Երեք պարզ քայլ շաքարային դիաբետի դեպքում իմունային համակարգն ամրապնդելու համար

Շաքարային դիաբետն ամենավտանգավոր հիվանդություններից է, որը հանգեցնում է արյան մեջ շաքարի մակարդակի բարձրացման և ուղեկցվում է մի շարք տհաճ ախտանշաններով: Այս հիվանդությունը կարող է բազմաթիվ բարդություններ առաջացնել, խիստ բացասաբար անդրադառնալ կյանքի որակի վրա և անգամ հանգեցնել մահվան: Ընդ որում՝ այն համարվում է անբուժելի, ուստի այս դեպքում ինքնազգացողության վատթարացումից խուսափելու համար իմունային համակարգն ամրապնդելը շատ կարևոր է:

Բացի այդ, շաքարային դիաբետով հիվանդների մոտ կորոնավիրուսի ավելի ծանր ընթացքի վտանգն ավելի է մեծանում, ուստի ներկա իրավիճակում բարձր իմունիտետ ունենալը կենսական նշանակություն է ունենանում:

Ձեր ուշադրությանն ենք ներկայացնում մի քանի պարզ քայլ, որոնք թույլ կտան ամրապնդել իմունային համակարգն ու բարձրացնել դիմադրողականությունը:

Ճիշտ սննդակարգ

Իմունային համակարգի ամրապնդման համար խորհուրդ է տրվում օգտագործել մակրոտարրերով ու վիտամիններով հարուստ մթերք։ Նման մթերքի շարքին են դասվում գազարը, նարինջը, քաղցր պղպեղը, բրոկոլին, սիսեռը, ինչպես նաև սերմերն ու ընկույզները: Շատ օգտակար կարող են լինել հավի միսն ու ծովամթերքը, որոնք օրգանիզմի համար շատ կարևոր օմեգա-3 ճարպաթթուների հիանալի աղբյուր են: Սերմերն ու ընկույզները նույնպես հարուստ են օմեգա-3 ճարպաթթուներով, ուստի կարող են հիանալի ընտրություն լինել բուսակերների համար:

Ֆիզիկական ծանրաբեռնվածություն

Առողջության ամրապնդման լավագույն միջոցը պարբերաբար մարզվելն է: Ընդ որում՝ ֆիզիկական ակտիվությունը շատ օգտակար է ոչ միայն շաքարային դիաբետով հիվանդների, այլև բացարձակապես առողջ մարդկանց համար: Ֆիզիկական ակտիվությունը բարելավում է արյան շրջանառությունը, վերահսկողության տակ է պահում քաշը, նվազեցնում է սթրեսի մակարդակը և այլն: Շաքարային դիաբետի դեպքում ամեն առավոտ 30 րոպե տևողությամբ զբոսանքն անգամ կօգնի խթանել նյութափոխանակությունը, նվազեցնել շաքարի մակարդակը, բարձրացնել տոկունությունն ու զգալիորեն բարելավել կյանքի որակը: Սակայն մինչ ակտիվ վարժությունների կատարմանն անցնելը հարկավոր է անպայման խորհրդակցել բժշկի հետ հնարավոր հակացուցումները հաշվի առնելու համար:

Առողջ քուն

Քնի պակասը կարող է բարձրացնել երկրորդ տիպի շաքարային դիաբետի զարգացման հավանականությունը, ուստի որակյալ ու առողջ քունը շատ կարևոր է առողջության պահպանման, այդ թվում նաև շաքարի մակարդակի վերահսկման ու սթրեսի ցուցանիշների նվազեցման համար: Սա է պատճառը, որ շաքարային դիաբետով հիվանդների առաջնային խնդիրներից մեկը պետք է լինի քնի կարգավորումը:

Այս ամենի հետ մեկտեղ հարկ է հիշել, որ շաքարային դիաբետով հիվանդները պետք է անպայման հետևեն բժշկի բոլոր խորհուրդներին, ժամանակին ընդունեն դեղորայքը, ստանան գրիպի կամ թոքաբորբի դեմ պատվաստումները, կանոնավոր բուժզննում անցնեն և անպայման խուսափեն ծխախոտից ու ալկոհոլի գործածությունից:

 Նյութի աղբյուրը՝ The Health Site