոքերի քաղցկեղը կյանքին սպառնացող հիվանդություն է, որի հիմնական ախտանշաններն են մշտական հազը, հևոցն ու հոգնածությունը, սակայն այս «դասական» ախտանշաններից բացի կան նաև մի շարք ատիպիկ ախտանշաններ, որոնց մասին շատ քչերը գիտեն։ 

Express պարբերականի հետ զրույզում մասնագետները նշել են, որ այս հիվանդության զարգացումը սերտորեն կապված է ծխախոտի գործածության ու պասիվ ծխելու հետ։ Նրանց խոսքով՝ հիվանդության ախտանշանները հայտնաբերելն այդքան էլ հեշտ չէ, քանի որ թոքերում կա ընդամենը մի քանի նյարդային վերջավորություն, ուստի ուռուցքը կարող է երկար ժամանակ զարգանալ ու աննկատ մնալ, սակայն այս արտասովոր ախտանշաններին ուշադրություն դարձնելը թույլ կտա ժամանակին ախտորոշել խնդիրը, ինչն էլ կբարձրացնի բարեհաջող բուժման հավանականությունը։

Մատների ձևի փոփոխություն

Թոքերի քաղցկեղի մասին հուշող ամենաարտասովոր ախտանշաններից մեկը մատների ձևի փոփոխությունն է։ Այս դեպքում մատների ծայրերը մեծանում են ու կորանում՝ նմանվելով թմբուկի փայտիկների։ Ինչպես բացատրում են բժիշկները, նման ձևախախտումներ հաճախ են ի հայտ գալիս սրտամկանի ու թոքերի այն հիվանդությունների դեպքում, որոնց ժամանակ արյան մեջ թթվածնի մակարդակը նվազում է։

Դեմքի այտուցվածություն

Սա կարող է պայմանավորված լինել վերին սիներակի օբստրուկցիայով, որը զարգանում է թոքերի քաղցկեղի հետևանքով։ Վերին սիներակը կրծքավանդակով անցնող մեծ երակ է, որն արյունը մարմնի վերին հատվածից մատակարարում է սրտամկանին։ Այս անոթի օբստրուկցիան տեղի է ունենում այն ժամանակ, երբ ինչ-որ բան խոչընդոտում է արյան հոսքին, իսկ նման խոչընդոտ կարող է դառնալ թոքում զարգացած ուռուցքը։

Բացի այդ, դեմքի ատուցվածություն կարող է նկատվել նաև այն դեպքում, երբ չարորակ նորագոյացությունը տարածվում է մոտակա ավշային հանգույցների վրա։

Մեջքի կամ ուսի ցավեր

Թոքերի քաղցկեղը որպես կանոն ասոցացվում է կրծքավանդակի ցավերի հետ, սակայն այս հիվանդության մասին հուշող անսպասելի ախտանշան կարող են լինել նաև մեջքի կամ ուսի ցավերը, ընդգծում են մասնագետները։

Քաշի նվազում

Երեք և ավելի կիլոգրամ քաշի կորուստն առանց որևէ պատճառի կարող է լինել քաղցկեղի զարգացման վաղ փուլերի մասին հուշող ախտանշաններից մեկը, ուստի այն չի կարելի թողնել առանց ուշադրության։ Բանն այն է, որ չարորակ բջիջները չափազանց շատ էներգիա են վատնում և արտազատում են նյութեր, որոնք փոխում են օրգանիզմում սննդից ստացված էներգիայի վերամշակման գործընթացը, ինչն էլ դրսևորվում է քաշի անբացատրելի նվազմամբ։

«Քաշի անբացատրելի կորուստը, որպես կանոն, նկատվում է ենթաստամոքսային գեղձի քաղցկեղի, ստամոքսի քաղցկեղի, կերակրափողի քաղցկեղի և թոքերի քաղցկեղի դեպքում։ Թոքերի քաղցկեղով հիվանդ շատերի մոտ կարող են նկատվել խնդիրներ՝ կապված սնունդը ծամելու և կուլ տալու գործընթացի հետ, ինչը նույնպես կարող է նպաստել քաշի նվազմանը։ Բացի այդ, հիվանդության մասին հուշող ոչ ակնհայտ ախտանշան կարող են լինել սրտխառնոցն ու ախորժակի կորուստը», - նշում են գիտնականները։

Վարակներ

Փորձագետների խոսքով՝ մյուս տարածված ախտանշանը, որը հուշում է թոքերում զարգացող չարորակ նորագոյացության մասին, կրծքավանդակի վարակներն են, որոնք անսպասելիորեն հաճախակի բնույթ են սկսում ստանալ։Նման խնդիրներ նկատելու դեպքում հարկավոր է անհապաղ դիմել թերապևտին ու բուժզննում անցնել։